Papa Francisco Hakarak Timor-Leste Sai Nasaun Ne’ebé Livre, Demokrátiku, Solidáriu & Inkluzivu

SAPNewsTL, Dili – Hafoin to’o hala’o enkontru ofisiál ho lider polítiku no sivil iha Palásiu Prezidente Nicolau Lobato, Santu Padre Papa Francisco ho ksolok husu makaer ukun sira atu hari’i nasaun ida livre, demokrátiku, solidáriu no inkluzivu.

Hafoin serimónia resepsaun husi Aeroportu Comoro, Papa Francisco hakat tuir dalan fo bensa ba sarani sira ne’ebé forma naruk husi resintu aeroportu to’o Nunsiatura Motael.

Liu tiha oras balun deskansa iha Nunsiatura Motael, Papa Francisco kontinua ba Palasiu Presidensial Nicolau Lobato Dili hodi halo sorumutu ho Lider Polítiku no sivil sira.

Iha Palasiu Presidensial Nicolau Lobato, Santu Padre Papa Francisco sente ksolok no agradese ba Na’i Maromak tanba bele lori nia to’o Timor-Leste.

Iha diskursu, Papa Francisco hateten nia konfia Povu Timor-Leste Imaculada Conceição atu nafatin akompanha ba misaun hari’i nasaun ne’e livre, demokrátiku no solidáriu.

“Ha’u konfia Timor-Leste no ninia povu tomak ba Imakulada Conceição nia protesaun, imi-nia padroeira lalehan nian, ne’ebé invoka iha-ne’e ho títulu Virjen Aitara nian”.

“Atu Nia akompaña nafatin ita-boot sira no ajuda ita-boot sira iha ita-boot nia misaun atu hari’i nasaun ida ne’ebé livre, demokrátiku no inkluzivu, iha ne’ebé laiha ema ida maka sente eskluidu no ema hotu bele moris iha dame ho dignidade.” tenik Papa Francisco iha Palásiu Prezidente Nicolau Lobato Dili, 09/09/2024

Papa Francisco enkoraja povu Timor-Leste atu moris ksolok iha fiar, armonia no diálogu tuir kultura Timor nian.

“Ha’u agradese ba Na’i tanba lori ha’u mai Timor-Leste no ha’u enkoraja ninia povu atu moris ksolok fiar nian, iha armonia no diálogu ho kultura”. Papa Francisco hakerek liu hosi karta de onra ne’ebe prepara iha Palasiu Prezidensiál Nicolau Lobato

Lider Mundial Igreja Katólika ne’e konsidera buat ne’ebe furak liu iha Timor-Leste maka ninia povu.

“Buat ne’ebé di’ak liu no furak liu ne’ebé Timor-Leste iha mak ninia ema sira. Ha’u haraik bensaun ba ita-boot ho ha’u nia fuan tomak.”

Enkuantu, bainhira Papa Francisco to’o Palásiu Prezidensial Nicolau Lobato sarani sira simu tuir kultura Timor-Leste nian no sarani barak halibur hamutuk iha resintu Palásiu Presidensial.