Desmaia Iha Auditórium FCS, Dekanu FFCH Zetó Hakotu Iis Iha HNGV
Imagem : José António Lourenço da Costa
SAPNewsTL, Díli : Hafoin monu iha Auditórium Kampus Faculdade Ciência Sociais (FCS), Dekanu Interinu Faculdade Filosofia Ciência Humana (FFCH) José António Lourenço da Costa “Zetó” hakotu Iis iha Hospital Nacional Guido Valadares (HNGV).
Dekanu Interinu FFCH José António Lourenço da Costa hetan desmaia no monu iha Auditóriu Kampus Faculdade Ciência Sociais iha dader haleu tuku 9, loron 09 Abril tinan 2025.
Hafoin monu, funsionáriu sira no estudante sira ne’ebe presente iha fatin akontesimentu, lori ba karreta no transporta ba Hospital Nacional Guido Valadares hodi halo tratamentu maibe infelizmente la konsege salva nia vida, ikus mai hakotu iis iha oras meiu dia, haleu tuku sanulu resin rua.
José António Lourenço da Costa tama Universitas Timor Timur (UNTIM) iha tinan 1992, hafoin ramata nia estudu no sai dosente permanente iha Departamento Ciência Política, Faculdade Ciência Sociais Universidade Nacional Timor Lorosa’e (UNTL) durante ukun rasik an.
Iha tinan 2025, José António Lourenço da Costa simu konfiansa no assume responsabilidade nu’udar Dekanu Interinu Faculdade Filosofia Ciência Humana, Universidade Nacional Timor Lorosa’e.
Matebian José António Lourenço da Costa moris iha Bucoli, Postu Administrativu Baucau Villa, Munisípiu Baucau.
Maktoban Prof. Doutor José António, MA,SSi iha vida profisional termina nia Lisensiatura iha UNTIM, Mestradu iha Lisboa no Doutoradu iha Évora.
Durante nia vida profisionál nia okupa kargu hanesan Vise-Reitor, Diretór Centro Nacional Investigação Científica UNTL no kargu oioin.
Membru movimentu estudante kontra okupasaun, ativista organizasaun oioin no atividade seluk tan. Iha tinan 10 ikus maktoban fokus liu ba mundu investigasaun, hakerek livru, fo aulas no publikasoens.
To’o notisia ne’e publika SAPNews seidauk hatene kauza husi moras saida hodi rezulta José António Lourenço da Costa hakotu iis, notisia kompletu Mídia Sapnews sei kolleta no publika iha oras balun tuir.
Jornalista : Ermelinda Soares