Imajem : Prezisente Mídia SAPNews Ermelinda Soares iha Dili,09/09/2024.
SAPNewsTL, Dili – Relasiona ho Sua Santidade Papa Francisco nia vizita mai Timor-Leste iha loron 9-11 Setembru, Prezidente SAPNews Ermelinda Soares konsidera ne’e momentu osan-mean no istóriku ne’ebé presiza aproveita hodi marka ida-idak nia istória.
Iha tinan 1989, Santu Padre João Paulo II vizita Timor-Leste ho lema ‘imi masin rai nian no naroman mundu nian’, liu tiha tinan tolunulu resin-lima (35), Papa Francisco halo vizita pastoral ho eslogaun ‘Atu Imi Nia Fiar Sai Imi Nia Kultura’ nu’udar tema sentral.
Liafuan save husi tema sentral ne’e maka fiar no kultura, fiar hanesan buat abstratu ne’ebé labele haree ho matan no kaer ho liman, maibe fiar ne’e bele expresa hosi hanoin, orasaun, hahalok no toman ema nian. Kultura mak ábitu ne’ebé sosiedade hatudu hosi atetude no prátika iha família, igreza no nasaun.
Prezidente SAPNews Ermelinda Soares hateten, vizita apostólika Papa Francisco nu’udar momentu osan-mean no momentu istóriku ne’ebé ema hotu presiza aproveita hodi marka ida-idak nia istória.
“Vizita ne’e tempu osan mean no momentu istóriku ne’ebé ita presiza atu aproveita, aproveita ho aprende, reza, haksolok, sai domin na’in, fiar na’in, rona na’in ne’ebé diak, hatene foti respondabilidade no hakat hasoru dejafiu luta nian iha moris ne’e”. Tenik Prezidente SAPNews Ermelinda Soares iha Dili,09/09/2024
Tuir biblia, Saun Tiagu haktuir, ‘fiar moris ho nia hahalok, fiar sai lolos ho hahalok moos, Abrão fiar ida ne’e nu’udar Maromak nia justisa’(Tiago 3:22-23). Fiar ne’ebe la ho hahalok, fiar ne’e mate, enkuantu hahalok ne’ebe la ho fiar, hahalok ne’e la folin.
Lideransa SAPNews ne’e dehan, Fiar ne’e konkretiza liu hosi hatudu dalan, serví ho domin, karidade no moris ho unidade iha diversidade, la haree kor, ras, relijiaun, etnia no grupu ka partidu.
“Ita hotu presiza aproveita momentu istóriku ne’e hodi hatur valor fraternisade, unidade, onestidade, responsabilidade, laran diak, laran kmaus, laran loos, haraik an sai kultura ita nian nian hodi servi ho domin, promove família unidade hodi serví sosiedade Timoroan”. Ermelinda Sublinha
Lider Foinsa’e ne’e akresenta, Santu Padre nia visita ho vizaun hametin fiar katóliku, promove unidade nasionál, inspira ema hotu halo nia fiar sai kultura damen, amizade, fraternidade, solidariedade, karidade, toleránsia, halakon violénia, diskriminasaun, explorasaun, exploitasaun, korupsaun, koluzaun, nepotismu no injustisa sosial iha mundu.
“Vizita ne’e bele sai motivasaun boot ba sarani no sidadaun hotu, ita bele marka ita nia istória, istória ne’ebe la sei repete iha moris ne’e, tan ne’e ita bele promove unidade nasionál, toleránsia, halakon violénsia, diskriminasaun, explorasaun, korupsaun, nepotismu, koluzaun no injustisa sosial iha Timor-Leste”. Lideransa SAPNews ne’e fundamenta
Ligadu vizita Papa Francisco, Prezidente SAPNews afirma media SAPNews sei foku ba kobertura durante loron hodi haklalen ba públiku esénsia husi vizita ne’e, haklaken povu nia lian no prezerva memoria furak ne’e liu hosi média.
“Ami sei halo kobertura ba vizita Papa Francisco, ami sei buka haklaken esénsia husi vizita apostólika ne’e, mensagem Amu Papa nian ba públiku, hatutan sarani sira nia lian no prezerva memoria furak ne’e liu hosi halo kobertura”.Ermelinda Soares afirma
Ermelinda Soares dezeja katak vizita apostólika Papa Francisco ne’e bele fanun no motiva ema hotu hodi moris iha fiar no hahalok ne’ebé loos sai kultura ba unidade familiar, servi malu, laran metin ba Maromak, tulun komunidade no moris ho toleránsia, fraternidade humana iha família, institusaun no nasaun.
Breaking : Fatin Misa Tasi-Tolu Preparadu Ba Peregrinu 164,777, Sarani La Registu Bele Partisipa
SAP News TL Dili : Relasiona ho misa boot ne’ebe sei prezide hosi Santu Padre Papa Francisco iha Tasi-Tolu, Observasaun Jornalista SAPNews iha terrenu nota katak fatin ba sarani kada munisípiu preparadu.
Ligadu ho misa solenidade ne’ebe sei hala’o iha loron 10 Fulan Setembru (Tuku 4 Loraik), tuir observasaun SAPNews iha terrenu nota katak fatin ba peregrinu kada munisípiu preparadu.
Ekipa litúrjika ba misa Tasi-Tolu mós hala’o ona ensaiu no preparadu ona hodi hananu ba misa ne’ebe sei prezide husi Papa Francisco.
Ekipa seguransa ba misa iha Tasi-Tolu mós hala’o ona gladi no preparadu ona hodi asegura seguransa ba peregrinu sora hotu durante misa iha ne’ebá. Ekipa seguransa ne’e kompostu hosi F-FDTL, PNTL, Grupu Kategorial Igreza nia hanesan THS-THM, Soldadu Ba Kristu, no Eskuteirus Timor-Leste.
Fo hanoin fali katak, ligadu ho misa solenidade ne’ebe sei hala’o iha loron 10 Fulan Setembru (Tuku 4 Loraik), tuir observasaun SAPNews iha terrenu nota katak fatin ba peregrinu kada munisípiu preparadu.
Ekipa litúrjika ba misa Tasi-Tolu mós hala’o ona ensaiu no preparadu ona hodi hananu ba misa ne’ebe sei prezide husi Papa Francisco.
Antes ne’e, Sekretaria Estadu Komunikasaun Sosial Espedito Dias Ximenes informa komisaun registu ona peregrinu hamutuk rihun atus ida neenulu resin-haat, atus hitu hitunulu resin-hitu (164.777) husi munisípiu sanulu resin-haat (14).
“Peregrinu ne’ebe registu ona hamutuk 164.777, kompostu hosi Munisípiu Lautém hamutuk 5.503, Baukau hamutuk 13.702, Viqueque hamutuk 6.530, Manufahi hamutuk 3.850, Aileu hamutuk 7.500, Bobonaru hamutuk 7.805, Ermera hamutuk 14.330, Manatutu hamutuk 7.841, Likisa hamutuk 12.400, Ainaru hamutuk 9.322, Covalima hamutuk 4.356, Dili hamutuk 67.994, Atauro hamutuk 1.300 no Rejiaun Administrativa Espesial Oe-Cusse Ambeno (RAEOA) hamutuk 2.344”. Tenik Sekretaria Estadu Komunikasaun Sosial Espedito Dias Ximenes ba Jornalista sira iha Nunsiatura Apostólika Motael Dili,03/09/2024
Sekretariu Estadu ne’e hatutan, total rejistradu misa Tasi-Tolu ne’e seidauk konta ho sira ne’ebe hahú rejistu iha loron 1-3 Fulan Setembru inklui peregrinu hirak ne’ebe mai hosi rai-liur.
Tuir observasaun SAP News TL iha terrenu nota mós katak fatin públiku sira iha kapitál Dili hahú dada Bandeira Timor-Leste no Vatikanu, pinta ona moru públiku sira ho kor oioin, monta ona imagem no Banner Santu Padre Papa Francisco nian iha dalan públiku, ekipa bombeirus mós fase ona estrada públiku iha Rotunda Nicolau Lobato ba Tasi-Tolu..
Ikus liu, Papa Francisco sei konklui nia vizita iha azia pasífiku iha Singapura husi loron 11-13 Fulan setembru hafoin fila fali ba Vatikanu.
Fo hanoin fali katak fatin neen ne’ebe Sua Santidade Papa Francisco sei halo vizita iha Timor-Leste maka Nunsiatura Motael, Palásiu Prezidensial Nicolau Lobato, Orfanatu Madre Alma iha Pantai-Kelapa, Igreza Catedral Metropolita de Dili, Tasi-Tolu, no Centro Concenções de Dili (CCD).
Jornalista : Dircia Baptista Belo