Tulun Komunidade Afetadu ! Maske Fuan Moras, Naimori La Fo Sala Germano & Xanana

Imajem : Prezidente Partidu KHUNTO Armanda Berta dos Santos hala’o asaun solidariu ba komunidade afetadu eviksaun iha Fomentu, 10/01/2025. Foto : Cejar Tutuhafa

SAPNewsTL, Dili : Partidu Kmanek Haburas Unidade Nasional Timor Oan (KHUNTO) hala’o asaun solidariu hodi tulun vitima evikasaun iha Aldeia Fomentu I & II hodi hakman todan ne’ebe komunidade sira hasoru iha tempu difisil.

Konseleiru Maximu Partidu KHUNTO Jose dos Santos Bucar husu governante sira labele aproveita povu nia diak iha tempu kampanha hodi haluha povu wainhira ukun.

“Ba ha’u ladun diak ba eviksaun ne’ebe halo hosi SEATOU (Sekretariu Estadu Asuntu Toponomia no Organizasaun Urbanu), lolos presiza halo linha kordenasaun ne’ebe diak, governu ida iha atu ukun povu tuir lei , fo hanoin sira no koopera malu hodi kria kondisaun ba ita nia ema sira molok muda sira husi fatin ida ho dignu”.

“Ita labele aproveita deit sira nia diak iha momentu kampanha maibe ita haluha tiha saida mak ita atu halo, sira nia moris lor-loron oinsa, sira sakrifika an ba fa’an sasan, pineira rai-henek, ita haree ida ne’e, ita nia fuan moras haree ida ne’e”.Tenik Konseleiru Maximu Partidu KHUNTO Jose dos Santos Bucar ba SAPNews iha Sede Nasional Partidu KHUNTO Manleuana, 10/01/2025

Imajem : Uma Afetadu Despezu Administrativu Iha Aldeia Fomentu II, Suku Comoro, Dom Aleixo Munisipiu Dili.

Lider Maximu Partidu KHUNTO ne’e konsidera evikasaun ne’e mai hosi orientasaun Primeiru Ministru Kayrala Xanana Gusmão tanba nia mak lidera governu.

“Ita presiza hamutuk hodi ko’alia didi’ak ho povu, oinsa rezolve sira nia problema, dala ruma ita dehan SEATOU maibe SEATOU ne’e rona orientasaun hosi superior mak Primeiru Ministru, ha’u sente katak nia hanoin diak, mais dala ruma ita la besik”.

“Ita presiza prepara kondisaun, nune’e sira bele iha valor umanu, KHUNTO fo apoia natal nian ba komunidade sira, iha festa sira ne’ebe ita hotu kontente, sira barak tanis ho matan-ween, KHUNTO laos foin halo maibe desde uluk halo ida ne’e hodi hatudu ita nia domin ba malu nu’udar Timor oan to’o agora”.

Imajem : Jose dos Santos Naimori Bucar hetan entrevista hosi SAPNews iha Manleuana, 10/01/2025

Naimori mos agradese ba nonu governu konstitusional, nia parte la fo sala ba governu ne’ebe lidera hosi Xanana Gusmão maibe sala mak ida ne’ebe depozita nia konfiansa.

“Ha’u agradese ba governu ida ne’e iha hanoin ne’ebe diak, sala ne’e la’os Avo Xanana mak sala, povu mak fo fiar ba Avo Xanana, ha’u la fo sala ba SEATOU no Avo Xanana, imi mak vota imi mak sala”.

Maske nune’e, maibe Lider Maximu KHUNTO ne’e “fiar katak governu sei haree nia povu, esperansa to’o loron ida governu ida mai sei hadomi ninia povu”. Nia sublinha

Prezidente KHUNTO Armanda Berta dos Santos maka akompanha no oferese ai-han (Fos, Supermie, no Mina) ba komunidade afetadu sira iha fomentu I no Fomentu II.

Imajem : Primeiru-Ministru (PM), Kay Rala Xanana Gusmão

Antes ne’e, Primeiru-Ministru (PM), Kay Rala Xanana Gusmão haktuir katak komunidade ne’ebe hetan eviksaun hosi Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias sei hetan indemnizasaun.

“Hotu-hotu sei hetan, laiha ema ida ne’ebe la hetan indemnizasaun, governu simu ona konta bankaria, governu la’os duni arbiru ninia povu”. Tenik Xanana hafoin reuniaun semanál ho Prezidente Repúblika (PR), José Ramos-Horta iha Palásiu Prezidensiál Bairru-Pité, kinta (09/01/2025).

Xefe Governu aviza bá família hirak ne’ebé seidauk simu indemnizasaun hosi Governu bele haruka karta direta bá Gabinete atu bele orienta Ministériu relevante hodi haree no responde.

Husu mós atu rekolla dadus kompletu kona-bá estudante universitáriu sira ne’ebé mak pertense bá família 288 ne’e hodi aprezenta bá Primeiru-Ministru.

Governu hakarak salva família hirak ne’e tanba konstrui uma iha área ne’ebé mak risku tebtebes hosi inundasaun, no realidade hatudu katak iha uma lubuk ida mak mota Comoro lori iha 04 Abril 2021 bainhira akontese udan boot durante kalan tomak.

Rosalia da Silva

Tuir dadus ne’ebe SAPNews asesu katak uma kain hamutuk 361 mak lakon hela fatin tanba konsidera hela iha fatin risku.

Komunidade balun mos governu fasilita ona ho transporte hodi fila fali sira nia rai moris fatin, komunidade afetadu sira mai hosi RAEOA, Ermera, Likisa, Manatutu, Aileu, Baukau, Lautem, Bobonaru inklui munisipiu sira seluk, entre sira balun mos deside hela fatin iha kos no la fila ba munisipiu.

Jornalista : Dircia Baptista Belo