Estudante Ativista AJAR Kestiona  Desizaun TDD La Adekuadu Ba Kazu Konsumu Droga

SAPNewsTL, Dili :  Relasiona ho kazu droga ne’ebe públiku preokupa, Estudante Aktivista Direitus Humanus (EADH) AJAR liu husi komunikadu imprensa hateten autoriedade judisiária tenki administra justisa ho responabilidade, independente no labele iha konspirasaun ruma wainhira iha tomada desizaun

 “Ami husi Estudante aktivista Direitus Humanus AJAR lamenta tebes ho desizaun husi Tribunal Distrital Dili ne‘ebé halo medida koasaun termu identidade rezidénsia no aprezentasaun periódika ba arguidu nain sia ne’ebé deskonfia komete kazu Droga tanba konsidera arguidu hirak ne’e konsumu de’it la’os trafikante ne’ebé aktividade ilisitu Droga”. Dehan Portavoz Ivonia da Cruz ba jornalista iha Formasaun HAK Farol Sexta-Feira,19/08/2022.

Estudante AJAR trizte no konsidera desizaun tribunal la adekuadu ba arguidu nain sia ne’ebe komete krime konsumu droga

“Ami Triste no preokupa ho desizaun Tribunal ne‘ebé aplika de’it artigu 12⁰ husi lei no 2/2017 ba arguidu sira hodi fo medidas koasaun TIR no AP, desizaun ne‘ebé tribunal aplika tuir lei ma’be la Adekuadu tanba kazu droga nia natureza la hanesan ho kazu kontra lei manifestasaun do’ok 100 metros husi edífisiu públiku, medida koasaun ne’e bele fo fatin ba arguidu sira kontinua konsumu Droga refere no atu halai ses husi Justisa”. Hatete nia

Entertantu, segundu portavoz João Manuel Frederiku husu Minitériu Públiku halo rekursu ba desizaun Tribunál ne’ebe aplika TIR ba arguidu sira

“Ami rekomenda ba Ministeriu publiku liu husi prokurador titular ba kazu refere atu halo rekursu ba Dezisaun TDD nebe aplika medidas de koasaun TIR no AP, hodi aplika fali medidas koasaun Prisaun Preventiva”. Tenik nia

Enkuantu, Ativista ne’e mos husu Autoridade Judiciaria administra justisa ho justu no nakloke

“Autoridade Judisiária tenki administra justisa ho independente, justu, igual, transparante no hadok an husi Konspirasaun sira hotu. Servisu Investigasaun Kriminal no servisu inteligensia sira atu kontinua nafatin buka evidensia hodi kaptura Distributor ne’ebe distribui Droga mai Timor.

Portantu, sira mos ejize ba Governu atu tau prioridade no kontrolu ida ne’ebe diak iha Fronteira hodi kontrola atividade transaksaun sira hodi Evita Droga tama mai no liu-liu joven sira atu hadok an husi aktu ilisitu Droga.

Jornalista: Antonio Tilman & João Marito

Editor: Ekipa Editorial