Tribunal Aplika Prizaun Preventiva Ba MML Ne’ebe Deskonfia Halakon Peregrina Nia Vida
Imajem : Inisial MMS iha Suai, 09/07/2025. Foto : Média TJPIS
SAPNewsTL, Covalima : Ligadu ho kazu oho feto ida iha Jakarta-2, Ainaru. Tribunal Judisiál Primeira Instánsia Suai (TJPIS) Aplika Medida Koasaun Prizaun Preventiva ba Arguidu MML tanba deskonfia oho Peregrina da Conceição.
Tuir informasaun ne’ebe Mídia Sapnews asesu liu hosi Pajina Tribunal Judicial Primeira Instánsia Suai haktuir katak arguidu MML deskonfia hakotu vítima Peregrina nia vida iha Jakarta-2 Ainaru, horseik (8/7/25) ne’e tuir ona primeiru interogatoriu iha Tribunal Judisiál Primeira Instánsia Suai no ohin kontinua rona desizaun ba Primeiru Interogatoriu nian.
Iha Primeiru Interogatoriu ne’ebé prezide husi Dra. Patrícia de A. F. B. M. Xavier, ho desizaun katak aplika medida koasaun Prizaun Preventiva ba Arguidu depois kontinua ba investigasaun tuir mai.
Iha kazu refere hanesan Krime Omisídiu Agravadu iha Kódigu Penál 139 alinea f, no moldura penál sei hetan pena prizaun tinan 12 to’o tinan 25.
Ekipa ba Primeiru Interogatoriu ne’e mak hanesan Juiza Dra. Patrícia Xavier, Ministériu Públiku Dr. Rafael Gusmão no Defensór Dr. Nelson Borges.
Antes ne’e, Iha loron 06 fulan Jullu tinan 2025, mais ou menuz tuku 11, komunidade informa ba Polísia Munisipiu Ainaro katak sira hetan mate isin ida hamutuk ho nia motor inklui ekipamentus balun iha rai lolon bo’ot ida. Nune’e parte seguransa to’o kedas iha fatin akontesimentu no halo identifikasaun.
“Servisu Informasaun Polísia (SIP), Servisu Investigasaun Kriminal hamutuk ho Komandu PNTL Munisipiu Ainaro, Komandu PNTL Munisipiu Likisa, ita halo tracking kedas ba informasaun hirak ne’ebe ita rekolla no ikus mai hori-kalan (06/07) iha oras 09:00 kalan, Suspeitu ho inisial M.D ita kaptura iha Munisipiu Dili area Dom Aleixo ninian”.
“Agora dadaun hakarak informa ba públiku katak Suspeitu iha ona Polísia nia liman, iha Sela Detensaun Eskuadra PNTL Dom Aleixo, Comoro”, informa Porta Voz Komandu PNTL Superintendente Polísia João Belo dos Reis Dili, 07/07/2025. Sita Página PNTL
Aktual Diretúr Diresaun Servisu Investigasaun Kriminal Nasional (DSIKN) ne’e salienta tan katak kona-ba kronologia, “ha’u labele koalia iha ne’e tanba hola parte iha Segredu Justisa no agora prosesu investigasaun sei la’o hela. Hakarak informa mós katak mate isin orseik kedas evakua ona mai Dili, agora iha ona Hospital Nasional Guido Valadares (HNGV) hodi hein prosesu Autopsia”.
Tuir informasaun ne’ebe SAPNews asesu katak Peregrina da Conceição husi Munisipiu Likisa ne’e hakotu iis ho idade 23 no mate ho kondisaun grávida ka isin rua.