Sente Laiha Paz, OCITO Hakarak Dom Carlos Fila Mai Timor

SAPNewsTL, Dili – Movimentu Nasionál Solidariedade Amo Bispo Dom Carlos Filipe Ximenes Belo hamutuk ho Organizasaun Komunidade Intelektual iha Timor Leste Oriental (OCITO) husu Estadu Timor-Leste hato’o sidadaun Timoroan nia aspirasaun ba Sua Santidade, Papa Francisco hodi lori fila Amu Bispo Dom Carlos Filipe Ximenes Belo mai Timor-Leste

Portavós Senado Liurai Timor-Leste Aleixo Ximenes hateten, OCITO hamutuk ho liurai senadu  deklara tempu to’o ona hodi lori fila, Amu Bispo Dom Carlo Filipe Ximenes Belo,SDB ne’ebe hela dook husi ninia povu durante tempu naruk nia laran ona mai rai moris fatin.

“Movimentu nasional solidaridade, Amu Bispo Dom Carlo Filipe Ximenes Belo SDB, afirma nia pozisaun hodi hateke ba passadu iha prossesu luta ba libertasaun nasional iha tempu invazaun durante tinan 24 nia laran, maibé liu husi akompanhamentu no komprimisiu Apostóliku nu’udar bibi atan diak ho aten brani, halo intervensaun hodi proteje Jovens” Dehan Portavós Aleixo Ximenes liu husi komunikadu imprensa ne’ebe hala’o iha Farol,Tersa (27/08/2024).

Iha prossesu luta ba libertasaun nasional, foinsa’e sira moris iha perigu nia laran, hetan torturasaun, kastigu, desterradu, lubuk boot ida mate lakon rate laek, halo maubere oan sira lakon esperansa ba liberdade, maibé joven lubuk ida hetan protesaun, hetan hikas hodi hakilar nafatin ba mundu internasional kona-ba brutalidade invasor sira nian.

Senadu Liurai hamutuk ho komponentes nasaun nian ne’ebe halibur malu iha OCITO, hakarak aproveita oportunidade visita Sua Santidade Papa Francisco mai Timor-Leste husu Xefe Estadu, Xefe Governu no Vatikanu hodi fo oportunidade ba Dom Carlos hodi bele fila hikas mai Timor-Leste.

Aleixo Ximenes hatutan, Timor presiza figura ida ne’ebe bele restaura dignidade Timor oan nian, iha tempu ne’ebe Timor Leste atravessa susar no terus mukit oi-oin, degradasaun moral mosu nab-naban, ukun la dun reflete atitude servi nian, fiar lakon ninia valor religioso, no fraternidade humana ne’ebe santa se introduz iha sosiadade nia laran la dun transforma ema nia moris.

“Ami ezize ba Governu atu haruka fila Amu Bispu Dom Carlos Filipe Ximenes Belo atu fila mai  Timor, bainhira hetan vizita husi sua santidade Papa Francisco”.

OCITO nafatin firme ho nia pozisaun hodi ezize Governu Timor-Leste atu responde ba Organizasaun nia ezijensia hodi lori fila Amu Bispu Dom Carlo Filipe Ximenes Belo.

“Ami husu ba Estado vaticanu no Timor-Leste atu tau konsiderasaun as ba sidadaun Timor Leste ninia halerik no aspirasaun,  husu atu Amu Bispu Dom Carlo Filipe Ximenes Belo fila mai Timor-Leste iha tempu badak, tanba la ho prezensa Dom Carlo nian organizasaun sente la iha paz”.

Antes ne’e Senadu Liurai akompanha Amu Bispu Dom Carlos katak bainhira sai husi Timor ba hala’o misaun iha Moçanbique no Áfrika, maske nune’e, maibé to’o ohin laiha ona kontaktu.

Jornalista : Ermelinda Soares