Imajem : PNTL Munisipiu Baukau halo identifikasaun no tula motor ne’ebé Matebean Suzano Fausto Barros Soares uza hodi hetan iha Vemasse, 31/01/2025. Foto : Conzita Mota
SAPNewsTL, Baukau : Relasiona ho asidente (motor baku fila) ne’ebé akontese iha Postu Administrativu Vemasse, Munisipiu Baukau rezulta Suzano Fausto Barros Soares lakon vida ka mate fatin tanba soke no monu ba Mota laran.
Sidadaun Suzano Fausto Barros Soares hetan asidente no lakon vida, wainhira hala’o viajem hosi Munisipiu Viqueque ba Munisipiu Dili.
Hafoin asidente ne’e mosu, komunidade sira hetan no lori ba Sentru Saúde Bucoli hodi halo tratamentu maibe vítima refere laiha ona iis.
Tuir mai, motor ne’ebe ho marka H 9265 ne’e parte Eskuarda Polísia Nasional Timor-Leste (PNTL) Munisipiu Baukau halo ona identifikasaun no lori ona ba Komandu PNTL Munisipiu Baucau.
Hafoin notisia asidente (motor baku fila iha ponte Wailakama Vemasse, 31/01/2025, orseik loraik maiz ou menus tuku 3), ne’e fo sai liu tiha oras balun família sira hetan kontaktu, nune’e família sei lori fila ba nia rai moris fatin Munisipiu Viqueque.
Matebean hakotu iis ho kamizola ida hosi Institutu Politécnica Betadu (IPB). Vítima Suzano Fausto Barros Soares moris iha loron 28 Fulan Junhu 2001 iha Suku Uma Quic, Postu Administrativu Viqueque Villa, Munisipiu Viqueque.
Maluk Timoroan sira, normalmente asidente ema hotu-hotu la espera maibe husu motorista sira hotu favor halai ho kuidadu, atensaun no meu kontrola kondisaun transporte, molok utiliza hodi halo viajem ba fatin ruma.
Deskansa ho hakmatek ba vítima ne’ebe ohin lakon vida tanba hetan asidente iha Vemasse munisipiu Baukau.
Jornalista : Conzita Mota