Imajem Komunikadu Imprensa Movimentu Tane Republika Demokratika Timor-Leste (MOTA-RDTL), iha rezidensia Assosisaun HAK kinta ( 24/ 02/ 2023).
SAPNewsTL, Dili: Movimentu Tane Republika Demokratika Timor-Leste (MOTA-RDTL) kestiona kompania UKA 2, tanba laiha kapasidade instala lina eletrisidade iha suku manelobas, Postu Adminitrativu Maubisse, Munisipiu Ainaro tanba ai riin eletrisidade uza deit au betu hodi dada fiu.
“Relasiona ho instalasaun lina eletrisidade iha Suku Manelobas, Postu Administrativu Maubisse, Munisipiu Ainaro ne’ebe kompania UKA 2 maka sai manan nain ba prozetu instala lina eletrisidade iha Suku refere, kompania servisu hahu husi 2022 to’o mai fulan fevereiru tinan 2023 maibe observasaun iha terenu ami nota katak kompania laiha kapasidade tekniku atu instala linha eletrisidade iha suku manelobas tanba ai-rin lina eletrisidade uza betu deit laos uza besi riin”, dehan portavoz MOTA-RDTL Marcos Teixereira ba jornalista liu konferensia imprensa iha rezidensia Assosisaun HAK kinta ( 24/ 02/ 2023).
Portavoz hatutan, Suku Manelobas kompostu husi lldeia haat ho total uma kain 350 husi aldeia haat ne’e, Aldeia Ernaro ho Hautei pratikamente kompanhia UKA lori hela risku boot ba komunidade sira iha aldeia rua refere tanba ho distansia kuaze kilomentru haat aldeia rua ne’e la uza besi rin maibe tidin deit au betu hodi dada lina eletrisidade ba aldeia rua ne’e,
Marcos informa, sira husu diretor, kompana UKA 2 labele pratika manobra iha suku Manelobas, tanba komunidade sira suku refere laos sai instrumentu ba kompania buka lukru ne’ebe boot, kompania tenke lao tuir akordu ne’ebe asina ona ho autoridade lokal, organizasaun estudantil no juventude suku Manclobas katak sei aumenta tan besi rin 15 hodi dada lina eletrisidade ba komunidade.
Nia afirma tan, MOTA-RDTL hare’e katak Prezidente EDTL.EP kapasidade seidauk to’o hodi lidera, EDTL, E. P, tanba ne’e pratikamente iha terenu EDTL, E.P rasik lahatene no oinsa atu halo intervensaun, tan ne’e sira husu ba parlamentu nasional atu halo fiskalizasaun direita iha suku Manelobas hodi haree difikuldades ne’ebe komunidade suku Manelobas infrenta ba lina eletrisidade no husu ba orgaun ezekutivu nasaun RDTL bainhira nomeia rekursu sira atu kaer instituisaun governu nian tenke hare ema ne’ebe iha kapasidade, selae bele akontese nafatin hanesan Prezidente EDTL.EP ho diretor, kompania UKA 2.
Enkuantu, to’o notisia ne’e fo sai, SAP News TL tenta atu halo komfirmasaun ho Kompanha UKA 2 maibe seidauk konsege, nune’e SAP News TL sei kontinua esforsu hodi buka parte relevante sira hodi fo klarifika iha tempu badak
Jornalista : Antonio Tilman