Komunidade 27 Sai Afetadu ! Mota Lori Lakon Labarik 1 & Rai-Lakan Hamate Joel
Imajem : Xefi Seksaun Komunikasaun APC, Nelson Nunes iha Salaun APC Kaicoli, Segunda (20/01/2025).
SAPNews TL, Díli — Autoridade Protesaun Sivil (APC) Timor-Leste liu husi Gabinete Relasaun Externa no Komunikasaun, atualiza ba publiku kona-ba situasaun dezastre natural ne’ebe akontese iha territóriu nasionál durante semana daruak fulan Janeiru tinan 2025
Xefi Seksaun Komunikasaun Autoridade Protesaun Sivil (APC sigla Portugués) Nelson Nunes informa, tipu kazu dezastre natural ne’ebe akontese iha territóriu nasionál, hahu husi loron 13-20 fulan janeiru iha rejiaun Timor-Leste, APC rejistu numeru ema afetadu hamutuk 27.
“Iha loron 13-20 Janeiru 2025 durante semana ne’e, iha rejiaun Timor-Leste normal no akontese tipu dezastre, ne’ebe ami nia ekipa APC rekoilha iha Munisípiu hamutuk, ema nain 27 mak afetadu ba dezastre ne’ebe akontese ” Dehan Xefi Seksaun Komunikasaun APC, Nelson Nunes ba jornalista sira liu husi komferensia imprensa ne’ebe hala’o iha APC Kaicoli, Segunda (20/01/2025)
Enkuantu tuir dadus ne’ebe APC rejistu iha rejiaun Timor-Leste durante semana ne’e, ho tipu kazu dezastre sira ne’ebe akontese hodi rejulta familia balun sai afetadu, mak hanesan Suku Fatulia Aldeia Bahadato Postu Administrativu Venilale Munisípiu Baucau, iha loron 12 Janeiru 2025 rezulta ahi han komunidade nia uma ida (1). Suku Hoholau Aldeia Maururia, Postu Administrativu Aileu Munisípiu Aileu, iha loron 14 janeiru akontese rai lakan fera mate sidadaun mane ida ho naran kompletu, Joel de Araujo ho idade sanulu resin hat 14.
Suku Bairu-Pite Aldeia Tane Timor, Postu Administrativu Dom Aleixo Munisípiu Dili iha loron 10 janeiru, akontese ahi han komunidade nia uma ida (1) no Suku Becora Aldeia Darlau Postu Kristu Rei akontese anin sobu komunidade nia uma ida (1), Suku Riheu Aldeia Gumhei Postu Ermera Munisípiu Ermera Akontese anin sobu komunidade nia uma ida (1) no Suku Holarua Aldeia Urufu Postu Same Munisípiu Manu-Fahi akontese anin sobu komunidade nia uma ida (1).
Suku Carau balu Aldeia Lamak Klaran Postu Viqueque Munisípiu Viqueque akontese mota lori labarik mane ida iha loron 13 Janeiru 2025, to’o ohin loron familia seidauk hetan no Suku Carau Uabubo Aldeia Lequibuti Postu Ossu akontese ahi han komunidade nia uma ida (1).
Xefi Seksaun Komunikasaun Autoridade Protesaun Sivil hatutan, hafoin akontese dezastre naturais komandu APC Munisípiu orienta membru sira tun direita ba lokal akontesementu hodi verifika, evakua no halo assesmentu ba vitima sira no apoiu emerjensia ba vitima afetadu sira.
Aleinde ne’e, bazeia ba informasaun previzaun tempu husi Diresaun Nasional Metrologia no Geofizika informa katak, hahu husi loron 13 to’o 20 fulan janeiru tinan 2025, kondisaun tempu iha semana kotuk nia laran kalohan taka iha territóriu nasionál kauza udan fraku naton bele lokalmente udan forte liu-liu iha Munisípiu hitu (7).
Temperatura maximu iha territóriu nasionál varia husi 27-31 °C minimal 19-26°C, Kondisaun anin hu’u ho normal naton iha rejiaun sentral no anin hu’u ho velosidade naton iha rejiaun kosteiras liu-liu Munisípiu sira hanesan Dili, Atauro, Baucau, Lautem, Viqueque no Manatuto.
Kondisaun laloran tasi parte kosta norte varia husi 0.2-0-7 metru kategoria normal no laloran tasi kosta sul varia husi 0.7-1.0 metru kategoria normal.
Entretantu, Autoridade Protesaun Sivil alerta ba komunidade sira iha territóriu nasionál, ne’ebe hela iha area kategoria risku ba dezastre natural hanesan, Foho lolon, Mota ninin, besik ahi hun bo’ot no liña eletrisidade sira, atu bele hadok an husi fatin risku sira, nune’e labele afeta ba dezastre.
Jornalista: Guilhermino Ramos da Cruz
