Imajem : Primeiru Ministru Kayrala Xanana Gusmão & Primeiru Ministru Sonexay Siphandone fo sasin ba nota entendimentu ne’ebé asina hosi Nasaun TL – Laos. Foto : Media GPM
SAPNewsTL, Laos : Primeiru-Ministru (PM), Kay Rala Xanana Gusmão no Primeiru-Ministru Repúblika Demokrátika Populár (RDP) Laos, Sonexay Siphandone, sai sasin bá serimónia asinatura nota entendimentu hodi estabelese kooperasaun bilaterál iha área rua.
Area rua ne’ebé parte rua asina maka troka direitu sira atu utiliza rai no edifísiu misaun diplomátika, no izensaun vistu bá titulár pasaporte servisu ho diplomátiku entre estadu Timor-Leste no Laos.
Dokumentu kooperasaun ne’e asina hosi Ministru Negósiu Estranjeiru no Kooperasaun, Bendito dos Santos Freitas, no RDP Laos asina hosi Vise-Primeiru-Ministru no Ministru Negósiu Estranjeiru, Saleumxay Kommasith, iha Sentru Konvensaun Nasionál RDP.
“Asinatura akordu ne’e ne’e reflete ita nia kompromisiu mútua atu hametin liután relasaun bilateral entre Timor-Leste no Laos”. Tenik PM Kayrala Xanana Gusmão iha Laos, tersa-feira, 08/10/2024.
Xefe Governu Timor-Leste ne’e konsidera TL no Laos iha relasaun amizade, tanba ne’e fiar katak sei iha oportunidade atu hametin liután relasaun hodi explora área potensiál sira atu hasa’e kooperasaun iha futuru.
Tuir planu, TL sei loke ninia embaixada iha tinan 2024, enkuantu Primeiru Ministru Xanana Gusmão hato’o bem-vindu ho laran kmanek bá RDP Laos iha Dili.
Xanana Gusmão mós espresa sentimentu kontente no felisita RDP Laos ne’ebé assume Prezidénsia ASEAN nian ne’ebé susesu, hodi kontinua dezeja susesu iha Simeira ASEAN bá 44 no 45 ne’ebé sei realiza iha 09 Outubru 2024.
Xanana Gusmão dehan, Laos sai uma-na’in bá ASEAN durante situasaun ne’ebé difísil tebes iha tempu ida ne’ebé mundu enfrenta konflitu no krize oioin.
Lider Eminiente G7+ ne’e sente haksolok tebes tanba ASEAN bele hala’o papél hanesan estabilizadór iha asuntu globál sira hodi promove toleránsia no pás.
Estadu Timor-Leste mós aproveita fó apresiasaun no agradese bá RDP Laos tanba fó ona ninia apoiu no tinan oin Timor-Leste bele sai membru plenu ASEAN nian.
Iha enkontru bilaterál ne’e, Primeiru-Ministru akompaña hosi Vise Primeiru-Ministru, Ministru Asuntu Ekonómiku no Ministru Turizmu no Ambiente, Francisco Kalbuadi Lay, Vise Ministra Asuntu ASEAN, Milena Maria da Costa Rangel, Embaixadór Timor-Leste iha Laos, Filomeno Aleixo da Cruz, Xefe Gabinete Primeiru-Ministru nian, Elizabeth Exposto no Diretora Jerál ASEAN, Elisa da Silva.
Jornalista : Dircia Baptista Belo