MS & UNFPA Realiza Workshop Revizaun Anuál Vijilánsia Mortalidade Inan no Perinatál
Imajem : Vise Ministru ba Fortalesimentu Instituisaun Saude Jose Reis Magno, iha Dili, 18/12/2025.
SAPNewsTL, Díli : United Nations Population Fund Timor-Leste, (sigla Inglés UNFPA) hamutuk ho Ministériu Saúde realiza workshop Revizaun Anuál Vijilánsia Mortalidade Inan no Perinatál (MPDSR) hodi hasa’e esensia sistema kualidade kuidadu saúde no hamenus mortalidade inan no perinatal iha Timor-Leste.
Vise Ministru ba Fortalesimentu Instituisaun Saude Jose dos Reis Magno hateten revizaun Anuál ba vijilasia no revizaun anual ba mortalidade materna no perinatál atu fortalese saude reprodutivu, materna, neonal no infatil iha Timor-Leste hodi hamenus mortalidade inan.
“Mortalidade Materna kontinua sai dejafiu bo’ot ida ne’ebe sai indikadór ba ita-nia save Saúde Materna, Mekanismu MPDSR laos apenas ba relatoriu maibe nu’udar prosesu ida ne’ebe permite ita atu komprende kauza no identiika lakuna no foti asaun konkreta atu salva vida” Dehan Vise Ministru ba Fortalesimentu Instituisaun Saude Jose Reis Magno, iha nia diskursu, Quinta-feira(18/12/2025).
Vise Ministru informa relatoriu MPDSR ba tinan 2024-2025 oferese oportunidade mai atu halo reflesaun kona ba ita-nia konkista no dezafiu ne’ebe ita enfrenta.
Iha fatin hanesan, reprezentante UNFPA iha Timor-Leste Navchaa Suren, haktuir enkontru Revizaun Anuál Vijilánsia Mortalidade Inan no Perinatál (MPDSR) sai pilar xave ida husi sistema kualidade kuidadus no inisiativa globál ne’ebé UNFPA apoia hamutuk ho UNICEF no OMS atu aselera progresu ba alvu ODS 3.
“UNFPA kontinua apoia Governu Timor-Leste iha ninia lideransa no propriedade nasionál atu hamenus Mortalidade inan no perinatál ne’ebé bele prevene, atu hametin sistema saúde liuhusi evidénsia, responsabilizasaun, no melhoria kualidade kuidadu”.
Nia salienta MPDSR sai hanesan mekanizmu prinsipál ida atu transforma dadus Mortalidade inan no perinatál ba aprendizajen sistemátiku no asaun konkretu, nune’e bainhira MPDSR funsiona ho di’ak bele prevene mortalidade no salva moris.
“MPDSR la’ós atividade opsionál ida, maibé funsaun esensiál ida husi sistema kualidade kuidadu saúde nian no ami nafatin komprometidu atu apoia Ministériu Saúde liuhosi asisténsia téknika, kapasitasaun instituisionál, no advokasia estratéjika, hodi revitaliza no hametin sistema MPDSR no garante katak nia kontribui ba redusaun sustentável mortalidade inan no perinatál”.
Enkuantu, iha workshop ne’e partisipa husi Vice-Ministru Vise Ministru ba Fortalesimentu Instituisaun Saude Jose Reis Magno, reprezentante UNFPA iha Timor-Leste Navchaa Suren, reprezentante UNICEF, Diretora Nasional Saude materna infatil, Parteira sentru saude sentru, Sefi saúde, Diretores munisipal.