Imajen Graduadu Institute Of Business (IOB), iha Salaun IOB, Fomento II, Dili segunda (19/12). Foto : Marcela Lemos
SAPNewsTL, DILI : Institute of Business (IOB) halo graduasaun dala-XV ba estudante tinan 2022 hamutuk nain-503 husi fakuldade ekonomia no negosiu, informasaun komunikasaun no tenknolojia, hospitalidade no turismu ho moto lingua portuges “dezafios e oportunidade de negosios nas areas economia, nas tecnolojias, informaçoes, Comunicaçao e no turismo na era digitalização”.
“Ohin ita halo serimonia graduasaun ba estudante husi fakuldade rua mak ekonomia no negosiu nain-198, hospitalidade no turismu nain-55, aban mak ita halo fali graduasaun ba fakuldade informasaun komunikasaun no teknolojia ho masteradu sira nain-250”, dehan magnifiku reitor IOB Pedro Miguel Barreto Ximenes iha nia diskursu iha salaun IOB, Fomento II, Dili segunda (19/12).
Reitor hatutan, nia sente orgullu ba estudante sira husi fakuldade hospitalidade no turismu mesmu menus kuantidade maibe liu iha kualidade tanba sira mesak kriativu no badinas tebes, nia garante graduadu sira sei ativu tebes envolve iha akltividade serbisu ba to’o munisipiu hodi hatudu ba komunidade no hamutuk ho komunidade lokal hodi dezenvolve hahan lokal hodi sai produtu ne’ebe mak kriativu ho valor ekonomia ne’ebe as no mos area turistika sira iha rai ida ne’e ba futuru.
Nia informa, graduadu sira simu ona subsidiu iha tinan ida liu ba no kbiit laek sira simu bolsa estudu husi MESSK hodi finaliza sira nia estudu
“Ita nia graduadu sira simu ona subsidiu propinas durante tinan ida liu ba no mos kbiit laek simu bolsa husi Ministeriu Ensinu Superior Siensia no Kultura (MESSK) hodi finaliza sira nia estudu, ha’u nia mensajen ba graduadu sira katak iha kualker serbisu ka pozisaun ne’ebe sira ezerse karik simples maibe tenki hala’o ho fuan ne’ebe boot atu nune’e hetan rezultadu diak iha futuru”, tenik Reitor
Iha fatin hanesan reprezentante finalista valor melhor klasifikasaun Dirce Lilifania husi fakuldade ekonomia no negosiu hatete, prosesu lubuk ida ne’ebe nia hasoru hodi hala’o estudu to’o agora hein katak ba oin ho ninia matenek bele kontribui ba desenvolvimentu Timor-Leste.
“Prosesu lubuk mak ha’u hasoru maibe ha’u nafatin iha vontade makaas hodi hala’o to’o ohin loron ne’ebe hein katak ba oin ha’u sei kontribui nafatin ho matenek ne’ebe ha’u iha ba Rai doben Timor-Leste”, Dirce hateten.
Entretantu, partisipa iha serimonia graduasaun Reitor Magnifiku IOB, CEO IOB, Embaixada Indonesia ba Timor-Leste, MESSK, Deputada Parlamentu Nasional Izabel Ximenes , Prezidente INCT, reprezentante Reitor UNTL, reprezentante CCIT no mos Dosente IOB Tomak.
Jornalista : Marcela Lemos