𝗦𝗘𝗙𝗢𝗣𝗘 𝗘𝗻𝘁𝗿𝗲𝗴𝗮 𝗠𝗮𝘁𝗲-𝗶𝘀𝗶𝗻 𝗔𝗸𝗼𝗹𝗶 𝗕𝗮 𝗙𝗮𝗺𝗶𝗹𝗶𝗮 ! 𝗗𝗮𝘃𝗶𝗱 : “𝗕𝗮 𝗛𝗼 𝗞𝗼𝗻𝘁𝗲𝗻𝘁𝗲, 𝗙𝗶𝗹𝗮 𝗟𝗼𝗿𝗶 𝗧𝗿𝗶𝘀𝘁𝗲𝘇𝗮”.

Imagen : Família simu mate-isin Domingos da Costa Nunes “Akoli” iha Aeroportu Internasional Nicolao Lobato Comoro, 02/11/2025

SAPNewsTL, Corea Sul : Sekretariu Estadu Formasaun Profesional no Empregu entrega mate-isin matebian Domingos da Costa Nunes “Akoli” ba familia hafoin to’o Timor-Leste ho aviaun Aero Dili família simu nia isin-mate ho triste no matan-ween tanba lakon oan mane ne’ebe esforsu servisu hodi apoia família.

Marciana da Conceição – 𝐒𝐀𝐏𝐍𝐞𝐰𝐬𝐓𝐋

Xefe Gabinete SEFOPE Jacinto Ribeiro Dias hateten la’os família deit maka sente triste no lakon maibé estadu mós sente lakon, tanba antes ba sempre hameno ho liafuan ba ho Maromak, servisu kuidadu aan to’o fila-fali mai Timor maibé realidade hatudu oin seluk.

“Iha tinan rua ba kotuk ita mai iha Aeroportu ita despedida ba nia ho liafuan ne’ebé ita hameno mak ne’e ba ho Maromak, servisu kuidadu aan no sei fila fali mai Timor.

Ohin nia fila duni mai Timor ho kondisaun nia isin ne’ebe mate, ida ne’e la’ós nia família de’it maka lakon maibé estadu ida ne’e lakon”. Dehan Xefe Gabinete SEFOPE Jacinto Ribeiro Dias iha Aeroportu Internasional Nicolau Lobato, Domingu 02/11/2025.

Jacinto akresenta, matebian Domingos ho traballador Timor oan sira seluk ba servisu iha ema nia rain hodi transforma ekonomia familia no estadu ho prosesu dezenvolvimentu ne’ebé di’ak maibé realidade Akoli lori tristeza ba família no nasaun.

“Ita hanoin katak Domingos ba iha area ekonomia, atu transforma ekonomia tantu ekonomia família no nasaun. Ita hein katak jornada sira ne’ebé ita nia joven sira luta bele lori mai ita finalidade ida maka naran prosesu dezenvolvimentu ne’ebé di’ak. Maibé na realidade perante husi traballador sira hotu Domingos lori mai ita tristeza ba familia no mós ba nasaun”.

“Ami mós sente lakon erói ekonomia foun ne’ebé maka tuir loloos kontinua obra ida ne’e para bele halo moris rai no espesial ba família, maibé buat hotu-hotu ne’ebé ita haree iha ne’e realidade la hanesan saida maka família no governu sente”.

Jacinto Ribeiro Dias husu ba família matebian depois funebre saudozu Domingos da Costa “Akoli”, bele ba fila fali SEFOPE hamutuk ho diresaun empregu hodi trata direitu no asuransi no direitu matebian nian durante servisu iha estadu Corea.

“Kona-ba saudozu nia direitu sira prosesu la’o hela, ami rekomenda ba familia depois funebre saudozu, família ho laran hakmatek husik netik tempu oituan atu mai fali SEFOPE hamutuk ho diresaun empregu atu trata nia direitu no asuransi kona-ba asidente no nia direitu durante servisu ba estadu Corea”.

Reprezentante família David de Jesus konta ho laran triste tanba ema seluk wanhira ba servisu iha ema nia rai ba ho kontente fila ho kontente maibé diferente ho sira, hanesan família no Timor oan sente triste lakon família.

“Ema seluk nia oan, maun no alin sai ho kontente fila mós ho kontente maibé diferente ho ami ba ho kontente fila lori hela tristeza, hanesan Timor oan no família sente triste lakon família ida”. Nia subliña.

Nia sente agradese ba guvernu Timor-Leste no Corea liu husi Sekretariu Estadu Formasaun Profesional no Empregu ho domin, fuan no ho reposabilidade sira bele simu mate-isin matebian Domingos iha tempu badak.

“Hakarak agardese ba guvernu rua Timor-Leste no Corea, liu husi SEFOPE no traballadór sira iha Corea ba ita-boot sira-nian responsabilidade no domin ba Akoli, hanesan Timor oan iha ne’ebé de’it la husik malu fo fuan no domin ba malu ohin bele simu ona matebian Akoli nia mate isin”.

“Ami la espera katak bele simu ami nia alin Akoli iha tempu ne’ebé badak maibé ho ita boot sira nia responsabilidade no domin la to’o fulan ida ami bele simu ona mate isin Akoli iha ami nia fatin ne’ebé oras tan sei lori ba nia deskansa fatin ikus iha Same”.

Nia parte agradese mós ba traballador Timor oan sira ne’ebé servisu hamutuk ho matebian Domingos ne’ebé durante loron tolu buka mate-isin to’o hetan no ohin sira bele simu maske ho laran triste.

“Ami mós agradese ba Timor oan lubuk ida ne’ebé servisu hamutuk ho Akoli iha ne’ebá, nia kolega sira iha ne’ebá ba sira nia domin ne’ebé fó ba Akoli durante loron tolu sira buka, ema fuik no ema leet ami la koñese maibé ho sentimentu hanesan Timor oan sira nafatin hamutuk hodi buka ikus sira hetan no ohin ami simu”.

Enkuantu David rekomenda ba parte SEFOPE hodi limita númeru traballador iha area peska nian.

“Ami mós hakarak rekomenda ba SEFOPE karik bele haree mós vaga peska ninian númeru ne’e limita ona tanba ita haree isu barak liu durante ne’e Timor oan lubuk ida lakon, balu la hetan no balun mate”. Nia husu.

Entretantu traballador Timor oan Domingos da Costa Nunes hahú servisu iha Corea Sul, iha loron 23 fulan Outubru tinan 2023, traballador ne’e mout ba tasi iha loron 10 Outubru tinan 2025 no hetan fila fali iha loron 13 fula outubru tinan 225

Wainhira mate isin to’o iha Aeroportu Internasional Nicolau Lobato Comoro, parte Sekretaria Estadu Formasaun Profissional no Empregu entrega mate-isin Domingos Nunes ba família hodi lori ba nia rai moris fatin Munisípiu Manufahi, postu administrativu Same hodi halot.