𝗣𝗮𝗽𝗮 : 𝗝𝗼𝘃𝗲𝗻𝘀 𝗧𝗲𝗻𝗸𝗶 𝗜𝗵𝗮 𝗠𝗲𝗵𝗶, 𝗛𝗮𝗹𝗼 𝗕𝗮𝗿𝘂𝗹𝗹𝘂 & 𝗙𝗼𝘁𝗶 𝗥𝗲𝘀𝗽𝗼𝗻𝘀𝗮𝗯𝗶𝗹𝗶𝗱𝗮𝗱𝗲

Imajem : Vizita Papa Francisco iha Díli, Timor-Leste

SAPNewsTL, Dili – Sua Santidade Papa Francisco dezeja juventude Katólika Timoroan atu bele konkretiza valores fraternidade sai maun alin, dezenha ninia mehi, hatene halo barullu no foti responsabilidade hodi serví Timor-Leste.

Iha diskursu Santu Padre hateten, valor ida ne’ebe mak imi tenke hatene liu tan mak fraternidade umana sai konseitu importante iha foinsa’e sira nia fuan, hodi kontinua halo barulhu barak maibe tenki determina ho konseitu respeita, rona no tau matan ba ema hotu-hotu hanesan umanu.

“Joven sira gosta hakilar halo barulhu hanesan imi ohin hakilar halo barulhu. Ha’u agradese ba sira ne’ebe mak fo sasin ba sira nia pergunta, maibe konseitu ida ne’ebe importante liu mak fraternidade, sai maun alin laos sai inimigu ba malu.” Informa Sua Santidade Papa Fransisco, iha Sentru Konvensaun Dili (CCD sigla Portugues), Quarta, (11/09/2024)

Lider masimu igreja katolika mundial ne’e fo agradese ba joventude sira ne’ebe mak hatudu dansa, tanba dansa ne’e esprime sentidu tomak ba ema nia isin no ema nia sentimentu, imi koinese joven ruma ne’ebe mak la hetene dansa, imi rai ida ne’ebe mak nakonu ho joven, tamba pontu importante ida ne’ebe ohin hato’o ba bispu sira mak oin midar no hamansa.

“Ha’u agradese ba joventude sira, buat ida ne’ebe ohin dader ha’u hateten ba bispu ida katak buat ne’ebe mak ha’u nunka haluha mak imi ninia hamanasa midar(smile), nu’udar joven labele para hodi hamanasa midar, imi maka maioria iha povu Timor, halo rai ida ne’e nakonu ho ksolok no esperansa, imi labele lakon entusiasmu fiar nian, imajina jovem ida mak fiar la iha oin naruk hanesan kuda”.

Papa Francisco fundamenta, papel nu’udar joventude obrigatoriamente tenki hatene saida mak halo ema ida oin nakraik no triste, joven tenke kuidadu aan tanba iha ema barak sei mai hodi fa’an felisidade ba ema hotu-hotu.

“Ita, sira ne’ebe fan fali felisidade hanesan droga ne’ebe mak fo ba imi felisidade ne’ebe mak dura iha horas balun nia laran, ha’u dezeja ba imi atu la’o ba oin ho alegria foinsa’e sira nian maibe imi labele haluha imi mak liman rohan husi sira ne’ebe mak hari’i nasaun ida ne’e tanba ne’e la bele lakon memoria sira ne’ebe uluk ona ho sakrifisiu barak hodi hari’i nasaun ida ne’e”.

Sua Santidade Papa Francisco hatutan, pontu importante rua ne’ebe sai eskollidu ba nia, hodi halo movimentu durante loron tolu (3) iha kapital Dili, mak hamansa midar ne’ebe foinsa’e sira kria no povu ida ne’ebé mak hatene hatudu smille ba ema hotu-hotu, signifika povu ida ne’ebe hatene hadomi.

“Iha buat rua (2), ne’ebe mak toka liu ha’u nia fuan bainhira ha’u la’o iha Dili laran sira ne’e mak juventude sira no hamnasa midar, imi povu ida ne’ebe mak hatene hamnasa midar no joven sira tenke hatene mehi no saida mak ita bele halo atu ita bele mehi, ha’u konvida imi atu mehi ba buat boot iha moris, jovem ida ne’ebe la hatene mehi nia hanesan ho ema ne’ebe mak pensiun ona iha moris, Joven sira tenke hatene halo barulhu atu hatudu katak moris mak ne’e”.

Santu Padre salienta, Joven sira iha moris ne’e, imi to’o ona iha dalan klaran, entre moris labarik nian no ema katuas sira nian no imi hatene saida mak rikusoin ida furak liu iha sosiedade nia laran ne’e mak katuas ferik tamba sira mak fo matenek sabedoria ba joventude sira.

“Ema katuas ferik sira husik sira nia fatin no historia ba foinsa’e sira, iha sosiedade ida osan mean mak labarik, ferik no katuas sira, tanba ne’e iha sosiedade ida nia laran mak labarik barak tenke kuida sira ho didiak no iha katuas ferik sira ne’ebe mak mesak memoria sosiedade nian tanba ne’e imi respeita no tau matan ba sira” Dehan Papa Francisco.

Osan mean ne’ebe iha sosiedade mak labarik, ferik no katuas sira tanba ne’e favor kuidadu sira, Iha imi nia paz, imi lori istoria ida ne’ebé marka ho terus boot maibe mos ho ezemplu furak tebes fiar nian kona-ba martíriu liu-liu kona-ba rekonsiliasaun rekonsiliasaun ida ne’e rekomenda ba foinsa’e sira hotu ba futuru ne’e maka liberdade, komprimisiu no fraternidade.

Lider masimu igreja katolika mundial afirma, pontu primeiru kona ba liberdade nian ne’e mak ukun rasik ann ne’e katak kapasidade atu moris independente, foinsa’e ida ne’ebe mak la hatene ukun nia ann ne’e saida mak ne’e? ema ne’ebe mak la hatene ukun nia ann nia ne’e atan ida.

“Joven ne’ebe hadomi ema seluk no hamutuk ho ema seluk, atu hadomi ho responsabilidade ne’e joven ida ne’ebe hadomi nia rain. Foinsa’e ida tenke hatene katak liberdade la signifika halo saida deit tuir nia hakarak maibe indika ba jovem ida ne’ebe mak iha responsabilidade ne’ebé signifika hatene tau matan ba ita nia uma komum tanba ne’e joven ida tenke iha komprimisiu ba nia aan, iha provérbiu ida dehan iha tempu difisil bele haforsa ema”.

Entretantu, Sua Santidade Papa Fransisco enkoraja joventude sira atu hadomi no respeita ema ferik no katuas sira tamba sira mak fo matenek sabedoria ba joventude sira.

Papa hatutan, maske ema bele ideia no relijiaun ne’ebe mak la hanesan maibe respeita malu, mak sai sasukat ba ema atu bele hatene diferensia sira no hatene moris hamutuk ho ema seluk iha diferiensia nia laran, nune’e joventude tenki tane as valor fraternidade sai maun alin laos sai inimigu, Nia hakotu.

Juventude sira ne’ebé partisipa iha enkontru ho Papa Francisco ne’e mai hosi Dioseze Baukau, Maliala no Dioseze Metropolita de Dili hamutuk rihun tolu (3.000).

𝐉𝐨𝐫𝐧𝐚𝐥𝐢𝐬𝐭𝐚 : 𝐌𝐚𝐫𝐜𝐞𝐥𝐚 𝐌𝐞𝐫𝐲 𝐝𝐚 𝐂𝐨𝐬𝐭𝐚