12 Novembru ! Foinsa’e Prezente Presiza Banati Tuir Aten Brani & Unidade Joven Pasadu Nian
Imajem : Diretor Midia SAPNews Sergio Alves da Costa iha Luro,11/11/2024. Foto : Januario Pinto
SAPNewsTL, Dili : Diretor Mídia SAPNews Sèrgio Alves Da Costa hamutuk ho komisaun organizador ba selebrasaun 12 Novembru hodi sunu lilin no presta omenajem ba heroi funu nain sira iha Jardim dos Herois Luro.
Durante reflesaun, Diretor SAPNews Sergio Alves da Costa hateten juventude pasadu hatudu sira nia aten brani no unidade hodi defende no konkista ukun rasik an, ohin joven sira presiza presta omenajem no banati tuir sira.
“Ita nia ukun rasik an ne’e mai hosi aten brani juventude resisténsia sira nian, sira hatene katak sira ba atu mate maibe sira prontu oferese sira nia an ba mate, ohin ita goza liberdade, mai ita hamutuk iha neon no laran ida hodi fo onra no gloria ba sira ne’ebe mate tanba kauza ukun rasik an, ita tenki buka atu banati tuir sira nia aten brani no unidade ne’ebé nunka kotu iha tempu difisil”. Tenik Diretor SAPNews Sergio Alves da Costa iha Jardim dos Herois Luro, 11/11/2024
Diretor SAPNews akresenta trazédia santa kruz lori mensajem espesial ba mundu, dere mundu nia korasaun no fanun komunidade internasionàl katak Timor-Leste iha problema ne’ebe presiza hetan solusaun hosi Organizasaun das United Nations (UN).
“Trazédia Santa Kruz momentu importante ne’ebe halo mundu hakfodak no dada komunidade internasionàl nia atensaun ba luta autodeterminasaun povu Timor-Leste nian katak povu barak sei terus no mate, violasaun diretus humanus, injustisa no diskriminasaun buras iha Timor-Leste”. Sergio sublinha
Imajem : Kalan Reflesaun hosi juventude sira iha Luro,11/11/2024.
Sergio Alves mos husu ba joven sira atu hamutuk hodi kria paz no estabilidade, estuda makaas no buka matenek, esforsu no prepara an didiak tanba to’o loron ida nasaun sei bolu sidadaun ida-idak hodi servi.
“Ispíritu 12 Novembru, fanun ita hotu hodi hatene kria paz no estabilidade, estuda makaas hodi sai matenek, prepara an ba futuru tanba kleur ka lais, fasil ka difisil, todan ka kmaan, to’o loron ida nasaun sei bolu kada ema atu ba servi no dezenvolve, to’o tempu ita tenki dehan ha’u mak ne’e Timor”. Nia dehan
Sergio mos husu ba foinsa’e sira atu buka hatene rona malu, respeita malu, kuidadu malu, tulun malu no valoriza malu iha familia, sosiedade no nasaun.
“Tempu ba ita jovens atu hatudu domin ba malu, servi malu, rona malu, servisu hamutuk no kaer metin ispíritu fraternidade umana iha Luro, Lautém no Timor-Leste, Timor ita nian, ita mak tenki hadia no hametin”.Nia aprofunda
Partisipa iha serimónia reflesaun, loke filmajem, halo orasaun no sunu lilin ne’e mai hosi foinsa’e sira feto no mane, pontu fokal Ministériu Juventude Desportu Arte no Kultura Postu Luro, Presidente no membru Klibur Foinsa’e Fini Lautém no komisaun organizador sira.
Jornalista : Ekipa Kobertura