𝗔𝗴𝗿𝗲𝘀𝗮𝘂𝗻 𝗙𝗶𝘇𝗶𝗸𝘂 𝗜𝗵𝗮 𝗨𝗡𝗗𝗜𝗟 ! 𝗨𝗣𝗝𝗧𝗟, 𝗔𝗝𝗧𝗟 & 𝗧𝗟𝗣𝗨 𝗛𝗼 𝗩𝗶𝘁𝗶𝗺𝗮 𝗞𝗲𝗶𝘅𝗮 𝗕𝗮 𝗠𝗣

SAP News, Díli : Relativamente ho kazu agresaun fiziku hosi estudante UNDIL hasoru jornalista ne’ebe hetan lamentável hosi UPJTL, AJTL, no TLPU mala assosiasaun jornalista sira hamutuk ho vítima hato’o ona keixa ba Ministériu Públiku (MP) hodi processo tuir dalan legal.

Presidente UPJTL Horácio Babo deklara associação jornalista sira la tolera agresaun fiziku hosi ema se deit halo hasoru jornalista tanba jornalista la’os kriminozu hodi ema tula liman.

“Ohin, Asosiasaun Jornalista tolu hanesan AJTL, UPJTL no TLPU, ami akompaña kolega jornalista ida ne’ebé iha tersa-feira liu ba halo kobertura iha Universidade Dili ne’ebe hetan baku husi oknum estudante balun, ami akompaña mai iha Ministeriu Públiku atu hato’o keixa no prosesa tuir dalan legal”.

“Ita hotu hatene dala barak jornalista halo nia atividade tuir lei komunikasaun sosiál hatudu katak jornalista tenke livre asesu ba ne’ebe deit maibe iha tersa-feira liu ba kolega lubuk ida ba halo kobertura iha universidade ne’e sira maka konvida, estudante sira rasik maka baku fali ami nia kolega jornalista”. Hatete Presidente UPJTL Horácio Babo ba jornalista sira iha Ministério Público Matadouro, 23/10/2025

Lider Assosiasaun jornalista ne’e hatutan, “inisiu ami nia keixa ne’e ba oknum estudante sira ne’ebe halo violasaun ba ami-nia jornalista ne’e, depois prosesu tomak ba oin maka ita sei haree”.

“Ami hato’o ona keixa no hein prosesu tuir mai, iha prosesu justisa entrega ona, depois ita hein deit prosesu, ami prontu atu kompleta tan buat ruma no ohin ami mai mós lori evidênsia sira hanesan video no kronolojia ne’ebe akontese ami prepara no hatama hotu iha Ministeriu Públiku”.

Ligadu ho liafuan deskulpa ne’ebe hato’o hosi Estrutura UNDIL, Horácio Babo afirma nia parte simu deskulpa maibe prosesu legal kontinua ba oin hodi hetan justiça ba aktu ne’ebe estudante sira komete.

“Buat ida deskulpa, ba kazu sira baibain ita nafatin simu maibe buat ida krime nia dalan maka ita tenke liu husi prosesu justisa, laos ba jornalista deit, ba se deit bainhira temi ona krime tenke liu husi prosesu justisa, nune’e bele tuir julgamentu depois to’o iha tribunal se mak loos no se mak sala”.

“Jornalista mos ema, laos konvida ba halo kobertura depois to’o iha ne’eba, ita-boot sira tula fali liman ba jornalista ne’e lae. Mai ita hotu kontribui ba dame no estabilidade, labele buat kiik ka boot halo violensia, laiha dalan ba violénsia, violensia ba jornalista nia fatin maka tenke liu husi keixa hodi prosesa”.

Horácio dehan, “Ami prontu rezolve hodi ko’alia ba malu karik universidade ka estudante sira hakarak bolu ko’alia, ita koalia maibe prosesu krime ita nafatin avansa ba oin. Jornalista laos kriminozu ne’e para imi baku no laiha dalan atu baku jornalista, se deit”.

Presidente UPJTL ne’e reformas jornalista maka liman, ain no fontes ba informasaun, “ami fasilita informasaun ba públiku ba se deit, ba estudante, povu baibain no lider sira hotu, ami rekolla informasaun atu públika ba imi, husu imi atu respeita no valoriza ami nia servisu laos buat kiik imi baku jornalista”.

Notisia relevante :

𝗖𝗜𝗧𝗟 𝗞𝗼𝗻𝗱𝗲𝗻𝗮 𝗔𝗸𝘁𝘂 𝗘𝘀𝘁𝘂𝗱𝗮𝗻𝘁𝗲 𝗨𝗡𝗗𝗜𝗟 𝗔𝗺𝗲𝗮𝘀𝗮 𝗝𝗼𝗿𝗻𝗮𝗹𝗶𝘀𝘁𝗮, “𝗩𝗶𝗼𝗹𝗮 𝗗𝗶𝗿𝗲𝗶𝘁𝘂 𝗣𝘂́𝗯𝗹𝗶𝗸𝘂 𝗔𝘀𝗲𝘀𝘂 𝗜𝗻𝗳𝗼𝗿𝗺𝗮𝘀𝗮𝘂𝗻”.

SAP News, Dili : Relativamente ho kazu agresaun fiziku hosi estudante UNDIL hasoru jornalista, Conselho de Imprensa de Timor-Leste (CITL) espresa nia preokupasaun no lamentasaun profunda ba insidente ne’ebé akontese iha resintu Universidade Dili hasoru jornalista ne’ebé hala’o knaar atu halo kobertura ba konferénsia imprensa.

Daniel da Silva & Antonina Lopes – Mídia Sapnews

Presidente Konsellu Imprensa, Antônio Moniz Mali deklara ba públiku katak mídia nu’udar pilar dahaat ne’ebé kontribui ba haburas demokrasia hodi promove transparénsia, defende lia-loos, justisa no sai lian ba ema lian laek sira.

“Nune’e, husu ba públiku atu respeita knaar media no jornalista nian hodi kria ambiente ne’ebé livre no seguru atu mídia bele hala’o sira nia funsaun ho di’ak hodi bele serbi públiku ho informasaun ne’ebé loos no kredivel”. Hateten Presidente Konsellu Imprensa (KI) Antonio Moniz Mali iha Salaun KI Kintal-Boot, 23/10/2025.

Antonio Mali konsidera hahalok impede knaar jornalista nian la’ós de’it viola Liberdade Imprensa no Liberdade Espresaun maibé mós viola públiku nia direitu atu hetan informasaun, direitu ne’ebé konsagra iha konstituisaun República Democrática Timor-Leste (RDTL).

Conselho de Imprensa espresa lamentasaun ne’ebé kle’an ba aktu ofensa integridade fízika simples hodi impede ona jornalista sira ezerse sira-nia funsaun iha espasu públiku, ho pozisaun sira tuir mai ne’e.

1. Apela ba instituisaun ensinu superiór no institusaun hotu-hotu atu garante espasu ne’ebé seguru no livre atu jornalista sira bele ezerse sira-nia funsaun ho livre.
2. Enkoraja jornalista no mídia sira hotu atu kontinua hala’o knaar ho profesionál, nakonu ho responsabilidade tuir Kódigu Étika Jornalista nian.
3. Apela ba Órgaun Komunikasaun Sosiál sira wainhira emprega pesoal ruma sai jornalista iha ita-boot sira-nia mídia, mínimu liu tenke iha kartaun estajiáriu atu asegura jornalista sira-nia direitu wainhira ezerse funsaun jornalístika nian iha terenu.
4. Reafirma kompromisu Conselho de Imprensa nian atu kontinua defende Liberdade Imprensa, Liberdade Espresaun hodi garante públiku asesu informasaun ne’ebé kredivel no firmi defende mídia no jornalista iha situasaun ameasa nia laran.
5. Conselho de Imprensa louva asosiasaun jornalista sira ne’ebé rápidamente responde lalais kedas ba insidente refere ho deklarasaun no pozisaun ne’ebé eziji responsabilidade husi autór sira ne’ebé komete ofensa integridade fízika hasoru jornalista SAP News TL iha Kampus UNDIL. Espera insidente refere sei la akontese tan iha loron oin mai.

Líder orgaun regulador ba komunikasaun sosial ne’e afirma konsellu imprensa sei akompanha kazu ne’e iha prosesu justiça to’o hetan rezultadu final.

Iha fatin hanesan, Diresaun Analise no Dezenvolvimentu Midia (DADM) Alberico da Costa Junior kondena aktu agresaun fizika, violensia no impedimentu hasoru jornalista.

“Aktu hirak ne’ebe hanesan agresaun fizika ou violensia, impedimentu hasoru jornalista nian, klaru konselu imprensa nia pozisaun katak ne’e kondena ida ne’e, iha pais demokrátiku, oinsa ita hamutuk liberdade imprensa ne’e diak para sidadaun sira bele asesu ba informasaun ne’ebe diak”.

“Ba oin ita presiza evita mos labele live streaming ba asuntu ne’ebe sensitivu hanesan violensia bazeia ba jeneru, razaun tanba oinsa ita atu tane as dignidade umana nian”.

Ligadu ho jornalista ne’ebe hasoru ameasa maibe hili nonok no la halo asaun, Altino apresia ho jornalista sira ne’ebe mak hatudu sira-nia profisionalismu.

“Wainhira iha terenu estudante universitariu sira halo asaun agresaun no ameasa sira, maibe sira la halo asaun krime, ida ne’e ezemplu ne’ebe diak teb-tebes ba kolega jornalista sira, nafatin husu ba kolega jornalista sira labele tauk no rende wainhira defende maluk hirak ne’ebe mak la iha lian tantu estudante no populasaun”.

Altino mós husu jornalista sira hamrik hodi defende lialos, wainhira jornalista sira defende lialos, jornalista sira sei la mesak.

Notisia relevante :

𝗘𝘀𝘁𝘂𝗱𝗮𝗻𝘁𝗲 𝗔𝗺𝗲𝗮𝘀𝗮 𝗝𝗼𝗿𝗻𝗮𝗹𝗶𝘀𝘁𝗮 ! 𝗔𝗝𝗧𝗟, 𝗧𝗟𝗣𝗨 & 𝗦𝗔𝗣𝗡𝗲𝘄𝘀 𝗞𝗼𝗻𝗱𝗲𝗻𝗮 & 𝗗𝗲𝗸𝗹𝗮𝗿𝗮 𝗞𝗲𝗶𝘅𝗮 𝗕𝗮 𝗠𝗶𝗻𝗶𝘀𝘁𝗲́𝗿𝗶𝘂 𝗣𝘂́𝗯𝗹𝗶𝗸𝘂

SAPNewsTL, Díli : Relasiona ho agresaun fizika entre onkum estudante Universidade Díli (UNDIL) balun, hasoru jornalista média SAPNews Marino Pinto, Asosiasaun Jornalista Timor Lorosa’e (AJTL) hamutuk ho Timor-Leste Press Union (TLPU) no instituisaun média SAPNews deklara, la tolera aktu violentu ne’ebe komete husi estudante hasoru jornalista.

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋

Prezidente AJTL, Zeovonia Viera hatete, AJTL kondena maka’as aktu violentu no bullying hasoru jornalista, tanba estudante balun pratika brutalismu hasoru jornalista iha area kampus UNDIL.

“Ami husi AJTL sei foti asaun legál hasoru ema sira ne’ebé komete agresaun fiziku hasoru jornalista sira tuir Lei Komunikasaun Sosiál, Artigu 4”.Dehan Prezidente AJTL Zeovonia Viera, liu husi Konferénsia Imprensa iha salaun AJTL Fatuhada, Quarta-Feira, (22/10/2025)

Lideransa AJTL ne’e fundamenta, AJTL husu ba akadémiku no universitáriu sira atu respeita kanál mídia no respeita jornalista, bainhira sira hala’o atividade jornalístiku iha terenu ba kualker asuntu ne’ebé iha ligasaun ho interese públiku.

“Ami husi AJTL prontu fó apoiu ba vitima jornalista ne’ebe hetan agresaun fizika. Ami prontu kolabora ho SAPNews prosesa kazu ne’e ba Ministeiru Publiku tuir dalan legal” Tenik Zevonia.

AJTL Ezjije ba Conselho de Imprensa nu’udar instituisaun independente estadu nian ne’ebé defende no asegura liberdade imprensa no liberdade espresaun atu foti asaun ruma kona-ba aktu violentu hasoru jornalista sira.

Husu mós ba jornalista sira atu mantein kumpri Kódigu Étika Jornalizmu no prinsípiu universal jornalizmu nian nu’udar padraun étika no matadalan morál iha kontestu kobertura no publikasaun notísia.

AJTL mós husu ba jornalista no kanál mídia hotu-hotu atu evita halo live streaming ba asuntu sensitivu sira, hanesan asedu no violénsia seksuál atu garante no asegura nafatin prinsípiu prezunsaun inosénsia ka azas praduga tak bersalah no asegura dignidade umana sobrevivente sira-nian.

Husu ba Kanál mídia sira bele halo deit offline news, nune’e fasil atu halo konfirmasaun ho parte sira hodi halo notísia justu no balánsu.

Iha fatin hanesan, Prezidente TLPU Candido Alves afirma, nia parte sente triste tanba liberdade imprensa Timor-Leste nian, laos ema seluk mak harahun maibé, estudante universitariu sira mak hatudu hahalok brutalismu hasoru jornalista, hodi harahun liberdade imprensa.

“Ha’u triste tebes tanba Liberdade Imprensa la’os harahun husi ema seluk, maibé harahun rasik husi estudante universitariu sira, hahalok ida ne’e TLPU triste tebes, tanba ne’e TLPU hamutuk ho vitima no AJTL hakarak afirma katak ami la tolera hahalok ida ne’e”.

Nia haktuir Konstituisaun RDTL garantia liberdade ba jornalista hodi hala’o kobertura, sein limitasaun husi grupu ka individu balun, ne’ebe tenta impede servisu jornalista nian.

“Ita-nia konstituisaun fó dalan ba jornalista sira atu halo kobertura ba asuntu ne’ebe sai preokupasaun ba públiku, karik públiku ne’ebe la aseita ho produtu jornalista nian, bele hato’o keixa ba Konsellu Imprensa tanba Lei komunikasaun sosial fo dalan, maibé laos hatudu jagoan hasoru jornalista”.

Enkuantu vitima Marino Pinto, deklara katak, nia parte hetan agresaun fizika direita husi estudante UNDIL balun, nune’e nia hili dalan nonok, maske estudante balun ho emosional hakilar no dudu nia atu sai husi resintu UNDIL nian.

“Ha’u ho ekipa ba kampus UNDIL tanba ami hetan konvite husi vitima asediu sexual, maibé ami to’o iha ne’eba estudante sira, hakilar ha’u dehan duni nia sai husi ne’e, se mak haruka nia mai, sira konsege buti ha’u nia faru iha kakorok, dudu ha’u, sira barak hobur mai ha’u atu baku ha’u” Dehan Mariano

Vitima hatutan, aktu ne’ebe estudante sira komete, dalaruma estudante sira la kompriende papel jornalista nian, tanba ne’e sira impede kobertura jornalista nian.

“Kazu ne’e ha’u senti ofendidu, entaun ha’u hamutuk ho AJTL no TLPU sei lori kazu ne’e ba oin tuir dalan legal, tanba ha’u agresaun fisika husi estudante sira”.

Porta voz Mídia Sapnews Ermelinda Soares hateten desentendimentu ne’ebe akontese iha resintu kampus Universidade Dili (UNDIL) iha loron 21 Outubru 2025 maiz ou menuz haleu tuku 10 liu, iha ne’ebe estudante vítima asédiu seksuál konvida mídia atu halo kobertura kona ba konferénsia imprensa kontra dosente inisial MLS, maibe infelizmente konferénsia imprensa ne’e hetan impedimentu tanba la hetan autorizasaun ba fatin.

“Hafoin simu konvite kobertura, wainhira jornalista sira hosi mídia to’o iha resintu Kampus UNDIL, estudante sira husu ba jornalista SAPNews dehan “se mak haruka imi mai, konvite iha ne’ebe, hatudu se mak assina”, nune’e hatudu konvite ba sira, hafoin sira nonok hodi fila kotuk. Bainhira laiha ona desizaun atu halo konferénsia iha resintu UNDIL, jornalista sira deside atu husik fatin, estudante sira hatudu expertu, hakilar hodi dudu, duni no hakilar jornalista sira hodi sai hosi resintu UNDIL” Dehan Porta voz Ermelinda Soares

Porta Voz konta antes husik resintu UNDIL, hatan ba reasaun hosi dosente no estudante UNDIL, Jornalista Mídia SAPNews Marino de Deus Pinto dehan “ami mai tanba hetan konvite atu halo kobertura kona-ba konferénsia imprensa hosi vítima asédiu sexual iha UNDIL”, no iha momentu ne’e estudante sira ba kaer Jornalista Marino ninia faru gola no rasta besik ba kakorok no dudu hodi sai hosi kampus, nune’e vítima ne’e hili nonok hodi husik fatin.

“Durante dezentendimentu, Estudante UNDIL sira dehan, “Ami la presiza, imi jornalista mai halo saida.” iha tempu hanesan, Estudante balun mós husi kotuk dehan “tau no duni sai tiha”, nune’e jornalista ne’ebe presente iha fatin akontesimentu sente tauk no nonok deside sai hosi fatin no kontinua ba Farol hodi halo kobertura ba konferénsia imprensa hosi vítima sira tanba estrutura UNDIL la aseita halo iha resintu kampus”.

Nia haktuir bainhira estudante kaer faru gola jornalista Marino de Deus Pinto hodi rasta sa’e ba kakorok no hakilar dehan, “labele arogánsia iha ne’e, rona ka lae”, nune’e Jornalista Marino hatan, “ha’u mai kobertura”, estudante sira hakilar tan, “kartaun iha ne’ebé”, vítima seidauk hatudu kartaun, sira dudu lisuk, nune’e jornalista Marino deside ses an tanba hetan presaun makaas.

“Ami solidariza kolega jornalista Marino de Deus Pinto no kolega jornalista sira hotu ne’ebé mak simu liafuan insultu, maltrata no sente traumátiku husi Sivitas Akademiku UNDIL nian, ne’ebé la komprende no la hatene serbisu jornalista nian iha estadu direito no demokratiku”

Porta voz SAP News TL ne’e reafirma liu hosi konferénsia imprensa ne’e hateten :

1. Ami hamutuk ho vítima sei prosesa kazu ne’e ba iha konsellu imprensa no Polisia Nasional Timor-Leste hodi enkamiña ba ministeriu públiku hodi hetan justisa no naran di’ak knar lulik jornalista nian.
2. Ami husu ba Prezidente Fundasaun Boacril atual Primeiro Ministro Kay Rala Xanana Gusmão no Reitor UNDIL Sr. José Belo atual Prezidente CNE atu klarifika no foti medidas ruma hasoru oknum sira ne’ebé halo agresaun fiziku hasoru Jornalista Marino de Deus Pinto no jornalista sira ne’ebé marka prezente iha fatin akontese.
3. Husu ba Dekanu fakuldades, diretores departamentu, dosentes no estudante sira hotu iha UNDIL atu respeita serbisu jornalista nian ba liberdade imprensa no expressão tanba ita hotu moris iha estadu direitu no demokrátiku, ita tenki komunga valor demokrasia, prinsipiu direitus humanos no hatur justiça iha instituisaun hotu-hotu. Tanba atividade ne’e planeadu no organizadu husi vitima sira laos jornalista sira mak ba.
4. Husu ba sosiedade no akademikas tomak atu labele sai portavoz ka guardiaun ba kriminozu sira hodi taka dalan ba mídia atu halo notisia investigativu hodi fo sai lialos, justiça no halian lian laek sira lian liliu feto, labarik no ema vulnerável sira ne’ebe sai vítima iha sosiedade inklui instituisaun sira privadu no públiku.
5. Husu ba sosiedade tomak tantu sivis no militares, akademiku sira no públiku enjerál atu respeita no fo espasu ba jornalista sira hodi hala’o ninian knaar, basa jornalista mak sai matan, tilun no ibun no sai lian ba lian lae sira.
6. Ikus liu, husu ba vitima no familia vitima sira atu labele tauk koalia sai lia los, tanba lialos la mate, lialos sempre manan no lialos mak dalan ba sivilizasaun, assegura direitos humanos no igualdade.

Enkuantu, ligadu ho akontesimentu desrespeitu ba liberdade imprensa no tenta ameasa jornalista ne’e, Estrutura Mídia SAPNewsTL hamutuk ho AJTL & TLPU hola desizaun hodi keisa autor sira ba Ministériu Publiku iha loron (23/10/2025) hodi prosesa tuir dalan legal no buka justiça ba vítima agresaun fíziku.