Site icon SAP News TL

Taur, Luolo & Assanami Simu Kadáver Maucalo Iha Aeroportu Nicolau Lobato

Imajem : Eis Titulares & Governu no Membru Parlamentu Nasionál simu Kadável António Soares Maucalo iha Aeroportu Comoro, 17/10/2024

SAPNewsTL, Díli — Primeiru Ministru Interinu Mariano Assanami Sabino, Eis Prezidente Repúblika Taur Matan Ruak no Francisco Guterres Lu-Olo, Tenente Jeneral Falur Rate Laek, Membru Governu no membru parlamentu simu kadaver António Soares Maucalo iha Aeroportu Nicolau Lobato Dili.

Eis titulares orgaun soberanu, Governu Timor-Leste no Instituisaun FALINTIL Forsa Defeza Timor-Leste hamutuk ho familia enlutada simu Kadaver Saudozu Koronel Antonio Soares da Silva ho kodigu ‘Maukalo’ iha Aeroportu Internasionál Prezidente Nicolau Lobato Comoro.

Kadaver Saudozu Koronel Antonio Soares da Silva ho kodigu ‘Maukalo’ to’o iha Aeroportu Internasionál Prezidente Nicolau Lobato Comoro iha oras 13:30 Otl.

Hafoin simu kadáver António Maucalo, Eis Prezidente Repúblika Taur Matan Ruak no Tenente Jeneral Falur Rate Laek presta omenajem ba Saudozu Maucalo iha rezidénsia kintal-boot.

Eis Prezidente Repúblika Taur Matan Ruak

Fo hanoin fali katak, Saudozu Koronel António Soares da Silva alias “Maucalo” moris iha Macadiqui, Postu Administrativu Uatulari, Munisipiu Viqueque, loron 09 fulan Dezembru 1962, tinan sanulu resin neen (16) nia partisipa iha luta libertasaun nasionál, iha ne’ebé hola parte iha Postu Desmobilizasaun Komandante de Unidade.

Saudozu Koronel António Soares da Silva simu kondekorasaun ho Medalha Ordem de Guirrilha iha loron 19 fulan Maiu 2007 no hetan fitun tolu bazeia ba ninia partisipasaun, dedikasaun no sakrifisiu naruk ne’ebé nia fo ba Timor-Leste nia luta ba ukun rasik an.

Molok tama iha periodu invasaun Saudozu tama Forsa Armada Libertasaun Nasionál Timor-Leste (FALINTIL) nu’udar Soldado iha sentru instrusaun Taibessi Dili. Hafoin invazaun Maucalo kontinua sai militar ho kargu soldado partensia ba kompanhia movel ho Komando Paulino da Gama Mauk Moruk iha Setor Ponta Leste.

Iha tinan 1976 Maucalo asumi kargu Komandante Pelutaun Movel ne’ebe ikus mai transforma ba forsa intervensaun.

Iha 1977-1978, Maucalo noemadu Komandante pelutaun primeira kompanhia de Choque . Hafoin zona libertadas rahun, husi 1979-1980 Maucalo kontinua Komandante pelotaun forsa konsentrada.

Imajem : Saudozu Antónip Soares “Maucalo”.

Liu tiha Konferensia reorganizasaun Nasional iha 1981 Maucalo ezerse kargu Komandante pelotaun da kuatru kompanha husi Brigada Vermelha kolokadu iha Regiaun Nakroma.

Iha tinan 1984-1991 Maucalo asumi kargu segundu Komandante ba III Unidade ba forsa konsentrada.
Bataliuan 303 husi forsa invazaun Indonesia kaptura Maucalo iha dia-20 junhu 1991 no sai prizoneiru iha Soibada , Ainaro 1996.

Iha prizaun Maucalo involve iha atividade organizasaun frente Klandestina to’o 1999, ikus mai reingresu ba forsa Armada FALINTIL.

Iha periodu ukun rasik an, Saudozu Maucalo asumi kargu nu’udar Chefe da Repartisaun da Justiça das-F-FDTL hodi servi instituisaun sagradu ne’ebé ho domin, konsisténsia, responsabilidade no honestidade.

Iha tinan 2017, Saudozu António Soares da Silva “Maucalo” eskollidu sai Xefe Casa Militar, Prezidente Repúblika Demokrátika Timor-Leste (RDTL) Francisco Gusterres Lu Olo iha tinan 2017 to’o 2022.

Saudozu António Soares hakotu iis ka remata ninia peregrinasaun iha mundu ho idade neenulu resin-rua (62), iha loron 12 fulan Outubru tinan 2024, wainhira hala’o tratamentu iha ospitál Malásia tanba sofre moras prostat.

Jornalista : Ekipa Kobertura

Exit mobile version