Hetan Agresaun Fíziku ! Francisco Husu PM Xanana Rezolve Problema Professor
![](https://sapnewstl.com/wp-content/uploads/2024/07/IMG-20240730-WA00482.jpg)
Imajem : Professor Francisco Ximenes dudu malu ho PNTL iha Resintu Ministériu Edukasaun Vila Verde, 30/07/2024.
SAPNewsTL, Díli – Resiste hodi defende direitu professor kontratadu ne’ebe hapara husu IX Governu Konstitusional, Professor Francisco Ximenes hetan agresaun fízika husi Polísia, wainhira dudu malu ho seguransa PNTL iha resintu Ministériu Edukasaun Villa Verde Dili.
Professor Francisco Ximenes ne’ebe sofre agresaun fíziku husi Polísia ne’e informa nia hamutuk ho ninia maluk professor sira hodi ba hasoru Ministra Edukasaun iha knaar fatin maibe polísia sira la fo sira ko’alia no tama ba edifisiu ministériu edukasaun nian.
Francisco Ximenes sublinha nia ho kadernu no surat tahan ne’ebe hakerek ho poezia Primeiru Ministru Kayrala Xanana Gusmão no Francisco Borja da Costa nian hodi lee no aprenseta iha fatin ne’ebá maibe parte seguransa la fo tempu no espasu hodi expressa sira nia sentimentu.
“Ami la’os eis professor, ami professor nafatin, ami nafatin hanorin, ohin ha’u mai ho Poezia Avó Xanana nina no Borja da Costa nian inklui rezolusaun Parlamentu Nasionál nian, mai iha ministériu edukasaun villa verde, maibe ami hetan agresaun no dada ami nia liman husi polísia sira, ikus mai halo ha’u monu no dezmaia”. Tenik Professor Francisco Ximenes ba SAPNews iha Sentru Vera-Kruz, 30/07/2024
Professor ne’ebe sai vítima ba desizaun ministériu edukasaun hapara professor kontratatu ne’e dehan, hafoin nia monu tanba hetan agresaun, nia maluk sira lori kedas nia ba sentru saúde hodi hetan atendimentu.
“Durante hetan agresaun, halo ha’u monu no la sadar, entaun kolega sira ho lori ha’u mai sentru saúde vera-kruz”. Nia hateten
Francisco husu ba Primeiru Ministru Kayrala Xanana Gusmão no Ministra Edukasaun Dulce de Jesus hodi labele politiza professor kontratadu sira maibe respeitu direitu professor sira nian tuir rezolusaun ne’ebe parlamentu nasional.
![](https://sapnewstl.com/wp-content/uploads/2024/07/IMG-20240730-WA0050.jpg)
Entrevista Professor Francisco Ximenes Iha Sentru Saúde Vera-Kruz,30/07/2024
“Ami husu ba Primeiru Ministru Kayrala Xanana Gusmão atu hakbesik an ba Ministra Edukasaun, oinsa bele rezolve problema ne’ebe ami hasoru”. Nia Husu
Enkuantu, Eis Professores kontratadu sira antes ne’e hala’o ona asaun hasoru ministériu edukasaun hahu iha loron 8 fulan jullu to’o ohin loron.
Tuir planu professor kontratadu sira sei kontinua halo asaun to’o loron 30 fulan setembru tinan 2024, wainhira ministériu edukasaun ladauk solusiona problema professor kontratadu sira nian.
Maske nune’e, maibe Ministériu Edukasaun kontinua mantein hodi la renova professor kontratadu sira nian tanba konsidera sira nia kontrata mak remata ona.
Jornalista : Conzita Mota & Dircia Belo