Imagen Ministeriu Finansas Rui Gomes Submete OJE 2023 ba Presidente Parlamentu Nasional Aneceto Guterres iha Sala Komferensia PN Dili, 03/10/2022
SAPNewsTL,Dili : Oitavu Guvernu Konstitusionál liu husi Ministru Finansas Rui Augusto Gomes Ofisialmente entrega ona Orsamentu Jerál Estadu tinan 2023 ba Parlamentu Nasionál ho montante billiaun 3,155.306 USD iha Sala Komferénsia Parlamentu Nasionál
Tuir ministru Finansas Rui Augusto Gomes katak Governu hili tema, OJE 2023 ho monrante Biliiaun 3,155.306 USD maka investimentu produtivu no kresimentu inskluzivu ba jerasaun futuru.
“Ami halo retratu ida kona-ba OJE 2023, proposta husi Governu bazeia ba lei grandes opsaun planu define billiaun 3,155.306 USD, ida ne’e maka tetu global despeza ne’ebé ita sei halo iha tinan 2023, Governu hakarak tenta nafatin divesifika ekonomia iha Timor-Leste no mós tenta atu tau ema hanesan sentru ba dezenvolvimentu”. Hatete Ministru Rui iha Sala Komferénsia Parlamentu Nasionál, 03/10/2022.
Ministru ne’e esplika , Governu halo mobilizasaun reseitas doméstikas liu husi introdusaun impostus. Portantu, Sei hasa’e tan impostu iha tabaku husi 50 UDS ba 100 USD, introdus impostus ba masin midar, bebidas sira ne’ebé sukaradas hanesan kokakola, sprite buat sira ne’e prejuduka saúde publika.
Guvernante ne’e akresenta, Governu hakarak produz taxas aduanedas balu hodi aumenta rezeitas iha Timor-Leste aumezmu tempu reduz importasaun. Tanba taxa aduanedas menus liu iha nivel Asean. Nivel Asean ne’e pur volta 9, 10, 12 % Timor –Leste nian 2,5 %, nune’e Governu hakarak hasa’e tan ba 5%. Hanesan ne’e mak laiha tendensia atu importa hela de’it.
“Ita mós tenke hisik ita nia kosar rasik atu produs ita nia sasan, para ita nia osan labele halai sai ba rai liur. Ida ne’e mak medidas balu ami sei intrudus iha orsamentu ida ne’e”, Dehan Ministru.
Governu mós introdus medidas balu ezemplu karreta sira ne’ebé ho CC boot liu sei selu impostu boot kompara ho karreta sira ne’ebé CC kiik oan. Alende medidas sira ne’e mós utiliza efisientemente ba imprestimu sira kondisionais ho mós komersiais sira, nune’e bele haree mos despezas sira ho kualidade
“Ita mós hakarak konserta dispezas sira ne’e ho kualidade la’os de’it kuantidade, signifika ita nia orsamentu aloka ba atividade sira ne’e tenke atinje objetivu di’ak ida , la’ós naran tau de’it maibé ita mós hakarak haree aspetu kualidade”. Fundamenta Ministru.
Iha Proposta OJE 2023, Governu aloka millaun $17 ba konstrusaun, reabilitasaun no manutensaun estrada no ponte sira iha área rurál. Aleinde ne’e, Governu mós aloka millaun $15 ba konstrusaun estrada nasionál Pante Macassar no millaun $7,8 ba reabilitasaun estrada munisipál entre Laga no Baguia hamutuk kilometru 30, inklui mós inisiativa sira seluk ho intensaun atu kontinua implementa programa konstrusaun estrada, ponte no ligasaun rede elétrika nasionál iha territóriu laran tomak.
Atu garantia katak to’o iha 2030 populasaun sira hotu iha rai-laran iha asesu ba eletrisidade nasionál ho presu ne’ebé baratu no enerjia renovável ho eskala ki’ik liuhusi EDTL, iha proposta orsamentu ba tinan oin, Governu aloka ona millaun $118.
Iha tinan oin, Governu mos aloka ona orsamentu millaun $25 hodi aselera diversifikasaun ekonomia, millaun $14,5 investe iha setór telekomunikasaun, millaun $6,4 hodi promove produsaun nasionál, millaun $2 aloka ba kriasaun balkaun úniku ba rejistu empreza no millaun $1,3 hodi harii parke indústria.
“Governu mós investe millaun $21 iha setór agrikultura atu apoiu aumentu produsaun no produtividade ne’ebé sustentável ho intensaun atu redus pobreza, hasa’e seguransa alimentár no promove kresimentu ekonómiku iha área rurál. Millaun $3,6 ba sistema irrigasaun Laivai no millaun $2,6 ba Galata. Apoiu estensaun área agrikultura ho orsamentu alokadu millaun $2,6 no millaun $2,1 hodi dezenvolve zona agrikultura integradu iha área irrigasaun”. Dehan Ministru liu husi Pajina Ofisial Ministeriu Minansas
Distribuisaun Tetu Agregadu Orsamentu Administrasaun Sentrál iha OJE 2023, Setór Kapitál Sosiál ne’ebé inklui Saúde, Edukasaun no Protesaun Sosiál hetan alokasaun millaun $772 ka 36%. Setór ida-ne’e mak maiór benefisiariu husi finansiamentu Proposta OJE 2023. Ida-ne’e refleta importansia ne’ebé mak Governu fó ba iha asesu universál ba edukasaun ne’ebé kualidade (millaun $137), saúde (millaun $92) no protesaun sosiál (millaun $301), liuliu ba grupu vulneravel.
Entretantu, Governu propoin ba Parlamentu Nasionál orsamentu ho montante millaun $19,2 hodi implementa programa Bolsa da Mãe. Husi montante ne’e, millaun $5,3 sei aloka ba kontinuasaun programa inísiu no millaun $13,7 sei aloka ba espansaun Bolsa da Mãe Jerasaun Foun, ne’ebé nia objetivu mak atu apoiu inan isin-rua no mellora saúde no nutrisaun durante inísiu loron rihun-ida nomós apoiu labarik ho moras króniku no defisiénsia.
Proposta OJE 2023 ne’e mós kobre alokasaun orsamentu millaun $22,4 hodi espande programa Merenda Eskolár, mellora kualidade hahan hodi alkanse labarik sira nia kualidade nutrisaun, hasa’e despesa ba kada labarik no kada hahan husi $0,25 to $0,42.
Totál despesas globál billiaun $3,16 ne’e kompostu husi Orsamentu Administrasaun Sentrál billiaun $2,8 (montante ne’e inklui ona Fundu Kombatentes Libertasaun Nasionál, billiaun $1). Orsamentu Seguransa Sosiál hetan alokasaun millaun $235,7 no RAEOA millaun $120.
Enkuantu, Parlamentu Nasionál sei hahú halo diskuzaun jeneralidade OJE 2023 iha loron 7 fulan novembru no halo aprovasaun final globa iha loron 17 fulan novembru, antes submete ba Presidente da Repúblika hodi Promulga ou Veta
Jornalista : Jonh Marito
Editor : Ekipa Editorial