Violénsia La’os Solusaun Ba Problema ! Lu Olo Konsidera Governu Halo Liu Ona
Imajem : Prezidente Partidu FRETILIN Francisco Guterres Lu Olo hamutuk ho Marí Bin Amude Alkatiri iha Comité Central FRETILIN FRETILIN (CCF) Fatuhada, 31/08/2024. Foto Conzita Mota
SAPNewsTL, Díli : Ligadu ho Ekipa Jestaun Merkadu hala’o kontrolu iha Merkadu Kampung-Baru hodi rezulta asaun violentu no hakanek negosiante sira, Eis Prezidente Repúblika Francisco Guterres Lu Olo husu Primeiru Ministru Xanana Gusmão hodi ukun povu ho respeitu no dignidade tanba violénsia la’os solusaun ba problema.
Relasiona ho ekipa jestaun hadau produtu negosiante sira nian hodi tula ho karreta no estraga produtu ne’ebé komunidade sira fa’an hodi negosiante sira lamenta no tuku malu ho sira, ikus mai negosiante balun sai kanek no vítima ba akontesimentu iha loron 23 Outubru 2024.
Eis Prezidente Repúblika Francisco Guterres Lu Olo konsidera IX Gocernu Konstituisionál ne’ebé lidera hosi Primeiru Ministru Kay Rala Xanana Gusmão hatudu frakeza kaer ukun.
“Sr. PM Xanana Gusmão ! Povu hili ita boot sira atu ukun Povo tuir lei no direitu, Saida mak ita bot nia subalternos sira halo ba vendedores sira hatudu ita boot nia frakeza kaer ukun”. Hakerek Eis PR-RDTL Francisco Guterres Lu Olo liu hosi nia Pajina Ofisial Francisco Guterres Lu Olo iha Dili, 25/10/2024.
Prezidente Partidu FRETILIN ne’e husu Primeiru Ministru Xanana Gusmão hodi ukun povu ho respeitu no dignidade.
“Violência laos solução ba problemas, nem dalan ba solução! Maibé ita bot nia governo halo liu tiha ona ho folin ida ne’ebé moruk liu hotu-hotu iha Timor-Leste, espera katak ita boot ukun ema no rai ho respeitu no ho dignidade”. Lu Olo sita
Fo hanoin fali katak, ekipa jestaun merkadu munisípiu Dili hala’o intervensaun ba negosiante sira iha area kampung-baru (23)10/2024), iha ne’ebé hadau negosiante sira nia sasan hodi tula ho karreta, halo negosiante sira lamenta no tuku malu ho ekipa jestaun sira ne’ebé hadau sira nia sasan.
Durante intervensaun, mosu aktu brutalismu hodi rezulta tuku malu entre ekipa jestaun merkadu no negosiante mane sira, iha momentu ne’ebé tuku malu mosu liafuan hosi mane ida dehan, ”Baku…….Baku Deit”, wainhira ema ida halo video ba akontesimentu refere, inan feton ida halai mai dehan, “Jornalista Ka, Lae, Taka Tiha Kamera”, sidadaun refere taka duni kamera. Situasaun ne’e akontese iha Kampung-Baru, Suku Comoro, Dili, 23/10/2024. (Oras Loraik, haleu oras 18:00) SAPNews Screenshot
Wainhira negosiante no ekipa jestaun merkadu tuku malu hela, inan feton ida uza ho kamizola mutin no lipa ida halai ba mai hodi halo intervensaun no hapara, maibe hetok sira tuku no tebe negosiante mane ne’ebé tuku malu ho sira. Iha ne’ebé sama negosiante refere ba rai wainhira nia latan ona iha estrada.
Durante halo intervensaun no kontrolu, Membru Ekipa Jestaun Merkadu sira uza sapeu no hena metan hodi taka tomak nia oin, difikulta atu kunhese sira nia identidade pessoal.
Iha fatin ne’e, iha mós Membru Polísia Nasionál Timor-Leste (PNTL) ne’ebé akompanha ho ekipa jestaun merkadu, halo mós intervensaun hodi hakalma situasaun iha fatin akontesimentu.
Durante intervensaun, produtu komunidade nian barak hetan estragus hanesan tomante, repollu, modo tahan sira inklui meza ne’ebé negosiante sira uza hodi fa’an sasan no kadeira ne’ebé negosiante sira tur hodi hein sira nia produtu.
Antes ne’e, iha fulan hirak ba kotuk, molok Santu Padre Papa Francisco halo visita mai Timor-Leste, mosu mós akontesimentu ne’ebé baku negosiante, sobu sasan fa’an na’in sira no halo labarik ida tanis hakilar tanba haree aktu sira hosi ekipa jestaun merkadu ne’ebé lidera hosi Sekretáriu Estadu Asuntu Toponomia no Organizasaun Urbanu (SEATOU) Germano Santa Dias Brites.
Enkuantu, vítima Jeca Borgues Barreto ne’ebé hetan tiru hosi Polísia hetan ona tratamentu iha Hospitál Nasionál Guido Valadares (HNGV) Dili.
Jornalista : Marciana da Conceição