Imajem : Graduadu UNTL Igino da Costa hamutuk ho familia sira selebra nia graduasaun iha Likisa, 12/07/2024.
SAPNewsTL, Likisa : Hafoin gradua iha Universidade Nasionál Timor Lorosa’e (UNTL), Graduante Igino da Costa haktuir la fasil atu hetan susesu iha tempu ne’ebe badak hanesan ema barak imajina, susesu lori tempu naruk, maske nune’e, maibe susesu ne’e lori kontente ba família sira.
Graduadu UNTL, Fakuldade Edukasaun Arte no Humanidades (FEAH) Departamentu Kímika, Igino da Costa rekunhese katak tahan durante tinan 7 ne’e la fasil, prosesu ne’e fo teste ba estudante nia pasiénsia no fuan boot hodi tahan hasoru situasaun hotu ho preparadu no estuda makaas.
“Ha’u estuda tinan 5 iha UNTL, hafoin livre teoria ha’u hatama tópiku monografia, hakerek to’o kapítulu III, maibe dosente orientador deside kansela tópiku ne’e tanba nia parte konsidera tópiku barak hanesan entaun muda tópiku, nune’e ha’u pasiénsia nafatin hodi hakerek fila fali no orienta durante tinan 2 resin molok tanba ba ezame defeza monografia”.
“Prosesu ne’e fo teste duni ba ita nia pasiénsia, fo teste tanba dosente senpre dejafia ita atu kontinua haka’as an no estuda makaas, ita tenki pasiénsia hodi simu buat hotu ne’ebe mosu iha prosesu, ha’u hatene katak prosesu lori terus no tenpu barak, maibe susesu sei lori kontente no hamnasa ba ita nia an rasik no família sira”. Tenik Graduadu UNTL Igino da Costa ba SAPNews iha Likisa, 12/07/2024
Igino da Costa hatutan, dalan ba susesu ne’e difisil, todan no dejafiavel, maibe senpre iha dalan oioin ne’ebe iha molok to’o iha objetivu ikus ne’e, maske nune’e maibe la signifika estudante labele, lae ema hotu bele no possivel ba ema hotu ne’ebe hakarak koko no beibeik iha esforsu, dedikasaun, pasiénsia no sakrifisiu.
“Dalan ba susesu ne’e difisil tebes, la hanesan sa mak ita imajina, maibe la signifika ita labele, ita bele, se ita rasik iha determinasaun, dedikasaun no hatudu nafatin komitmentu ne’ebe forte iha dalan luta nian”. Igino hateten
Graduadu ne’e mos fo agradese ba Aman Maromak tanba liu husi orasaun oioin ne’ebe familia sira no nia rasik hasa’e no harohan lor-loron, ikus mai Maromak fo duni resposta ba orasaun ne’e.
“Agradese ba Aman Maromak ne’ebe rona orasaun sira husi ha’u no familia sira, iha ne’ebe kontinua tulun liu husi haraik matenek no espíritu forsa vontade luta nian to’o ohin bele konkista rezultadu ikus ho graduasaun no susesu iha mundu akadémiku, obrigadu wa’in ba ema hotu ne’ebe halo ona orasaun ba ha’u”. Igino tatoli agradese
Imajem : Graduadu UNTL Igino da Costa Lic.Ed.
Graduante ne’e mos fo agradese ba familia sira hotu, kolega sira hotu no UNTL liliu dosente sira hotu iha Departamentu Kímika tanba bele apoia, tulun no fasilita nia durante perkursu akadémiku iha UNTL.
“La haluha, agradese mos ba Apa no Ama, maun no alin sira hotu, familia hotu ne’ebe apoia ha’u durante estudu tinan 7 nia laran, imi nia sakrifisiu vale apena tanba ohin ha’u konsege ona realiza saida mak imi hein durante ne’e, agradese mos ba UNTL liliu Departamentu Kímika ne’ebe sai ha’u nia espasu luta nia nian to’o realiza mehi ida ne’e, obrigadu no agradese ba parte hotu ne’ebe apoia direta tantu indireta, imi hotu iha ha’u nia fuan”. Igino deklara.
Graduadu nia aman, Afonso da Costa sente kontente tanba oan mane ida husi Família Vatarino, Luro-Lautém bele konklui ona nia estudu iha UNTL, maske lori tempu naruk maibe ohin simu ona graduasaun.
“Ha’u nia oan gradua, konserteza ha’u kontente, esperansa ne’ebe ha’u iha ba ha’u nia oan maka nia gradua iha UNTL, ohin nia gradua ona, nia fo ona hamnasa no laran ksolok ba ami familia sira hotu, ha’u mos fo agradese ba familia lubun ida ne’ebe apoia nia to’o hetan graduasaun, obrigadu ba imi hotu, Maromak sei tulun ita hotu”. Dehan Graduadu nia Aman Afonso da Costa ba SAPNews iha Likisa.
Graduadu Igino da Costa mos husu ba nia maluk estudante sira ne’ebe sei hala’o estudu iha mundu akadémiku atu kontinua firme to’o susesu tanba susesu ne’e senpre posivel ba ema hotu ne’ebe esforsu no luta.
“Husu ba kolega sira ne’ebe sei luta iha prosesu nia laran, atu firme nafatin no hakaas an hodi realiza ita ida-idak nia mehi, tanba susesu ne’e sempre posivel ba ema hotu ne’ebe hakarak koko no esforsu beibeik, espera katak ohin ha’u susesu ona, aban bainrua imi sei susesu, susesu ne’e ba ita hotu, atu hetan servisu ka la hetan servisu, ne’e depende ba ita ida-idak, maibe hein katak to’o loron ida, servisu ne’e sei iha ba ida ne’ebe buka”. Nia hakotu
Enkuantu, graduasaun ne’ebe UNTL hala’o ba dala XXX durante loron rua (11-12/07/024) iha Ginaziu Munipal de Dili (GMT) ne’e ba fakuldade 10 husi departamentu 49, total graduadu rihun ida atus hitu ruabulu resin ualu (1728), entre sira Fakuldade Edukasaun Artes Humanidades hamutuk 521 no Departamentu Kímika hamutuk 62.
Jornalista : Marciana da Conceição