𝗛𝗮𝘁𝘂𝗱𝘂 𝗞𝗼𝗺𝗽𝗼𝗿𝘁𝗮𝗺𝗲𝗻𝘁𝘂 𝗗𝗶𝗮𝗸 𝗜𝗵𝗮 𝗥𝗲𝗶𝗻𝘂 𝗨𝗻𝗶𝗱𝘂 ! 𝗣𝗠 𝗫𝗮𝗻𝗮𝗻𝗮 : “𝗜𝗺𝗶 𝗦𝗮𝗶 𝗘𝗺𝗯𝗮𝗶𝘅𝗮𝗱𝗼𝗿 𝗧𝗶𝗺𝗼𝗿 𝗡𝗶𝗮𝗻”

Imajem : Primeiro Ministro Kay Rala Xanana Gusmão hasoru malu ho traballador timoroan iha Reinu Unidu, 20/09/2025. Foto : Media GPM

SAP News TL, Londres : Durante vizita ba Reinu Unido, Primeiru-Ministru (PM), Kay Rala Xanana Gusmão apresia tebes timoroan sira tanba moris iha unidade, sempre rona-malu, servisu makaas, respeita-malu, tulun-malu no hadomi malu.

“Hahalok ida-ne’e mak hatudu katak, imi idaidak sai embaixadór Timor nian iha ne’e. Tenke hanesan ne’e nafatin atu hatudu katak ita diferente oitoan iha buat sira ne’e. Diferente iha domin, iha dame, nune’e misaun ne’ebé imi kumpre daudaun bá imi nia-an rasik, imi-nia família, nu’udár sidadaun Timor ema bele dehan katak loos duni Timoroan sira hatene komporta ho di’ak no hatene halo servisu,” Dehan Primeiru-Ministru Xanana Gusmão iha Londres, sábadu (20/09/2025). Sita Média GPM

Xefe Governu konsidera Timoroan sira-nia komportamentu di’ak iha servisu fatin hatudu katak, povu Timor ne’e povu ida ne’ebé reziliente, iha espíritu korazoju no povu ida ne’ebé hatene buka moris.

Xanana Gusmão louva no rekoñese Timoroan sira mai iha Reinu Unidu komporta di’ak tanba Povu Timor mai ho nia istória nasaun nian ne’ebé harii iha tempu difísil no mai duni ho situasaun ahu kdesan.

Nune’e, Xefe Governu husu bá inan-aman sira tenke haktuir nafatin istória nasaun nian bá oan sira ne’ebé moris iha Reinu Unidu atu hatene no hadomi nafatin rai Timor Lorosa’e maski dook.

Primeiru-Ministru dehan, ohin loron akonstese problema iha nasaun oioin, problema iha fatin oioin, maibé hakarak hateten katak, iha situasaun sira hanesan ne’e mak hanesan Timoroan tenke komporta di’ak tanba bainhira komporta di’ak maka ema sei respeita nafatin nu’udár Timoroan.

“Husu bá Timoroan sira ne’ebé iha-ne’e atu aproveita hodi aumenta imi-nia kbiit iha hanoin, aprende halo buat ruma. Apresia ho imi iha-ne’e tanba imi sempre haruka buat ruma bá ho imi nia kosar-been, esforsu no kompromisu bá imi nia-an, família no ita-nia nasaun,” Kay Rala Xanana Gusmão apresia.

Iha fatin hanesan Embaixadór Timor-Leste iha Reinu Unidu, João Paulo da Costa Rangel agradese bá prezensa Primeiru-Ministru nian iha Reinu Unidu, ne’ebé sai hanesan momentu istóriku tanba iha oportunidade ida-ne’e loke kedan konsuladu iha Belfast kapitál Northern Ireland’s. Foin lalais loke ona konxuladu iha Glasgow, no semana oin sei loke tán konsuladu iha Greenwich.

“Signifika kada kantu iha Reinu Unidu eziste ita-nia bandeira nasionál. Ida-ne’e ita agradese bá apoiu tomak hosi ita-nia Governu ne‘ebé fó duni prioridade bá ita hotu,” João Paulo da Costa Rangel agradese.

Embaixadór ne’e relata bá Xefe Governu katak, to’o ohin loron embaixada prodús ona passaporte 3.000-resin bá Timoroan sira iha Reinu Unidu, Billete Identidade (BI) prodús ona 2.000 bá Timoroan sira ne’ebé moris iha Reinu Unidu, Embaixada mós prossesa hela sira-nia Sertidaun Moris nune’e maski sira iha hela Reinu Unidu maibé nunka haluha sira-nia rai doben oríjen Timor Lorosa’e.

Diplomata Timoroan ne’e mós atualiza katak, iha tempu badak Reinu Unidu sei loke Embaixada iha Timor-Leste.

Iha tempu badak Timor-Leste sei tama bá Association of Southeast Asian Nations (ASEAN), no Reinu Unidu hanesan parseiru diálogu ho ASEAN tomak signifika, dalan sei nakloke lu’an liu-tán.

Antes ne’e mós Embaixada TL iha Londres propoin ona bá Governu Reinu Unidu atu bainhira loke Embaixada iha Dili tenke loke seksaun vistu ki’ik ida nune’e fasilita di’ak liu-tán Timoroan sira no ofisiál sira ne’ebé hakarak hala’o servisu no hakarak aplika mai Reinu Unidu fásil liu-tán no labele mai-tán ona iha Jakarta.

Durante reuniaun ne’e, Timoroan sira mós husu Xefe Governu hodi esplika no atualiza kona-bá situasaun polítika no progressu dezenvolvimentu iha Timor-Leste.

Primeiru-Ministru hala’o reuniaun ho Timoroan sira iha okaziaun vizita traballu no programa enkontru estratéjiku ho Konselleiru Superiór no ekipa jurídika kona-bá kestaun Fronteira Terrestre no Marítima iha Londres, durante loron rua 19 to’o 20 setembru 2025, hodi esplora estratejia kona-bá saida mak Timor-Leste (TL) sei defende iha negosiasaun da-huluk ho Indonézia kona-bá Fronteira Marítima iha inísiu Dezembru 2025.

Reuniaun ne’e akompaña hosi Diretora Ezekutiva Gabinete Fronteira Terrestre no Maritima (GFTM) atuál Xefe Gabinete Primeiru-Ministru (GPM), Elizabeth Exposto ho ekipa.