𝗟𝘂 𝗢𝗹𝗼 : “𝗠𝗮𝗻𝗶𝗳𝗲𝘀𝘁𝗮𝘀𝗮𝘂𝗻 𝗡𝗲’𝗲 𝗗𝗶𝗿𝗲𝗶𝘁𝘂, 𝗟𝗮 𝗣𝗿𝗲𝘀𝗶𝘇𝗮 𝗛𝘂𝘀𝘂 𝗔𝘂𝘁𝗼𝗿𝗶𝘇𝗮𝘀𝗮𝘂𝗻 𝗕𝗮 𝗣𝗡𝗧𝗟”

Imajem : Liderança Partidu FRETILIN hala’o Konferénsia Imprensa iha CCF Fatuhada, 11/09/2025.

SAPNewsTL, Díli : Presidente Partidu FRETILIN Francisco Guterres Lu Olo argumenta atu halo manifestasaun la presiza husu autorizasaun ba PNTL tanba ne’e direitu no liberdade tuir lei.

𝐌𝐚𝐫𝐜𝐢𝐚𝐧𝐚 𝐝𝐚 𝐂𝐨𝐧𝐜𝐞𝐢çã𝐨 – SAP News TL

“Informasaun dehan katak polísia sira la autoriza manifestante sira atu halo manifestasaun, manifestasaun ne’e ema nia direitu no liberdade hodi hato’o ema nia aspirasaun ba orgaun soberania sira liu hosi reklamasaun, petisaun no manifestasaun”.

“Kuandu atu halo manifestasaun ne’e sidadaun sira la presiza ba husu autorizasaun PNTL, autoriza lai mak halo, lae, lei manifestasaun la hateten hanesan ne’e”. Hateten Presidente Partidu FRETILIN Francisco Guterres Lu Olo durante hala’o konferénsia imprensa hodi halo reflesaun kona-ba Disolusaun ASDT-FRETILIN ba dala 51° iha CCF Fatuhada, 11/09/2025

Eis Presidente Repúblika ne’e husu ba manifestante sira hodi hato’o ninia ezijensia ne’ebé los, nune’e orgaun soberania sira bele rona povu nia aspirasaun.

“Manifestasaun pasífiku, sira-nia ezijensia ne’e mak tenki los, ita ko’alia lolos saida mak ita-nia aspirasaun ba orgaun soberania sira atu rona”.

Lu Olo sublinha, “Deputadu halo lei, fiskalizasaun no halo desizaun polítika, bele sosa transporte ba orgaun Parlamentu Nasional la’os ba deputadu individualmente, problema ne’e mak tenki iha jestaun ba karreta”.

Iha fatin hanesan, Presidente Bankada FRETILIN Aniceto Guterres hateten iha momentu halo debate no aprovasaun nia hato’o proposta hodi sosa deit karreta ba deputadu sira tanba karreta barak sei diak maibe maioria vota kontra proposta.

“Ami apresenta proposta atu hasai osan sosa karreta nian no ko’a osan ba viajem estranjeiru nian maibe sira vota kontra, to’o iha votasaun final global mos FRETILIN vota kontra”.

“Karreta balun sei diak, lolos labele troka, maibe atu dehan lolos osamentu ne’e aprova tiha ona, atu simu ka la simu, ami sei pronunsia la’os agora”. Nia sublinha

Antes ne’e, Porta voz Estudante Universitariu Timor-Leste (EUTL) Natalício Nunes informa audiênsia ho Komandu PNTL laiha konsensu kona ba fatin atu halo manifestasaun hasoru Parlamentu Nasionál (PN), kona-ba desizaun sosa kareta no lei pensaun vitalísia.

“Ami hatama ona karta, ami halo karta liu loron rua sira la fo resposta, signifika aseita ona ami-nia karta, maibe orseik sira kontaktu ami liu hosi telefone katak atu halo audiênsia, nune’e ohin ami ba halo enkontru ho PNTL”.

“Iha enkontru, sira la aseita atu uza fatin arredor UNTL iha PN oin, ami haree katak fatin ne’e mak estratéjiku atu halo manifestasaun, nune’e ohin ami la aseita desizaun PNTL, ami deside mantein uza fatin ne’ebé ami mensiona iha karta”. Hateten Porta voz EUTL Natalício Nunes ba Mídia Sapnews iha Kampus Sentral UNTL Dili, 10/09/2025.

Ligadu ho kestaun kapturasaun, Natalício deklara prontu simu dejafiu saida deit mak mosu iha loron 15 Setembru, “Ami sei assegura manifestasaun sira ho diak, garante paz, no estabilidade hodi kontra PN kona-ba desizaun sosa karreta ba deputadu sira”.

“Ami-nia karta vale ona atu halo manifestasaun, se sira halo kapturasaun ba ami la problema, sira mak viola regra, ami la viola regra, ami halo bazeia ba artigu 11, lei nú. 1/2006 no lei inan 42° kona ba liberdade reuniaun no manifestasaun”.

Bazeia ba konstitusiosaun RDTL artigu 42°, liberdade de reunião e de manifestação alinea 1 no 2 iha versaun portugês haktuir :

1. A todos é garantida a liberdade de reunião pacífica e sem armas, sem necessidade de autorização prévia.
2. A todos é reconhecido o direito de manifestação no termos da lei.

Natalício deklara manifestasaun ne’e sei la’o ho diak no laiha anarkizmu.

“Ami sei evita anarkizmu no asaun violentu, ami nia foku atu hapara lei pensaun mensal vitalísia, halakon lei distánsia 100 metru dook husi edifísiu ho públiku no hapara sosa karreta ba deputadu sira”. Nia afirma

Iha enkontru refere, PNTL fo tempu ba porta vos EUTL sira fila hodi halo koordenasaun aseita ona fatin ne’ebé PNTL autoriza iha Tasi-Tolu maka sira foin bele halo manifestasaun.

“Maibe sira la kumpri ida ne’e iha loron 15 fulan Setembru 2025, sira hakarak obriga aan halo manifestasaun iha resintu UNTL, autoridade seguransa PNTL sei halo atuasaun hasoru sira”. Sita média PNTL

Manifestasaun ne’ebé EUTL halo sei foku ba hapara lei pensaun mensal vitalísia, halakon lei distánsia 100 metru dook husi edifísiu ho públiku no hapara sosa karreta ba deputadu sira hodi investe ba setor produtivu sira hanesan edukasaun, saúde, agrikultura, ekonomia, turismu no infra-estrutura.

𝐅𝐨𝐭𝐨 : 𝐒𝐀𝐏𝐍𝐞𝐰𝐬 & 𝐌𝐞𝐝𝐢𝐚 𝐏𝐍𝐓𝐋

#EUTL #Dili #TL #PN #PNTL #TimorLeste #FRETILIN