Imajem Presidente APFTL Zaulino Gomes da Silva, iha Sede APFTL Bekora, 18/04/2023
SAPNewsTL, Dili : Relasiona ho Eleisaun Parlamentar 2023 ne’ebe sei realiza iha 21 Maiu 2023, Alumni Parlamentu Foinsa’e Timor Leste (APFTL) deside hala’o survey kona-ba joven sira nia partisipasaun iha polítika, objetivu husi survey ne’e hodi buka hatene preferénsia joven sira hili partidu polítiku sira iha eleisaun tinan ne’e
Iha apresentasaun Presidente APFTL Zaulino Gomes da Silva hateten survey refere kobre Munisipiu 11 exeptu Munisipiu Vikeke, Manufahi no RAEOA, survey ne’e foku ba joven ho idade 17 to’o 35 hamutuk atus tolu limanulu (350)
“Distribuisaun idade maka hosi 17 to’o 35, kompostu husi respondente hamutuk 350 husi 11 munispiu hanesan Aileu, Ainaru, Atauro, Baucau, Bobonaru, Cowalima, Dili, Ermera, Lautem, Likisa, no Manatutu, la inklui Manufahi, RAEOA, no Vikeke tanba rekursu la sufisiente hodi fasilita ekipa hodi to’o iha munisipiu sira seluk”. Tenik Presidente APFTL Zaulino Gomes da Silva ba Jornalista sira iha Sede APFTL Bekora, 18/04/2023
Tuir Rezultadu Survey amostra Partidu Congresso Nacionál Reconstrução de Timor (CNRT) okupa 39,9 %, Partidu Frente Revolucionário Timor Leste Independente (FRETILIN) okupa 28,5%, Partidu Demokrátiku (PD) okupa 18,3 %, Partidu Kmanek Haburas Unidade Nasional Timor Oan (KHUNTO) hetan 5.7%, portantu partidu sira seluk akumula deit 7.6%, enkuantu Partidu Libertasaun Popular (PLP) la liu bareira
Lider Assosiasaun ne’e fundameta joven sira prefere hili partidu polítiku sira tanba haree ba figura partidu, vizaun partidu,istória no seluk tan, iha ne’ebe hili bazeia ba figura kobre 37,89%, vizaun partidu kobre 37.54%, istória kobre 13,68%, no sira seluk kobre 10,88%
Presidente APFTL Zaulino Gomes da Silva
Bazeia ba rezulta survey ida ne’e, Presidente APFTL haktuir joven barak liu hakarak guvernu dasia ne’ebe sei mai presiza prioritiza setor edukasaun, infraestrutura, saude, ekonomia, kampu de traballu, agrikultura no sosial tanba rezulta amostra maioria jovens hili setor edukasaun kobre 26,90%, Infraestrutura kobre 24,24%, Saude kobre 18,81%, Ekonomia kobre 8,15%, Kampu de Traballu kobre 7,21%, Agrikultura kobre 5,12%no sosial kobre 3,13%
Entretantu, Lideransa APFTL ne’e mos husu ba joven sira atu kontribui ba kampanha no partisipa iha eleisaun Parlamentar 2023 tanba ema hotu hatene partidu polítiku sira mak sei deside futuru rai ne’e nian
“Ita tenki hatene importansia husi vota ne’e, tanba ita nia votu ne’e mak sei determina tanba partidu polítiku sira mak sei deside futuru rai ne’e nian, sira mak sei halo desizaun publiku ne’ebe sei afeta mos ba ita, entaun ita iha dever atu deposita ita nia konfiansa ba sira hodi dehan ba sira katak sira tenki uza ho didiak hodi halo desizaun ne’ebe lori benefisiu ba ita hanesan edukasaun no saude ne’ebe kualidade ba povu”. Dehan Zaulino
Enkuantu, Survey ne’e la’o durante fulan rua hahu husi fevereiru to’o abril ne’ebe konsege husu respondente hamutuk 350 husi munisipiu 11 la inklui Munisipiu Vikeke, Manufahi no RAEOA
Jornalista : Vincensius Saldanha