Imajem : Sekretáriu Jeral Organizasaun Nasoins Unidas, Antonio Guterres, iha Estadium Munisipal Dili, 30/08/2024. Foto : Conzita Mota
SAPNewsTL, Dili : Durante komemora loron konsulta popular ba dala XXV, Sekretáriu Jeral Organizasaun Nasoins Unidas, Antonio Guterres konsidera rezisténsia Timorense nunka deziste tanba prinsípiu Xanana Gusmão ne’ebe reziste para manan.
“Timor-Leste hasoru poder armas, hasoru bombardeamentu, destruisaun, hetan prizaun, maibe tanba ho rezisténsia timorense nunka desiste, resisténsia timorense ho prinsípiu Xanana Gusmão nia prinsípiu resistir para vencer, resisténsia timoroan garante duni to’o finalmente hetan liberdade no direitu”.Tenik Sekretáriu Jeral Organizasaun Nasoins Unidas, Antonio Guterres liu hosi diskursu iha Estadium Munisipal Dili, 30/08/2024
Sekretáriu Jeral Organizasaun Nasoins Unidas, akresenta Xanana Gusmão nia lideransa la’os deit lidera povu ba ukun an maibe lidera povu to’o dalan demokrátiku, rekonsiliasaun entre timoroan no timoroan ho indonéziu sira.
“Xanana Gusmão lider ne’ebe kombatente iha batalla, konsistente iha kadeia, lider ne’ebe lidera povu Timor-Leste, la’os deit lidera povu ba independénsia maibé to’o iha dalan ba estadu demokrátiku, dalan ba rekonsiliasaun entre Timoroan no Timoroan ho Indonésia”.Nia deklara
Eis Primeiru Ministru Portugal ne’e haktuir, José Ramos Horta ne’ebe halo komunikasaun ho país hotu-hotu no lider hot-hotu hodi hato’o direitu Timor-Leste nian kona-ba ukun rasik an, ikus mai konvense duni komunidade internasionál.
“Ha’u labele haluha mós servisu barak mak halo nu’udar Primeiru Ministru Portugal ne’ebe konvense no presiza garante direitu internasionál, presiza respeita alta determinasaun povu Timor-Leste, lahaluha ha’u hasoru Ramos Horta ne’ebe ko’alia ho nasaun no lider hotu-hotu hodi dehan ba sira hotu kona ba direitu Timoroan ba ukun rasik an, finalmente possivel konvense komunidade internasional.” Sekretáriu Jeral Organizasaun Nasoins Unidas, Antonio Guterres hateten
Antonio Guterres admira ho faktu ne’ebe hatudu katak Timor-Leste sai nasaun demokrátiku no ezemplar, respeitu ba direitu umanu no halo parseria extremamente ho komunidade internasionál no sai país fundador G7+.
“Ha’u nia admirasaun profundu, ho faktu ne’ebe transforma Timor-Leste sai país demokrátiku no ezemplar, profundu respeitu ba direitu umanu no iha parseiru extremamentu ho komunidade internasionál, Membru Comunidade dos Países da Lingua Portugueza (CPLP), País Fundador G7+, hola parte iha organizasaun mundial altu komérsiu no sei adere ba ASEAN”.Nia dehan
António Guterres salienta, Timor-Leste enfrenta dejafiu boot ba seguransa alimentar, kualidade edukasaun no saúde, inklui apoia solidariedade internasionál ne’ebe la sufisiente ba batalla dezenvolvimentu nasionál.
“Timor-Leste hasoru dejafiu boot, garante ninia sidadaun ba seguransa alimentar, kualidade edukasaun, saúde kualidade no asuntu sira seluk tan ne’ebe infelismente solidariedade internasionál la sufisiente, hakarak solidariedade internasionál ne’ebe forte hodi apoia Timor-Leste ne’ebe bele manan batalla ukun rasik an, demokrasia no mós dezenvolvimentu”.Nia sublinha
Iha fatin hanesan, Primeiru Ministru Kayrala Xanana Gusmão deklara povu mak halo funu, povu mak hamrik, povu mak heroi tanba povu manan funu.
“Povu mak halo funu, povu mak heroi, tanba povu ne’e mak manan ukun an, viva povu Timor-Leste”. Xanana Deklara
Primeiru Ministru ne’e husu ba joven sira atu muda hanoin, mentalidade, kapasidade, no hahalok hodi prepara no hadia an beibeik hodi labele deit nia amigu maibe serví povu no nasaun ne’e tanba povu mak manan funu.
“Prepara an no prepara an, muda imi hanoin, mental, karater, kapasidade, labele hatene servi amigu deit, maibe servi rai ne’e, servi povu ne;, tanba povu ne’e mak manan ukun an. Ita sei presiza esforsu barak,barak teb-tebes hodi lori rai ne’e ba oin, maske ita frajil maibe ita la’os estadu falladu”. Primeiru Ministru hateten
Primeiru Ministru RDTL ne’e mós fo agradese ba komunidade no solidariedade internasional ne’ebe durante tempu resisténsia luta no apoia Timor-Leste independénsia to’o konkista mehi ukun rasik an.
“Agradese ba solidariedade internasionál tanba ho sira apoia ita bele hetan ukun rasik an”. PM Xanana fo agradese
Serimónia Solene Komemora Loron Referendumba dala ruanulu resin-lima (XXV) ne’e ho tema “Povu Mak Funu, Povu Mak Terus, Povu Mak Manan Funu no Povu Mak Heroi Boot Ba Ukun Rasik An”.
Eventu Nasionál ne’e hetan mós partisipa hosi Sekretáriu Jeral Organizasaun Nasoins Unidas, António Guterres, Xefe Misaun UNAMET iha Timor-Leste Ian Martim, Vise Primeiru Ministru Austrália, Vise Primeiru Ministru no Ministru Dezenvolvimentu Rural no Rejional Malaysia, Prezidente Repúblika José Ramos Horta, Primeiru Ministru Kayrala Xanana Gusmão, Prezidente Parlamentu Nasionál Maria Fenanda Lay, Prezidente Tribunal Rekursu Deolindo dos Santos.
Serimónia ne’e partisipa mós husi membru Governu Dasia, membru Parlamentu Nasionál, Prezidente Partidu FRETILIN Francisco Guterres Luolo, Sekretáriu Jeral FRETILIN Marí Bin Amude Alkatiri, Tenente Jeral Falur Rate Laek, Jeneral Lere Anan Timur, konvidadu internasionál, nasionál no povu Timor-Leste.
Jornalista : Conzita Mota & Dircia Baptista Belo