Imajem Deputada Elvina de Sousa
SAPNewsTL, Dili: Deputada Bankada PD Elvina de Sousa husu Parlamentu Nasional (PN) halo investigasaun ba rekrutamentu professor sira iha Ministeriu Edukasaun Juventude no Desportu (MEJD) tanba profesor barak hasoru situasaun defisil tebes tanba hasoru injustisa.
“Ha’u husu Parlamentu Nasional bele halo inkeritu parlamentar ba prosesu ida ne,e hodi halo investigasaun ba rekrutamentu professor sira iha MEJD tanba ministeiru la valoriza kontribuisaun husi profesor sira halo dedikasaun iha tempu naruk nia laran, maibe iha prosesu rekrutamentu sira nia naran la sai no sira ne’ebe asina kontratu ne’e barak liu nunka tama hanorin iha eskola no balun tama eskola mos lalos”, deputada Elvina de Sousa ba jornalista sira iha iha Parlamentu Nasional Dili.
Deputada hatutan, prosesu sira ne’e parlamentu nasional bele haree akontese laos iha munisipiu ida deit maibe akontese kuaze iha teritorio laran tomak, semana kotuk hasoru profesora kontratadu sira balun hatete iha duni resintu PN profesora ida hatete nia halo dedikasaun ba eskola ne’e, husi voluntario nia fuuk seidauk mutin, maibe agora nia fuk mutin ona, nia alunu sira mos sai profesor hotu ona, maibe nia naran laiha.
Nia Informa, iha profesor voluntariu balun maka hela iha fatin dok ka area rural fo dedikasaun durante ne’e ho esperansa ida katak sai profesores kontratadu ba permanenti maibe naran la iha ida maibe sira dehan sei la lakon esperansa sira sei nafatin hanorin tanba ne’e sira nia vokasaun, maibe situasaun ne’e MEJD tenki hare’e ho seriu, husu maluk sira bele ba halo keisa tanba ne’e la justu tanba la fo oportunidade ba ema ne’ebe fo sira nia kontribuisaun ba prosesu aprendizagen no mos ba dezenvolvimentu edukasaun ba iha eskola refere, ida ne’e seriu PN prezisa enkeritu parlametar no mos Husu halo investigasaun ba prosesu tomak.
Iha fatin hanesan Ministro Asuntos Parlamentar Kominikasaun Sosial(MAPKOMS) Francisco Jeronimo hatete, vaga 2100 deit tan ne’e profesor voluntariu sira hamutuk 5000 resin tan sira tenki kompete laos professor sira ne’e atu hetan kontratu hotu
“Relasaun ho profesor sira, ita hanoin parlamentu ida ne’e halo esplikasaun dala barak ona, ita iha profesor voluntariu 5000 resin maibe iha vaga 2100 tanba ne’e profesor voluntariu tenki kompete ba vaga ne’e laos profesor sira hotu tenki hetan kontratu”, tenik Francisco
Francisco afirma, prosesu atu hetan profesor kontratadu bazeia ba kriteira tempu serbisu, meritu ba abitasaun literaria, lei bazika hatete ona katak atu sai profesore ba eskola bazika, ne’ebe sekundaria mininu klasifikasaun baixarelatu no lisensatura, kriteriu sira estabelese ona tan ne’e atu husu deit ba profesor sira katak la hetan kontratu prezisa aprezenta dadus konkretu kriteriu estabelese ne profesor sira prense ka lae.
Nia fundamenta tan, hakarak atu rezolve problema selesaun la tuir dalan iha inisiu governu nakloke husu atu aprezenta dadus ba ministeiru atu nune’e liu husi inspetor ministru nian halo investigasaun ka ba husu informasaun atu bele mai sai baze ba governu hodi foti desizaun los tuir realidade iha terenu, profesor ne’ebe iha lista hetan kontratu fo sai iha jornal republika hamutuk nain-1800.
Jornalista : Ermelinda Soares & Anina Martins