SAPNewsTL, Dili : Relasiona ho Deputadu husi Bankada Guvernu Congressu Nasionál Rekonstrusaun Timorense (CNRT) no Bankada Opozisaun FRETILIN ne’ebe tenta hakilar malu to’o tuku malu iha uma fukun parlamentu nasionál, Estudante UNTL Marinho Pinto konsidera Deputadu beikten tanba la domina emosaun.
Iha intervista, Estudante Universidade Nasionál Timor-Leste (UNTL) Fakuldade Ciénsia Sosiais, Departamentu Dezenvolvimentu Komunitáriu Marinho de Deus Pinto konsidera Deputadu ne’ebe tenta tuku malu iha uma fukun lulik parlamentu nasionál ne’e beikten no inkapasidade tanba la hatene kontrola emosaun to’o tuku malu.
“Ha’u hakfodak dala ida tan, ohin Deputadu rua husi Bankada CNRT no FRETILIN tenta hakilar malu no tuku malu tan iha uma fukun lulik parlamentu nasionál, ha’u atu dehan sira rua beikten no inkapasidade tanba la hatene kontrola emosaun no domina ida-idak nia emosaun hodi tuku malu fali iha parlamentu nasionál.” Tenik Estudante UNTL Marinho de Deus Pinto iha Kampus Kaikoli, 16/01/2024
Estudante UNTL ne’e akresenta, deputadu ne’e simu mandatu konstituisionál husi povu hodi ba ko’alia povu ninia preokupasaun, problema, halo desizaun polítika, halo fiskalizasaun ba programa guvernu no halo lei ba povu no nasaun ninia interese la’os ba tuku malu iha parlamentu nasionál.
“Deputadu ne’e simu mandatu atu servi povu liu husi halo debate, halo desizaun polítika, fiskalizasaun, halo lei no hato’o povu ninia problema para guvernu bele rezolve laos halo fali buat arbiru iha uma fukun parlamentu nasionál, ha’u triste haree problema ne’e, ne’e sai fanun ida ba sosiedade katak Deputadu sira hamonu kredibilidade orgaun soberanu hanesan Parlamentu Nasionál”. Marinho de Deus hateten
Marinho de Deus Pinto mos husu ba Deputadu sira hotu iha Parlamentu Nasionál atu hatudu sira nia maturidade, integridade lideransa, responsabilidade nu’udar deputadu no profisionalidade nu’udar representante povu nian iha Uma Fukun Parlamentu hodi labele beibeik hatudu politika odiu no vingansa iha públiku nia matan no iha mundu.
“Favor ida, Deputadu sira hatudu maturidade, integridade lideransa, responsabilidade nu’udar deputadu no profisionalidade nu’udar representante povu nian iha Uma Fukun Parlamentu hodi labele beibeik hatudu politika odiu no vingansa iha povu nia matan tanba ne’e rai hela presedensia ida ladiak ba jerasaun foun sira iha futuru”. Nia husu
Enkuantu, tuir informasaun ne’ebe SAPNewsdeputadu na’in rua ne’e la simu malu kritiku sira ne’ebe kestiona kona ba stock aimoruk ne’ebe falta iha ospital, ema mate iha hospital maka ikus mai to’o hamosu dezintendimentu iha Uma Fukun Parlamentu Nasionál.
Hafoin notisia ne’e publika, SAPNewsTL sei dauk halo komfirmasaun ho Prezidente Parlamentu Nasionál Maria Fernanda Lay kona ba kazu ne’e.
Jornalista : Marcela Mery da Costa