La Hapara Sosa Prado ! FONGTIL Ameasa Halo Asaun Hasoru PN

Imagem : Grupu Sektoral Sosiedade Sivil hala’o Konferensia imprensa iha Kaikoli, 29/08/2025

SAPNewsTL, Díli : Forum Organizasaun Naun-Governamental Timor-Leste (FONGTIL) hamutuk ho membru ONG no Rede setoral sira, husu Parlamentu Nasionál (PN) atu kansela desizaun sosa kareta 65 ba deputadu sira, tanba povu Timor-Leste moris iha krize multidimensaun sosial, ekonomia no saúde.

Ermelinda Soares – SAP News TL

Liu husi Komferensia Imprensa Porta-voz FONGTIL, Januário de Jesus Amaral, hateten, bazeia ba Konstituisaun RDTL Artigu 48, fó dalan ba sidadaun ida-idak iha direitu hodi aprezenta petisaun, keixa no reklamasaun ba órgaun soberanu ka autoridade relevante sira, nu’udar direitu konstitusional ba sidadaun hotu-hotu no defende direitu individu no publiku.

“Konstituisaun estabelese mekanizmu petisaun permite ita asesu ba komunikasaun direta ba órgaun soberanu sira no autoridade relevante sira hodi aprezenta preokupasaun kona-ba kestaun relevante sira iha ámbitu interese públiku ba órgaun soberanu sira, karik la kansela maka FONGTIL hamutuk ho nia rede sektoral sira sei halo asaun hasoru Parlamentu Nasional”.Hateten Porta-voz Januário liu husi Komferensia Imprensa, Sexta (29/08/2025).

Representante Sosiedade Sivíl ne’e aprofunda,Timor-Leste hasoru dezafiu barak, relatóriu ofisiál hatudu katak 41,8% populasaun hela iha pobreza absoluta, dezempregu iha 5,1% no 47,1% labarik sira sofre malnutrisaun, nune’e, gastu bo’ot hanesan sosa kareta foun ba deputadu seidauk prioridade, Nia Dehan.

Tuir relatóriu Diresaun Geral Estatistika Ministériu Finansas, Sekretáriu Estadu Formasaun Profisional no Empregu (SEFOPE) no Organizasaun Internacional ba Trabalhu (ILO) neʼebé lansa iha loron 26 Janeiru 2023, koloka nivel dezempregu Timor-Leste iha 5,1% no tuir relatóriu Organizasaun Mundial Saúde (OMS) 47,1% sofre malnutrisaun.

Tanba ne’e preokupasaun publiku no baze legal mak deputadu sira mak titular husi orgaun soberania ne’ebe reprezenta povu Timor-Leste tomak, independente ba eleitoral ne’ebe mak sira eleitu ba, Tenik Nia.

FONGTIL ho nia membru no Rede sektorál sira hakarak hato’o ba Parlamentu Nasional katak Timor-Leste hasoru hela dezafiu no krize sosiál multidimensionál ne’ebé rezulta violénsia no krime akontese kuaze iha territorial laran tomak, relatóriu no rezultadu peskiza sira hatudu katak porsentu 41.8 populasaun Timor-Leste moris iha liña pobreza absoluta no multidimensionál.

Ho situasaun sira ne’e mak FONGTIL ho nia membru no Rede Sektorál sira ezize ba Parlamentu Nasionál atu kansela prosesu sosa karreta 65 ba Deputadu/a iha Parlamentu Nasional.

Los duni iha Lei N. 22 / 2023 de 29 de Dezembru terseira alterasaun ba Lei nº. 5/2004, de 5 de Maio, Estatutu ba Deputados iha artigu 12 alinea A hatete katak, iha transporte ba deputadu sira hodi halo misaun Parlamentu Nasional nian, maski realidade hatudu katak ita-nia povu sira sei moris kiak no mukit maibé nai deputadu/a sira nafatin ho ksolok hodi goza regalia oioin.

Rekomendasaun FONGTIL ba Parlamentu Nasionál (PN) mak haktuir iha kraik :

1. Osan povu nian tenke utiliza ba prioridade fundamental hanesan Saúde, Edukasaun, Agrikultura no Infrestrutufra hodi responde interese komun
2. Deputada sira Parlamentu tenke hatudu ezemplu diak iha jestaun finanseiru, atu evita gastu nesesária.
3. Politika ho objetivu prinsipal hodi garante bem star povu nian

d.Rekomenda bazeia ba fundamentu konstitusional no lei finanseira públika refere iha leten, rekomenda forte ba Parlamentu Nasional.

1. FONGTIL ho nia membru no rede sektoral sira husu ba deputadu sira hotu iha Parlamentu Nasional kansela sosa karreta foun.
2. FONGTIL ho nia membru no Rede sektoral sira husu ba deputadu sira iha Parlamentu Nasional tau prioridade ba programa dezenvolvimentu ne’ebe fo benifisiu diretamente ba povu.
3. Reforma transparansia no efikáz iha jestaun rekursu públiku, nune’e aumenta konfiansa povu ba Parlamentu Nasional.
4. FONGTIL ho nia membru no Rede sektorál sira husu ba Provedor Diretus Humanos no Justisa atu Fiskalizasaun Abstratu ba Estatutu Parlamentu Nasional tuir Artigu 150 Konstituisaun RDTL nian.
5. Rekomenda ba membru Parlamentu Nasional atu reve Lei N.º 22/2023 de 29 de Dezembru terceira alteração ba Lei nº. 5/2004, de 5 de Maio, Estatutu ba Deputados iha artigu 12 alinea A, artigu 16. nо 21.
6. Hatur kualidade no sensibilidade nu’udar reprezentante povu iha uma fukun parlamentu nasional.

Entretantu, preokupasaun ne’ebe FONGTIL hamutuk ho membru ONG no Rede setoral sira hato’o la hetan resposta pozitivu maka sei halo asaun hasoru Parlamentu Nasionál iha tempu badak.

Imajem : Estudante UNTL hala’o konferénsia imprensa iha Kampus Sentral UNTL, 29/08/2025

Notísia relevante

Evita “Goza Regalia Barak” ! Estudante UNTL La Aseita PN Sosa Viatura Ba Deputadu 65

SAPNewsTL, Dili : Relasiona politika Parlamentu Nasionál ne’ebe apova osan hodi sosa kareta 65 ba deputadu sira ho montante osan millaun 4.2 USD, estudante Universidade Nasional Timor Lorosa’e (UNTL) lamenta no diskorda total tanba ne’e hanesan meius hodi goza previléjiu.

Parlamentu Nasionál (PN) nu’udar orgaun soberanu daruak iha estadu Repúblika Demokrátika Timor-Leste (RDTL), iha ne’ebe deputadu sira hola knaar nu’udar representante povu hodi kria lei, halo fiskalizasaun ba programa ne’ebe governu ezekuta, no foti desizaun polítika ne’ebe adekuadu no justu ba ema hotu.

Relasiona ho desizaun politika liu husi konsellu administrasaun ne’ebe preve no aprova nonok orsamentu privativu iha tinan 2024, tinan ne’e ezekuta hodi sosa viatura foun hamutuk unidade 65 ba deputadu sira iha parlamentu nasional, ho razaun tanba kareta hirak ne’ebe uza durante ne’e uza aat no kustu manutensaun boot.

Portavos Cronyck Opremido hatete estudante UNTL lamenta no la konkorda total tanba deputadu no deputada sira simu regalias oioin maibe hakarak sosa karreta foun hodi uza ba halo fiskalizasaun.

“Ami estudante akadémiku-UNTL lamenta no diskorda total, nune’e mos Prezidente Parlamentu Nasional Maria Fernanda Lay ne’ebe defende makaas tebes ho deklarasaun infantil sira liu husi media katak, tenke sosa duni kareta prado ba deputadu 65 ba Parlamentu Nasional”.

“Laos sosa deit kareta prado, maibe simu subsidiu oioin no direitu regalia sira hanesan osan ba manutensaun, alojamentu, laptop, tratamentu saude, osan pulsa no seluk tan neebe privileziu tebes ba deputadu sira iha parlamentu nasional”. Hateten Portavos Estudar UNTL Cronyck Opremido iha Kampus Sentral UNTL, Dili, 29/08/2025

Ligadu ho privilégiu hirak ne’e, estudante konsidera deputadu sira laos ona representante povu, maibe representa deit sira-nia partidu, grupu, sira nia an no familia, pior liu tan representa deit ema imperialista no restu kolonialista nian, representa deit osan nain empreza kompanhia sira.

“Deputadu sira la exerse sira-nia poder no funsaun politika ho diak hodi diskute problema social ne’ebe estrutural tebes, debate setor produtivu ka estrateziku sira hanesan edukasaun, agrikultura, turismu, infraestrutura basiku no setores seluk neebe ikus mai bele fo satisfasaun ka resulta bens estar povu nian no desemvolvimentu sustentavel ba nasaun iha futuru”.

“Maibe sira hatene deit buka meius oioin, liu husi kria lei hodi fo privileziu no hariku sira-nia an no familia, inklui asegura ka proteje deit distinu partidu nian ba kada eleisaun iha periodu sira tuir mai”.

Oprimido argumenta katak ho inkapsidade no ignoransia sira ne’e hotu, mak ohin loron nasaun ida née la’o hakdasak, iha neebe povu hasoru laloran injustisa social neebe produs husi lider politiku sira, liuliu parlamentu nasional ne’ebe sai fatin atu diskute povu nia moris no nasaun nia distinu liu husi aspetu ekonomiku, social, cultural no politika edukativa, maibe ida ne’e la akontese.

Oprimido konsidera uma fukun parlamentu nasional, ohin loron sai deit fatin ba istoria malu, trata malu, dun malu, no konta istoria, katak se mak luta no se mak la luta, se mak halo diak no se mak halo ladiak. Buat sira ne’e sai ona toman aat husi deputadu sira iha parlamentu nasional, “ami konsidera katak, hatun imagen no kredibilidade orgaun soberanu estadu nian hanesan parlamentu nasional€.

Estudante akademiku-UNTL lamenta no konsidera katak; Deputadu sira iha parlamentu nasional laiha ona sensibilidade estadu, laiha kapasidade politika no seriedade hodi foti desizaun ne’ebe efetivu no efisiente ba interese komun ka moris diak povu no nasaun nian. Maibe desizaun ne’ebe sira produs ho intensaun atu benefisia deit ba interese partikular ka ema minoria nian.

Deputadu sira laiha ona etika no responsabilidade moral perante povu, iha ne’ebe povu sei moris kiak tebes, desempregu, mal-nutrisaun, mosu traballu infantil iha fat-fatin no problema hotu ne’ebe ligadu ho kondisaun ekonomika ema moris nian.

“Ami konsidera katak, Desizaun politika ba sosa kareta lussu ka prado, ne’e ironiku tebes, ida ne’e bele konsidera hanesan alokasaun fundu ne’ebe la efisiente. Tamba fundu supostu bele aloka ba programa kombate kiak, melhora infraestrutura ka aumenta servisu públiku, maibe uza deit ba ema balu nia komfortu”.

Desizaun sira ne’e hatudu momos diferensa social ne’ebe boot tebes entre elite politiku sira no povu iha rai ida ne’e, tamba karreta lusu sai ona hanesan simbolu ba estatutu poder no agrava kondisaun kiak ne’ebe sidadaun barak hasoru”.

Timor leste ohin loron mosu problema estrutural, hanesan iha saúde; aimoruk laiha no ema kontinua mate, kualidade edukasaun laiha, be-mos laiha, estrada sira iha teritoriu nasional laiha kualidade ba povu hodi asesu husi foho mai vila atu buka moris.

Setor alternativu sira la funsiona no kontinua dependensia ba fundu petrolíferu, maibe deputadu sira kontinua sosa kareta lussu sem fiskalizasaun efetiva ba programa ne’ebe governu ezekuta.

Ho situasaun neebe difisil tebesmak “ami husu ba parlamentu nasional liu komisaun relevante katak, presiza tetu didiak antes preve orsamentu ba sosa kareta prado ba deputadu sira, maibe importante liu mak tenke halo jestaun ne’ebe ho forma efisiente, efikasia no efetivu”.

“Nune’e labele gasta osan povu nian ba privileziu ema ka grupu miniria nian.

Haree ba rezoens neebe la nesesariu ka inkonveniente tebes mak ami husi parlamentu nasional, liu husi poder administrativa kompetente atu kansela orsamentu privativu ba kareta prado nian antes anunsia ba konkursu públiku”.

Estudante UNTL Cronyck Oprimido mós husu ba xefe governu no makaer ukun sira hodi desempenha funsaun ho diak hodi lori moris diak populasaun sira.

“Ami mós husu ba Primeiru Ministru Kay Rala Xanana Gusmão hodi orienta linha ministerial sira atu desempenha funsaun servisu ho diak no kualidade ba interese moris diak povu, utiliza ptrimoniu ka sasan estadu nian tuir deit konstituisaun no lei sira, hodi servi deit povu no nasaun”.

Cronyck Oprimido mós husu ba entidade hotu hodi luta no resiste hasoru injustiça sosial ne’ebe mosu iha Timor-Leste.

“Ami mós husu ba sidadaun hotu, estudante akademiku husi universiade no institute hotu neebe iha, veteranu, juventude resistensia, sosiedade sivil, atu nafatin resiste hodi kontra desizaun politika ne’ebe la afavor ba moris diak povu nian, maibe kria no haburas deit injustisa sosial”.

Lembra fali katak Parlamentu Nasional sei sosa kareta foun unidade 65 ba deputadu sira bazeia ba aprovasaun ne’ebe antes ne’e prevê ho osan montante millaun 4.2 hodi fasilita deputadu sira halo fiskalizasaun tanba karreta aat no kustu manutensaun karun.

Tuir mai bele lee direitu ne’ebe deputadu sira hetan durante mandatu mak haktuir iha kraik :

1. Direitu Regalias
2. Simu kareta prado
3. Simu laptop mac
4. Simu osan alojamentu $ 450.00/kada fulan
5. Simu osan pulsa $ 250/kada fulan
6. Osan ba tratamentu Saude $ 7,500
7. Saláriu deputadu sira simu nian tuir Kargu
8. Deputadu laiha kargu $ 2,681.55/fulan
9. Sekretariu Meja Komisaun $ 2,762. 50/f
10. Vise Prezidente Komisaun $ 2,843.25/f
11. Prez komisaun Espesializada $ 2,925
12. Vise Prezidente Bankada $ 2, 843.25/f
13. Prezidente Bankada $ 2,925.00
14. Vise Sekretariu Meja PN $ 2,975.00/f
15. Vise Prezidente PN $. 3,600.00/f
16. Prezidente PN $ 4,500.00/f

Total pesoal sira ne’ebe asume kargu funsaun iha PN; Vise PN (2), Vise Sekretariu Meja (2), Prezidente Bankada (6), Vise Prezidente Bankada (5), Prezidente komisaun Espesializada (7), Vise Prezidente komisaun (7), Sekretaria Meja Komisaun (7), Deputadu/a laiha Kargu hamutuk nain 29

3. Osan Miliaun $16,682,500.00 aloka ba :

Parlamento Nacional $7,896,379.00 kompostu hosi Gabinete Presidente Parlamentu $583,621.00, Bancada Parlamentar sira $1,042,799.00, Gabinete Sekretáriu Jeral PN $88,722.00, Komisaun A $154,960.00, Komisaun B $165,587.00, Komisaun C $181,839.00, Komisaun D $133,300.00, Komisaun E $182,060.00, Komisaun F $151,270.00, Komisaun G $182,980.00.

Konsellu ba Fiskalizasaun Sistema Nasional Intelijensia Timor-Leste $69,490.00, Konsellu Konsultivu Fundu Petrolífeiru $255,131.00, Grupu Feto Parlamentar $46,944.00, Diresaun Jestaun Finanseira $1,721,281.00 Diresaun, Apoiu Parlamentar $129,608.00, Diresahn Rekursu Umanu no Formasaun $3,087,266.00, Diresaun komunikasaun $371,219.00

Divizaun Protokolu $22,923.00, Gabinete Auditoria Interna $53,150.00, Gabinete Estudu Estratéjiku Jurídisus $24,044.00, Gabinete Relasaun Internasionais no Koperasaun $8,721.00, Divizaun Planeamentu, Monitorizasaun no Avaliasaun $15,9000.00, Organizasaun Global Parlamentares Contra Corupsaun $92.7000.00, no Sentru Promosaun Igualdade Jeneru $20.606.00.

Wainhira Parlamentu Nasional la hapara sosa karreta foun ba deputadu sira maka estudante sira hamutuk ho sosiedade sivil sei halo demonstrasaun hasoru Parlamentu Nasional iha tempu besik.