SAPNewsTL, Dili : Universidade Nasionàl Timor Lorosa’e (UNTL) nia Fakuldade Ciénsia Sosiais (FCS), Departamentu Administrasaun Públika nia Dosente Abílio Amaral hakotu iis iha Hospital Nasionàl Guido Valadares (HNGV) tanba sofre moras Strock Kmaan
Hafoin halo Presta Omenajem Ba Saúdozu Abílio Amaral, Dekanu Fakuldade Siénsia Sosiais Camilo Ximenes Almeida konsidera UNTL lakon nia rekursu Diak Ida ne’ebe sempre konfronta maibe Nia hanoin no laran Diak
“Señor Abilio ema ida ne’ebe mak ninia hanoin diak, ninia ko’alia sai mai ne’e konfronta liu maibe Nia diak, kuandu nia atu mate nia sempre husu ha’u, iha 2019 nia moras tiha ona, nia obriga ha’u atu hanorin nafatin no senor Abilio ema ne’ebe hirus maibe nia mos bele rona hela labarik ki’ik oan ida hanesan ha’u”.
“Kuandu nia mai iha ne’e husu orariu atu hanorin, no orienta, Ha’u hatan maun, Ha’u Hakarak maun deskansa, nune’e maun nia moras bele diak lalais mak bele mai hanorin”. Tenik Dekanu Fakuldade Siénsia Sosiais Camilo Ximenes Almeida Liu husi Nia Diskursu iha Kampus FCS Kaikoli, 20/06/2023
Dekanu ne’e konsidera buat hotu ne’ebe halo diak ba Fakuldade ida ne’e no Universidade, hirak ne’e hotu hanesan memoria ida ne’ebe Saúdozu Abílio Amaral husik hela
“Buat Diak Hotu Ne’ebe Nia Halo sai Deit memória, ami sei la haluha no ami sei konta diak hotu ne’ebe husik hela mai ami. Ami fiar buat hotu ne’ebe todan ami labele karik ho ita bot nia tulun hirak ne’e hotu sei sai kmaan. Iha buat hotu ne’ebe ladun diak reprezenta kolega dosentes, funsionarius no estudantes, ami monu ain ba ita. Ba Fakuldade no Universidade nia susesu ami la haluha konta ho ita. Nune’e ami husu ba familia matebian, ami iha fakuldade karik iha ideia ruma bele mai hato’o”. Nia subliña
Iha Fatin hanesan, Reprezentante Diretór Siénsia Departamentu Administrasaun Públika Ananias Soares ho laran triste Agradese ba Matebean Abílio Amaral ne’ebe Halo dedikasaun, esforsu tinan naruk hodi forma no Prepara estudante Sira ba futuru
“Abilio Amaral, ba ita nia hamutuk durante tinan naruk ho susar, Dalaruma ita haree malu matan la mos no dalaruma kritika malu maibe, ita nia objetivu Ida deit katak nu’udar dosente, ita hotu koalia diak kona ba ita nia estudante eh oan sira nia futuru ne’ebe aban bain rua sira atu kaer ukun iha nasaun ida ne’e”.
“Ita nia esforsu hotu ne’ebe ita halo, iha tempu ne’ebé liu dadauk ita hotu nia hakarak oinsa Instituisaun UNTL, Departamentu Administrasaun Públika bele sai diak no kualidade, Ami hotu hakruk husu ita atu bele perdaun mai ami nia hahalok, ami nia liafuan, karik durante ita hamutuk la kona ba ita bot nia laran no hakanek ita nia fuan, maibe ohin loron ikus iha loron 20 fulan juñu tinan 2023 ita bot marka prezensa iha resintu FCS ho Kaisaun”.
“Ami reprezenta Departamentu Siénsia Administrasaun Públika atu tatoli deit liafuan ruma ba Professor Mestre Abilio Amaral, la’o diak ba, ita nia isin mak mate maibe ita nia klamar no ita nia espiritu, ita nia hahalok diak sira sei rai nafatin nu’udar memoria ba iha departamentu siensia administrasaun publika no estudante sira sei kaer nafatin ita nia espiritu atu nune’e lao ba oin hodi bele dezenvolve departamentu ne’e diak liu iha futuru”. Hatete Ananias Soares
Entretantu, Reprezentante Familia Marcelino Ximenes Magno lori maun nia naran hato’o deskulpa ba Dosentes, Funsionarius, Estudante no Alumni sira hotu iha FCS, ba ninia hahalok sira durante sei moris ne’ebé karik kroat ba sira
“Ami husu Deskulpa Karik durante Abílio Amaral sei moris iha Hahalok ruma ne’ebé ládiak ami husu deskulpa, ami hato’o mos agradese ba UNTL liu-liu ba Reitor no estrutura tomak ne’ebé horiseik ba vijita matebian iha nia residensia. Iha sesta feira molok matebian is kotu sei husu Dekanu iha ne’ebé no nia dehan (Ha’u Hadomi los Fakuldade Siénsia Sosiais), Ami husu nafatin ita hotu nia orasaun atu nia bele La’o ba ho diak”. Nia Hakotu
Enkuantu, Professor Matebean Abílio Amaral moris iha Lahane Oriental, Munisipiu Dili, iha Loron 25 Abril 1964, Hala’o nia Servisu Hanesan Dosente Iha Departamentu Siénsia Administrasaun Públika, Fakuldade Siénsia Sosiais, Universidade Nasionàl Timor Lorosa’e, Abílio Amaral Hakotu Iis iha Loron 19 Junhu 2023 tanba sofre moras Strock
BIOGRÁFIA SAUDOZU PROFESOR ABILIO AMARAL
Profesor Abilio Amaral, moris iha Díli, Lahane Oriental iha loron 25 fulan Abril 1964; Sai nudar Dosente permante iha Departamentu Siénsia Administrasaun Públika, Fakuldade Siénsia Sosiais, Universidade Nasionál Timor Lorosa’e iha Tinan 2006 ho Kategoria Profesionál: Leitólr Senior (C2), hela fatin Marabia Lahane Oriental. Profesor Abilio Amaral, oan mane mesak husi maun alin hamutuk na’in 4, feton na’in 3. Aman Antônio Soares (Falesidu) no Inan Domingas da Conceição (Falesida), Saudozu Abilio Amaral Kaben ho Señora Ana Paula da Cruz, Moris iha Díli/ Postu Nain Feto, Suku Santa Cruz, loron 3 Fulan Maiu 1971.
Profesor Abilio Amaral hahu ninia estudu iha Eskola Primaria Balide no kontinua SD Negeri 8 Díli iha tinan 1978 to’o 1979. Eskola Pre-Sekundária Kefamenanu, Nusa Tenggara Timur (NTT Indónezia). Hafoin kontinua estudu iha Ensinu Sekundáriu (SMA) Negeri No 39 Pulo Mas, Jakarta Timur Indonezia. Saudozu Abilio Amaral remata nia Estudu Lisensiatura iha Universitas Merdeka Malang Indonezia, área Espesialidade iha Siénsia Administrasaun Públika no konklui no konklui nia estudu iha tinan 1992. Iha tempu okupasaun Militar Indonezia nian saudozu Abilio Amaral servisu hanesan Funsionariu públiku iha Pemda Tingkat II Liquiça.
Hafoin Timor Uukun-An, iha tinan 2006 saudozu sai nudar Dosente iha Departamentu Siénsia Administrasaun Públika, Fakuldade Siénsia Sosiais UNTL ho Kategoria Profesionál; Leitór Senior (C2).
Profesor Abilio Amaral mos hala’o kna’ar no responsabilidade nudar: Vise Dekanu I Asuntu Akadémiku Universidade Orientál Timor Lorosa’e (UNITAL), iha tinan 2007;
Dekanu Fakuldade Siénsia Sosiais no Polítika UNITAL, iha tinan 2008-2008; vise Dekanu Asuntu Finansas Universidade da Paz (UNPAZ), iha tinan 2006.
Saudozu Abilio Amaral kontinua Estudu Mestradu iha area Siénsia Administrasan Públika, iha Universitas Gadjah Mada Indonezia no remata iha nia estudu iha tinan 2004. No Profesor Abilio Amaral mos hetan oportunidade husi Magnífiku Reitór Sesante Prof. DR. Aurelio Cristovão Guterres, hodi kontinua Programa Doutoramentu iha Universidade do Minho Poortugal, Infelizmente la konsege remata ninia estudu Doutoramentu nunee fila hilas mai Timor Leste hodi kontinua hala’o nia kna’ar nudar Manorin iha tinan 2014-2018.
Saudozu Profesór Abilio Amaral hahu hetan moras Strock Kmaan, no kontinua hala’o tratamentu ka terapia iha Ospital Nasionál Guido Valadares (HNGV Sigla Portugés) no nafatin ativu hala’o kna’ar nudar hanorin no orienta estudante sira. Saudozu la ativu hanorin hahu husi tinan 2019 to’o 2023 hodi hakotu ninia peregrinasaun iha mundu, iha loron 19 fulan Juñu 2023, tuku 01:00 Madrugada.
Jornalista: Marcela Mery da Costa