𝗝𝗼𝘃𝗲𝗻 𝗧𝘂𝗱𝗮 𝗠𝗮𝗹𝘂 ! 𝗠𝗮𝗸𝗶𝗸𝗶𝘁 𝗞𝗮𝗲𝗿 𝗦𝘂𝘀𝗽𝗲𝗶𝘁𝘂 𝗡𝗮’𝗶𝗻 𝟰 & 𝗩𝗶𝘁𝗶𝗺𝗮 𝗙𝗲𝘁𝗼 𝗡𝗮’𝗶𝗻 𝟮

Imajem : PNTL halo investigasaun ba suspeitu & vítima ba kazu tuda malu iha Markoni, 07/09/2025. Foto : Serviço Relações Públicas

SAPNewsTL, Dili : Polisia Nasional Timor-Leste (PNTL), liu hosi Servisu Informasaun Polísia Makikit Ekipa Alfa junta ho Eskuadra PNTL Dom-Aleixo, asegura joven na’in haat ne’ebe envolve iha kazu grupu rua tuda malu no rezulta lampu rahun inklui moru embaixada Camboja kuak.

Polisia Nasional Timor-Leste (PNTL), liu hosi Servisu Informasaun Polísia Makikit Ekipa Alfa junta ho Eskuadra PNTL Dom-Aleixo, asegura ona joven mane nain-4 ho naran inisial ODCX (24), AP (25), EDC (21) ne’ebé perturba ordem publika iha loron domingu, mais a menus tuku 2 madrugada iha area Marconi, Suku Campo Alor, Postu-Administrativu Dom-Aleixo, Munisípiu Dili.

“Iha fatin akontesimentu iha mos Embaxada hosi Nasaun Kambodia nian tenta tuda hodi rezulta lampu moru nian iha haat (4) maka rahun, vidru andar leten no-mos moru mos koak tanba suspeitu sira ne’ebe hodi Aisuak maka fai”. Sita Média PNTL, Serviço Relações Públicas iha Dili, 07/09/2025

Hafoin simu informasaun hosi fontes katak iha joven grupu 2 tuda malu iha area Marconi hodi rezulta uma komunidade nian hetan estragus no halo paniku Kopru Diplomata sira ne’ebe hela iha area refere.

Ho informasaun hirak ne’e ekipa Makikit to’o kedas iha fatin akontesementu no joven sira kontinua tuda hasoru ekipa servisu inklui Ofisial Polisia Suku (OPS) Kampo-Alor ne’ebé tenta halo aprosimasaun ho grupu hirak ne’e.

“Sente ameasadu, ekipa lansa tiru ba grupu rua hodi hafahe malu no kontinua duni tuir hodi rezulta joven nain 4 hetan kapturasaun inklui vitima feto nain-2 ho naran TAN (20) no DMAR (16) ne’ebe hetan baku iha area refere”.

Hafoin asegura suspeitu nain-4, ekipa servisu transporta no entrega kedas suspeitu sira ba iha Servisu Investigasaun Kriminál (SIK) Dom Aleixo, hodi halo prosesu investigasaun nune’e bele hatene motivu hosi akontesementu ne’e.