SAPNewstl, Dili : Horseik, iha Ministériu Juventude Desportu Arte no Kultura (MJDAC), realiza konsertu públiku hodi komemora loron nasionál juventude no masakre santa-kruz, maiz ou menus tuku 9:00 otl, Polísia-inteliiénsia ne’ebé destakadu iha konsertu refere PNTL eskuadra Na’in-feto kaptura jóven na’in rua ho naran Paul Soares no Nelson Roldão Soares Xavier.
Razaun kapturasaun ne’e tanba jóven sira-ne’e lori bandeira Palestina no Timor-Leste nian no kaer iha kosertu laran.
Konsertu ne’e mós atu komemora loron masakre santa-kruz 1991, ne’ebé hosi ne’ebá dada solidariedade internasionál. Tanba ne’e maka jóven na’in rua refere, nu’udar membru Frente Maubere Solidariedade Internasionál (FMSI), hakarak espresa sira-nia sentimentu solidáriu ba povu Palestina liuhusi kaer nia bandeira.
“Autoridade seguransa nia kapturasaun la bazeia ba lei tanba Faktu horikalan la hatudu indisius ba krime ruma nune’e polísia nia kapturasaun ne’e hamate liberdade no kontra prinsipiu solidariedade internasionál”. Dehan husi Kodenador jeal FMSI Constantino de Jesus ba Jonalista iha sentru HAK farol Dili, Segunda 13/11/2023
Nia hateten,kapturasaun horikalan ne’e konsidera ilegál no nu’udar violasaun ba direitos Humanos no la respeita prinsípiu jurídiku iha konstituisaun RDTL kona-ba solidariedade internasionál.
“Tanba Jóven na’in rua la’o tuir dalan-loos no lia-loos hodi hatudu sira-nia sentimentu solidariedade, sira la halo krime ruma sira la perturba situasaun, maibé hamriik hodi rona de’it múzika no kaer bandeira”. Nia Akresenta
Liu husi komunikadu imprensa, porta voz ne’e kontra polísia intelijénsia ne’ebé temi jóven nain rua terorista no Milísia i atuasaun polísia nian ne’ebé tuku no tebe jóven na’in rua.
“Jóven nain rua atu espresa ninia sentimentu individual ho tipu solidariedade ba povu iha mundu ne’ebé luta hela ba sira-nia independénsia, tanba jovem hotu konsiente katak 12 de novembro ne’e loron juventude nasional, no loron historiku ne’ebe mundu solidariza luta ba libertasaun nasional” Nia salienta
Nia afirma, iha tempu badak, sira sei hato’o keixa tuir dalan legál, ba Provedór Direitus Humanus no Justisa, ba Ministériu Públiku atu uza nia kompeténsia hodi prosesa Polísia Eskuadra Na’in-Feto iha tribunál. Kona ba aktu hosi polísia nian ne’ebé kontra ema-nia direitu no Liberdade.
Constantino aprofunda, fó solidariedade la’os krime ida iha Estado de Direito Democrático ida-ne’e. Solidariedade nu’udar prinsípiu orientadór ba ita-nia nasaun no Estadu. Nune’e, ema hotu iha direitu atu fó solidariedade ba sé de’it, no mundu ne’ebé luta hela ba sira-nia auto-determinasaun no independénsia.
Jornalista: Marcella Mesquita Lemos