Okupa Espasu Públiku Tenki Sai ! Se La Koopera, Ne’e Problema Imi Nian

SAPNewsTL, Díli – Durante muda negosiante sira ne’ebé fa’an iha Jardim Largo Lesidere, Sekretariu Estadu Asuntu Toponomia no Organizasaun Urbanu (SEATOU) Germano Santa Brites husu sidadaun sira ne’ebe okupa espasu públiku atu bele koopera no husik fatin tanba governu sei la fo notifikasaun.

SEATOU Germano Santa Brites hateten ema ne’ebe fa’an iha fatin públiku, ekipa sei la halo karta notifikasaun maibe ekipa sei hasai sira hotu, nune’e sidade Dili bele sai moos, organizadu no seguru ba ema hotu.

“Sé mak hatene a’an fa’an iha fatin públiku, trotoar leten no jardim sira hanesan ne’e sei la iha notifikasaun bà sira tanba ne’e rai estadu, halo favor fila fali bá fa’an iha fatin ne’ebe governu prepara ona, hotu-hotu tenki bá fa’an iha merkadu, la iha ida maka atu hetan notifikasaun”. Tenik Sekretariu Estadu Asuntu Toponomia no Organizasaun Urbanu (SEATOU) Germano Santa Brites iha Jardim Largo Lecidere,16/08/2024

Governante ne’e dehan, ema hotu tenki koopera ho governu no estadu, wainhira la koopera mak ekipa sei ba hasai obrigatoriamente.

“Governu kontrola buat ne’ebe bele halo tuir regras ne’ebe maka iha, tanba ne’e hotu-hotu tenki koopera, la iha ida mak la koopera,  liliu maluk vendedores sira halo favor tenki koopera, se la koopera ho governu no estadu ne’e problema imi nian”.

Hatan ba preokupasaun negosiante nian kona ba fa’an hahan iha Merkadu Manleuana la folin, sekretariu estadu ne’e husu negosiante sira fila ba fa’an iha uma.

“Sé sira senti la merese atu fa’an iha kotuk ne’eba (merkadu Manleuana), entaun bá fa’an iha sira nia fatin, tanba bee ho hahan mós fa’an iha merkadu laran, ema iha merkadu laran sira mós presiza bee ho hahan, ema mak konsumu hahan sira ne’e laos bá faan iha tasi laran, hakarak fa’an bá fa’an iha merkadu laran, sé mak la koopera fila bà fa’an iha nia uma, fatin ne’ebe estadu prepara ne’e iha merkadu”. Nia husu

Enkuantu, negosiante hamutuk hitunulu resin-ida (71), entre sira negosiante 35 mak aseita muda sasan ba merkadu Manleuana, entretantu negosiansaun 36 mak la aseita no deside fila ba sira nia uman.

Fo hatene fali katak antes ne’e SEATOU hasai ona negosiante barak iha Tasi-Tolu, Bidau Mota Klaran, Terminal Bekora, Merkadu Bekora, Merkadu Comoro, inklui negosiante sira ne’ebe fa’an iha dalan ninin.

Governante ne’e husu ba ema hotu ne’ebe kategoria hela iha espasu públiku atu bele husik hela fatin liliu sira ne’ebe fa’an iha dala ninin, trotoar leten, jardim laran no okupa rai estadu nian, nune’e bele fo espasu ba governu ho halo dezenvolvimentu.

Jornalista : Conzita Mota