Xefe Aldeia Alaira, Maktoban Oscar Husu Jerasaun Foun Prepara An Didiak
Imajem : Entrevista Xefe Aldeia Alaira, Oscar Faria iha Luro, 21/11/2024.
SAPNewsTL, Lautèm : Xefe Aldeia Alaira, Suku Luro, Postu Administrativu Luro, Oscar Faria hakotu nia peregrinasaun iha mundu tanba sofre moras kanker. Antes ne’e Maktoban Oscar husu ba jerasaun foun sira hodi estuda makaas no prepara an tanba futuru iha joven sira nia kabaas.
Xefe Aldeia Alaira, Oscar Faria hakotu iis hori-kalan haleu tuku 10, loron 25 Fulan Novembru Tinan 2024. Oscar remata nia peregrinasaun iha mundu tanba sofre moras kanker.
Antes ne’e, maske moras, maibé wainhira jornalista SAPNews tenta ba halo komfirmasaun no intervista nia kona-ba problema komunidade Alaira nian, nia parte koopera diak tebes hodi dada lia.
Durante entrevista, Oscar Faria hateten komunidade Alaira susar ba problema bee no problema estrada tanba kleur tebes ona seida’uk hadia to’o ohin loron, tan ne’e nia parte husu ba governu liliu Ministériu Obras Públikas (MOP) hodi toma atensaun.
“Komunidade Alaira nia problema esensial mak estrada aat no falta bee-moos, ha’u husu ba governu hodi bele tau matan ba preokupasaun ida ne’e”. Hateten Xefe Aldeia Alaira, Maktoban Oscar Faria iha Luro, 21/10/2024.
Ligadu ba lider no lideransa, Maktoban Oscar dehan atu dezenvolvimentu ba oin, nasaun la’o ba di’ak maka lideransa lokal tantu nasionál presisa hamutuk iha hanoin no hahalok, oinsa bele hadia no hametin estadu de direitu no demokrátiku.
“Lider no lideransa tenki hamutuk iha hanoin no hahalok maka bele lori dezenvolvimentu ba povu no nasaun tanba lider ida mesak nia lavele hatene buat hotu no halo buat hotu, lider presiza rona malu, respeitu malu no konsidera malu iha kontextu demokrasia, konstrusaun estadu no nasaun”. Maktoba sublinha. Arkivu SAPNews
Ba jerasaun foun sira, Maktoban ne’e dehan, futuru iha joven sira nia liman, joven mak futuru, fini no esperansa nasaun nian tan ne’e joven tenki prepara an, estuda makaas no aprende barak hodi simu todan nasaun nian iha loron aban bainrua.
“Jerasaun foun tenki estuda, aprende barak no prepara an didiak tanba futuru iha joven sira nia kabaas, kleur ka sedu, todan ka kmaan, Aldeia, Suku, Postu, Munisipiu no nasaun nia ukun sei entrega ba joven sira hodi tutur no leba ba oin, ami sira ne’e otas daudaun ona, imi tenki hateke ba dook no ba oin nafatin”. Maktoban realsa
Fo hanoin fali katak, Maktoban Oscar Faria asume responsabilidade hanesan Xefe Aldeia Alaira ba periodu datoluk, enkuantu iha periodu ne’e ladauk kompleta destinu mai, Maromak bolu ona nia hodi fila ba Maromak nia kadunan santu hodi deskansa.
“Ha’u la’o to’o ona rohan, ha’u mai saran ba ita, ho buat hotu ne’ebe ha’u halo iha moris ne’e”. Salmu Responsorial
Maktoban Oscar Faria ba hamutuk ho Maromak, la’o ho Maromak no horik ho Maromak iha nia ksolok, roman no damen rohan laek. adeus no adeus. Obrigadu barak ba dedikasaun tomak.
Jornalista : Ekipa Kobertura