Imajem : Vise Primeiru Ministru Mariano Assanami Sabino no Representante Telkomcel atribui sertifikadu no piala ba manan na’in sira iha Salaun Multiozu GMN Dili, 27/02/2025
SAPNewsTL, Dili : Operador Telekomunikasaun Telkomcel realiza kompetisaun jornalista hakerek ba mídia nasionál sira, iha kompetisaun ne’e Jornalista Marcela Mery da Costa hosi Mídia SAPNews sai vensedor.
Rezultadu no Prémiu kompetisaun jornalista hakerek ne’e publika no atribui iha ámbitu Telkomcel Annual International Summit (TAIS) ne’ebé partisipa hosi Primeiru Ministru Kayrala Xanana Gusmão ho membru governu sira, Prezidente Parlamentu Nasionál Maria Fernanda Lay no konvidadu importante sira.
Hafoin rona rezultadu no simu prémiu nu’udar manan na’in dahuluk, Jornalista Marcela Mery da Costa sente gratidaun tanba bele sai vensedor iha kompetisaun jornalista hakerek.
“Ha’u nia parte sente gratidaun no orgullozu tanba bele hakerek diak no eskollidu sai manan na’in kompetisaun jornalista hakerek ne’ebé mai ho kritériu rigorozu no kompetitivu tanba hetan partisipasaun hosi jornalista media nasionál sira”. Tenik Marcela Mery da Costa iha Salaun Multiozu GMN Dili,27/02/2025.
Marcela hatutan, notísia ne’ebé nia hakerek maka ligadu ho visita Santu Padre Papa Francisco ne’ebé ho tema “atu imi nia fiar sai imi nia kultura”, ho nia subtema ne’ebè liga ba kultura telkomcel hodi apoia uma domin, halo orasaun no dedika asaun karidade ba komunidade sira ho baze família unidade, serví ho domin no impaktu sosial.
“Tema sentral hosi kompetisaun ne’e mak “atu imi nia fiar sai imi nia kultura” ho baze família unidade, serví ho domin no impaktu sosial, artigu ne’e refleta ba orientasaun tema no submeta hirak ne’e”.
Marcela akresenta, foufoun hakerek ho hanoin ida hakarak kunhese saida mak instituisaun Telkomcel halo no presta ba públiku liliu ligadu ho visita Papa Francisco tuir tema sentral “Que a vossa fe, seja a vossa cultura”, oinsa bele hatene klean sira nia kultura servisu, domin iha institusiaun no prestasaun ne’ebé sira halo ba povu Timor-Leste.
“Hakerek artigu ne’e ho objetivu atu kunhese klean servisu Telkomcel nian, liután ida ne’e atu promove kultura servisu ne’ebé Telkomcel presta ligadu ho tema visita Santu Padre nian, la imajina sai vensedor maibe felismente sai manan na’in dahuluk, buat ne’ebe ha’u hakerek ne’e sertamente ke los no refleta ba kritériu kompetisaun ne’e, entaun ha’u agradese ba Maromak no Telkomcel ne’ebe loke hela oportunidade ne’e ba ami hodi expressa ami nia hanoin no perspetiva kona ba Telkomcel”. Nia dehan
Enkuantu, Manan na’in dahuluk maka Marcela Mery da Costa hosi Mídia SAPNews, manan na’in daruak mak Emerenciana Pinto hosi Suara Timor Lorosa’e (STL) no manan na’in datoluk mak Januário hosi Mídia Independente.
Manan na’in sira, Telkomcel atribui prémiu ba sira hanesan piala ida, sertifikadu apresiasaun ne’ebé sertifika hosi Chief Executive Officer (CEO) Telkomcel Benedictus Ardiyanto Priyo no osan transporte balun.
Jornalista : Ermelinda Soares