Imajem : Papa Francisco hamutuk ho labarik sira iha Koléjiu Irmã Alma Pantai-Kelapa, 10/09/2024.
SAPNewsTL, Dili – Durante vizita Santu Padre Papa Francisco iha Koléjiu Irmã Alma Pantai-Kelapa, Papa Francisco hateten husik Maromak mak tau matan ba ita no aprende husi ema seluk nia tau matan tanba sira mak ita nia mestre
Wainhira vizita Koléjiu Irmã Alma ne’ebé halibur labarik no ema ho defisiénsia sira iha Tersa feira, loron 10 fulan Setembru tinan 2024, Papa Francisco fo agradese ba Madre sira tanba bele tau matan ba labarik no ema ho defisiénsia sira.
Xefe Estadu Vatinaku ne’e haktuir Jesus dehan ba hamutuk ho nia, maibe Jesus la dehan ba povu atu hamutuk tanba hetan ona baptizmu, krisma, kazamentu, la bosok no la na’ok, signifika ema hotu ne’ebé moris ne’e halo salan no Jesus konvida ema hotu atu ba hamutuk ho nia.
“Iha buat ida ne’ebé halo ha’u hanoin nafatin. Bainhira Jezús ko’alia kona-ba juizu ikus, nia dehan ba ema balun: “Mai hamutuk ho ha’u”, maibé nia la dehan: “Mai hamutuk ho ha’u tan imi sarani ona, tan imi simu ona Krisma, tan imi kaben ona iha Kreda, tan imi la bosok, tan imi la na’ok”. Lae, nia dehan; “Mai hamutuk ho ha’u tan imi tau matan mai ha’u”. Tenik Santu Pasre Papa Francisco iha Koléjiu Irmá Alma Pantai-Kelapa, Dili, 10/09/2024.
Papa Francisco hatutan, Jezús dehan: “Mai hamutuk ho ha’u tan imi tau matan mai ha’u bainhira ha’u hamlaha, no imi fó han mai ha’u, bainhira ha’u hamlaha, imi fó bee mai ha’u, bainhira ha’u moras, imi vizita ha’u”, no ba tan oin.
Amu Papa Francisco hakarak domin ne’ebé bele enkoraja, hari’i no hametin iha fiar sarani ida-idak nian.
“Ha’u hanaran ne’e sakramentu ema ki’ak nian. Domin ne’ebé enkoraja, hari’i, hametin. Buat ne’ebé ita hetan iha ne’e maka domin. Domin la iha karik, ida ne’e la iha sentidu. Nune’e mak ita komprende Jezús nia domin. Nia saran nia moris tan ita. Ita la bele komprende Jezús nia domin bainhira ita la hahú hadomi”.
Papa Francisco hateten fahe ita nia moris ba ema ne’ebé presiza liu mak programa ida ba ema hotu-hotu. Agradese ba Madre sira ne’ebé halibur labarik sira iha kokéjiu.
“Fahe ita-nia moris ho sira ne’ebé prezisa liu mak programa ida, programa ida ba imi, no programa ida ba sarani idaidak. Ha’u hakarak fó agradese ba imi ba buat ne’ebé imi halo daudaun no ha’u hakarak fó agradese mós ba labarik mane no feto sira ne’ebé ko’alia ho ami kona-ba husik ema tau matan ba sira”. Papa Francisco hateten
Santu Padre hatutan, “Sira hanorin ita atu husik Maromak tau matan mai ita. Husik Maromak tau matan mai ita no la’os ho númeru naran deit idea, planu ka hanoin arbiru sira. Husik Maromak tau matan mai ita. Labarik sira ne’e mak ita-nia mestre sira. Obrigadu ba imi tan ida ne’e”.
“Ha’u haree labarik ne’e, nia naran sa? Silvano. Lori nia mai. Silvano hanorin ita saida? Nia hanoin ita atu hanoin (iha pre-okupasaun – peduli). Hodi tau matan ba nia, ita aprende atu hanoin maluk sira. Haree nia oin bá: nia kalma, ho pasiénsia, toba hakmatek. Hanesan nia husik ema tau matan ba nia, ita mós prezisa aprende atu husik ema seluk tau matan mai ita”.
Lider Mundial Igreza Katólika ne’e sublinha Maromak hadomi tebtebes umanidade sira, tanba ne’e nia sempre tau matan ba nia emar sira, imi tenki tau matan ba labarik sira iha Koléjiu Alma, Maromak sei tau matan fali ba imi.
“Husik Maromak tau matan mai ita, Maromak ne’ebé hadomi ita tebtebes, husik Na’in Feto tau matan mai ita. Nia ita-nia Inan. Ohin, mai ita reza Ave Maria ba Na’in Feto, no ha’u sei fó bensa ba imi. [Ave Maria no bensa. Bensa hotu tiha] Keta haluha, keta haluha katak ita tenke aprende husik ema tau matan mai ita, ita hotu, hanesan sira ne’e husik ema tau matan ba sira. Obrigadu.”
Hafoin hato’o mensagem ba sira no fahe prezente ba madres, labarik sira, defisiénsia sira no ema voluntáriu sira, Santu Padre kontinua husu ema hotu atu tau atensaun ba labarik sira hanesan Saun José tau matan ba Na’in Feto, Na’in Feto tau matan ba Jesus no Jesus tau matan ba emar sira.
“Ne’e mak presente ne’ebé ha’u husik ba uma ne’e. Fó atensaun bá, Saun José tau matan ba Na’in Feto, no Na’in Feto tau matan ba Jezús. Ida ne’ebé importante liu mak ida ne’ebé uluk liu husik ema tau matan ba Jezús. Nia husik Maria no José tau matan ba nia”. Nia tatoli
Observsaun SAPNews iha terrenu nota katak, iha dader san nakukun, molok Santu Padre to’o iha Pantai-Kelapa, sarani sira forma naruk no nakonu iha luron ninin hodi hein ho laran ksolok no simu ho felisidade no haklalak.
Wainhira Santu Padre to’o iha Koléjiu Irmã Alma, Labarik sira, ema ho defisiénsia, sarani sira barak hetan bensaun direta husi Santu Padre Papa Francisco liu hosi rein liman, simu tersu, simu stiker, no simu rebusadu.
Jornalista : Marciana da Conceição