𝗠𝗮𝗻𝗲𝗶𝗿𝗮 𝗥𝗲𝗷𝗶𝘀𝘁𝘂 𝗢𝗻𝗹𝗶𝗻𝗲, 𝗛𝗮𝗵𝘂 𝟬𝟴 𝗧𝗼’𝗼 𝟭𝟮 𝗦𝗲𝘁𝗲𝗺𝗯𝗿𝘂

Imajem : SEFOPE Rogério de Araújo Mendonça ofisialmente loke aplikasaun online iha Kaikoli, 08/09/2025

SAPNewsTL, Dili : Sekretáriu Estadu Formasaun Profissional no Empregu (SEFOPE) loke vaga ba Programa Empregador Seasonal Rekoñesidu (RSE), timoroan bele rejistu liu hosi link tuir.

Marciana Da Conceição – SAP News

𝐀𝐭𝐮 𝐛𝐞𝐥𝐞 𝐚𝐩𝐥𝐢𝐤𝐚, 𝐟𝐚𝐯𝐨́𝐫 𝐢𝐝𝐚 𝐡𝐚𝐥𝐨 𝐭𝐮𝐢𝐫 𝐩𝐚𝐬𝐮 𝐬𝐢𝐫𝐚 𝐭𝐮𝐢𝐫𝐦𝐚𝐢 𝐧𝐞’𝐞:

1. Lee kriteriu elijibilidade hotu-hotu ho di’ak no loos; detallu sei aneksa iha pajina tuir mai.

Click iha nee hodi hare detaillu: http://dnee.sefope.gov.tl/wp-content/uploads/2025/09/RSE-Online-Application-Details_SEFOPE_DNEE_V1_2025.pdf

Click iha nee hodi hare maneira registu: http://dnee.sefope.gov.tl/wp-content/uploads/2025/09/RSE-Application-Timor-Leste-2025-Step-By-Step-Guideline.pdf

2. Prepara dokumentu hotu ne’ebé presiza ho di’ak, molok rejista.

3. Asesu ba sítiu aplikasaun online ne’e sei liu husi link ne’e: https://timorleste.pacificlabour.org/register

4. Hare ho didi’ak formuláriu ne’e,” asegura katak tenki priense informasaun hotu-hotu no submete/upload dokumentu sira ne’ebé presiza.

5. Bainhira kompleta tiha, klike “Submete aplikasaun” atu kompleta Ita-nia aplikasaun online

SEFOPE liu husi Diresaun Nasional Empregu Estranjeiru (DNEE) loke ona vaga Nova-Zelándia liu husi rejistu online ba timoroan sira ne’ebe iha interese ba aplika programa RSE

“Ohin loron ualu (8) setembru 2025 IX governu liu husi (SEFOPE), ofisialmente loke vaga online halo rekrutamentu ba trabalhador sira ne’ebe mak atu ba serbisu iha nasaun Nova-Zelándia, iha programa RSE nian” Dehan Sekretáriu Estadu Rogério liu husi Komunikadu Imprensa, Iha salaun SEFOPE Kaikoli, Segunda (08/09/2025)

Aplikasaun Online

Programa “Empregador Sazonal Rekoñesidu (Recognised Seasonal Employer – RSE)”

Programa ida-ne’e estabelese atu fo apoiu ba nesesidade traballador sazonal sira iha indústria “Ortikultura” no “Vitikultura” Nova Zelandia nian, enkuantu mós fornese oportunidade empregu temporáriu ba traballadór sira hosi nasaun parseiru ilha Pasifiku sira no mos Timor-Leste.

Nuneé, SEFOPE enkoraja tebes ita-boot atu le’e didi’ak informasaun no rekizitu sira hotu molok hahu ita-boot nia aplikasaun. ida-ne’e sei ajuda asegura katak ita-boot komprende kritériu elejibilidade nian no iha dokumentu suporta hotu-hotu ne’ebé prontu ona.

𝐏𝐞𝐫𝐢́𝐨𝐝𝐮 𝐀𝐩𝐥𝐢𝐤𝐚𝐬𝐚𝐮𝐧

Aplikasaun sira ba Programa RSE sei loke hosi loron 8 to’o loron 12 fulan-Setembru, 2025 nia laran. Favor asegura katak ita-boot nia aplikasaun no dokumentu sira hotu ne’ebé presiza hatama iha prazu ida-ne’e nia laran no durasaun tempu ne’ebé termina ona.

𝐊𝐨𝐧𝐝𝐢𝐬𝐚𝐮𝐧 𝐈𝐦𝐩𝐨𝐫𝐭𝐚𝐧𝐭𝐞 𝐬𝐢𝐫𝐚 𝐛𝐚 𝐚𝐩𝐥𝐢𝐤𝐚𝐬𝐚𝐮𝐧 𝐎𝐧𝐥𝐢𝐧𝐞 𝐏𝐫𝐨𝐠𝐫𝐚𝐦𝐚 𝐑𝐒𝐄

1. Nasionalidade: Tenki sidadaun Timor-Leste.

2. Idade: Aplikante sira tenki iha entre tinan 21 ba leten.

3. Profisiénsia Inglés: Ita-bo’ot tenki iha lisensiatura/Diploma Inglés ka sertifikadu Lian Inglés.

4. Durasaun Emprega: Empregu tuir Programa RSE ho nia durasaun ba fulan 67. Hafoin kompleta periodu ida-ne’e, ita-boot tenki fila mai Timor-Leste maizumenus durante fulan 4 molok ita-bo’ot elizivel ba kontratu seluk (mobilizasaun tuir mai).

5. Kondisaun Servisu nian: Servisu limita ba “ortikultura no vitikultura” deit. Laiha úpu empregu seluk ne’ebé maka permite tuir vistu RSE ne’e.

6. Oras Servisu nian: Mínimu oras 30 iha kada semana, ka oras 30 média kada semana durante semana haat (oras 120 kada fulan).

7. Klima: Prepara an ba temperatura oioin, hosi besik 7°C iha tempu Invernu (Jullu) to’o besik 34°C iha tempu Veraun.

8. Remunerasaun: Taxa saláriu atuál ba traballadór RSE sira nia minimu maka NZD $23.15 kada oras.

9. Ezijénsia Fiziku sira:

a. Ita-bo’ot tenki foti no lori ai-fuan no modo sira ne’ebé maka todan.

b. Envolve servisu repetitiva sira hanesan dobrada/hakruuk, hili/kuú, no tesi/koa

c. Presiza nivel kondisaun fiziku ne’ebé diak (saudavel) atu bele halao ezijénsia sira serbisu nian.

10. Dokumentu sira ne’ebé presiza (Rekizitus)

a. Dokumentu hotu-hotu tenki submete (upload) ho versaun dokumentu iha PDF no koloridu :

b. Pasaporte: Ita-bo’ot nia pasaporte tenki válidu pelumenus fulan neen ba leten.

c. Sertifikadu Rejistu Kiriminal ne’ebé validu (ho versaun Lian Inglés).

d. Sertifikadu Lian Inglés / Diploma

e. Kartaun Evidensia husi SEFOPE

f. Billete Identidade (BI)

g. Kartaun Eleitoral (KE)

h. Sertifikadu Vasinasaun COVID-19

i. Sertidaun RDTL (Birth Certificate)

j. Foto Perfil Kompletu (whole bodylseluruh badan)

11. Opsionál: bele mós submete/upload Kartaun Lisensa Kondusaun Kareta nian (ho kategoria B1/B2-C1/C2.) ne’ebé válidu hanesan identifikasaun adisionál.

𝐀𝐩𝐥𝐢𝐤𝐚𝐬𝐚𝐮𝐧 𝐛𝐚 𝐄𝐬𝐤𝐞𝐦𝐚 𝐑𝐒𝐄 𝐎𝐧𝐥𝐢𝐧𝐞

Ba hirak ne’ebé seidauk iha Sistema, bele kompleta no submete ita-bo’ot sira nia dokumentu ba iha link refere: https://timorleste.pacificlabour.org/register tuir loron ne’ebé determina ona.

Se ita-bo’ot rejista ona iha sistema PALM nian, labele rejista online ba Programa RSE ne’e, tamba Ita-bo’ot nia profile sira rejista ona iha Sistema PALM (IRD System), no wainhira ita-bo’ot sira halo aplikasaun online ne’e hetan rejeitasaun automatikamente husi Sistema ne’e rasik.

Nune’é, ami enkoraja no husu ita-bo’ot sira iha vontade atu registu mos iha programa RSE bele haruka karta Espresaun Interese ida liuhosi email [email protected]

Husu atu pasiensia no koko fila-fali, wainhira halo registrasaun online ba iha Sisterna programa RSE, link ne’ebé ita-bo’ot sira asesu ba, iha problema ou lao neneik (loading hela) ho razaun slot ba aplikasaun refere iha nia limitasaun ba asesu.

𝐃𝐞𝐤𝐥𝐚𝐫𝐚𝐬𝐚𝐮𝐧

“Aplika”, ita-bo’ot konfirma katak ita-bo’ot le’e, komprende, no konkorda ona ho kondisaun no rekizitu sira hotu ne’ebé maka mensiona iha leten. Ita-bo’ot mós rekoñese katak fallansu atu kumpre kritériu sira-ne’e ka atu fornese dokumentu sira ne’ebé presiza sei rezulta iha rejeisaun imediata ba ita-bo’ot nia aplikasaun.

SEFOPE liuhosi Diresaun Nasional Empregu Estranjéiru, sei la halo atendimentu ba registu manual. Aplikasaun hotu-hotu tenki halo ho online ou liuhosi email no link ne’ebé ami mensiona ona iha leten.