SEFOPE Despede Traballador 104 ! Tuati Promete Kria Kampu Servisu Wainhira Fila Mai

Imajem : Traballadora Heriyanti Tuati iha Salaun Timor Lodge, kuarta-feira (06/11/2024).

SAPNewsTL, Díli – Sekretaria Estadu ba Formasaun Profisionál no Empregu ( SEFOPE), despede traballadór timoroan hamutuk na’in-104 ne’ebé sei ba servisu iha Koreia do Sul., Traballadora Heriyanti Tuati promete sei kria kampu traballu ba joven sira wainhira fila mai.

Diretor Nasional Empregu Estrangeiru João Correia Perreira informa SEFOPE asina deklarasaun ho familia no traballador sira antes sira desloka ba Koreia do Sul hodi hala’o servisu iha area rua fabrika no peska.

“Serimónia ohin ne’e asina deklarasaun entre governu, familia no trabalhador sira antes desloka ba korea do Sul. Sira ba servisu iha area rua maka fábrika no peska ho durasaun serbisu tinan 4 fulan 10”. Dehan Director Nasional Emprego Estrangeiro João Correia Perreira ba Jornalista sira iha Salaun Timor Lodge, kuarta-feira (06/11/2024)

João Correia Perreira salienta, entre traballador 104 ne’e iha mós traballadora feto hamutuk sanulu resin-ida (11), traballadora hirak ne’e sei serbisu iha area fábrika.

Director Nasional Emprego Estrangeiro ne’e dehan, timoroan sira labele sees hosi sistema (ilegal) no sira ne’ebe daudaun ne’e servisu hela nafatin iha sistema hodi labele prezudika traballador sira seluk.

“Kona-ba traballador timoroan ne’ebé sai husi sistema (ilegal) ami sempre fahe informasaun ba kandidatu traballador foun sira no mos ba sira ne’ebe serbisu iha korea atu nafatin iha sistema hodi nune’e labele prejudika fali ba traballador sira seluk”.

Traballador husi munisípiu Díli okupa primeiru lugar kompara ho timoroan barak ne’ebe ba servisu iha rai liur.

“Kona ba dadus trabalhador timoroan ne’ebé serbisu iha rai liur munisipiu Dili mak sei okupa primeiru lugar, tuir mai munisipiu baucau, ermera, bobonaro no munisipiu sira seluk”.

Desde programa ne’e hahú iha 2009 to’o 2024, SEFOPE rejista trabalhador ne’ebe serbisu iha rai liur hamutuk 6.808 pessoas.

Oras nee dadauk trabalhador timor oan nebe hetan deporta husi serbisu imigrasaunnasaun korea hamutuk sanulu resin ida (11) no sira iha ona timor.

Imajem : Diretor Nasional Empregu Estrangeiru João Correia Perreira

João Correia Perreira hatutan sidadaun Timor ne’ebe daudaun ne’e servisu iha Korea hamutuk 1.338, no traballador ne’ebe sai ona hosi sistema (ilegal) sei fila mai Timor iha fulan Dezembru.

“Traballador hamutuk 1.338 mak oras ne’e iha Korea do Sul. Kona-ba traballador ne’ebe serbisu fora husi sistema (ilegal) governu Korea liu husi servisu imigrasaun fo sai avizu ba traballador hotu-hotu husi nasaun 16 inklui Timor-Leste atu sai husi korea antes fulan dezembru”. Nia informa

Iha fatin hanesan, traballadora Heriyanti Tuati sente kontente tanba bele hetan oportunidade ida ne’ebé di’ak  hodi ba servisu iha Korea do Sul, nune’e bele hadia ekonomia familia nian.

“Ha’u sente kontente tebes tanba ne’e hanesan oportunidade ne’ebe mak diak tebes mai ha’u nu’udar joven ida”. Dehan traballadora Heriyanti Tuati.

Traballadora ne’e mos hateten ba servisu iha ema nia nasaun ne’e mehi ida, bainhira servisu no hetan experiênsia naton bele fahe fila fali ba joven sira iha Timor-Leste.

“Hanesan joven ida ha’u iha mehi hakarak servisu iha ema nia rai no mos iha planu karik ha’u iha ona esperiensia ha’u bele fahe fila fali bá joven sira iha Timor-Leste”.

Traballadora ne’e mos promete bainhira ba servisu iha Nasaun Koreia durante tinan haat hafoin fila mai Timor, sei loke kampu traballu hanesan agrikultor ka fabrika hakiak animal ba joven sira ne’ebé presiza servisu iha Timor-Leste.

“Ha’u servisu iha ne’eba durante tinan 4 nia laran no iha area fábrika no karik ha’u fila fali mai Timor, ha’u sei loke fila fali servisu hanesan agrikultor nian ka hakiak animal hodi fó servisu bá ha’u nia maluk sira ne’ebé presiza servisu”.Nia promete

Heriyanti Tuati mos husu ba joven sira atu labele lakon esperansa no nafatin fiar iha Maromak tanba Maromak sei loke dalan ba buat hotu ne’ebe ema ida-idak dezeja.

“Ha’u nia mensajem bá kolega sira hotu keta lakon esperansa, tau ita nia moris tomak iha Maromak no fiar ba buat hotu maromak sei loke dalan bá ita, tanba antes atu bá servisu ha’u mos hein oportunidade ne’e durante tinan 2 nia laran”. Nia hakotu.

Entretantu, trabalhador ne’ebé sei desloka ba servisu iha Nasaun Korea hamutuk atus ida haat (104), iha area agrikultura total mane 85, feto 11 no re-entry na’in 8.

Jornalista : Ermelinda Soares & Conzita Mota