Imajem : Sekretáriu Jeral Partidu FRETILIN Marí Alkatiri hala’o vizita ba mortuáriu HNGV Bidau, 03/03/2025
SAPNewsTL, Dili : Iha ámbitu loron veteranu, Sekretáriu Jeral Partidu FRETILIN Marí Alkatiri hala’o vizita ida ba Hospital Nacional Guido Valadares (HNGV) hodi haree situasaun jeral iha HNGV.
Durante observasaun ba infraestrutura Mortuáriu iha HNGV, Mari Alkatiri konsidera restu mortais balun iha mortuáriu kahur malu no laiha kondisaun.
“Ohin haree iha kaza mortuária, ha’u haree katak kahur malu sasan barak demais, ema mate baibain liu ba ne’eba lori ba uma, ema balun lori ba FORENSIK no restu mortais balun iha ne’eba hodi halo identifikasaun DNA maibe laiha kondisaun, ida ne’e ita tenki haree didiak”.
Eis Primeiru Ministru ne’e kestiona tanba Restu Mortais sira la tau iha fatin ne’ebe dignu.
“Ohin ha’u mai vizita ospitál tanba ohin loron veteranu, restu mortais ne’e tenki tau iha fatin dignu, labele hanesan buat ida ke laiha valor, ohin loron herois nian ita tenki haree ba ida ne’e, ita tenki hadia”. Nia husu
Enkuantu, Restu Mortais ne’ebe oras ne’e iha Mortuáriu HNGV maka Saudozu Jose da Costa “Mauhudu”, Saudozu David Alex “Daitula” no sira seluk tan hamutuk sanulu resin, entre sira restu mortal balun hatur hela iha armáriu leten.
Ligadu ho asuntu hirak ne’e, SAPNews tenta halo komfirmasaun ho Diretor Hospital Nacional Guido Valadares (HNGV) maibe diretor refere laiha fatin.
Jornalista : Marciana da Conceição