8 Setembru, SEFOPE Sei Teste Trabalhador Ba Nova-Zelândia Ho Lian Inglês

Imajem : Assinatura Nota Entendimentu entre SEFOPE & Embaixadora Nova-Zelândia iha Timor-Leste, 21/08/2025.

SAPNewsTL, Díli : Sekretario de Estado da Formação Professional e Emprego (SEFOPE) hamutuk ho Embaixadora Nova-Zelândia asina akordu mobilidade laboral hodi rekrutamentu trabalhador Timoroan ba servisu.

Marcela M. da Costa & Ermelinda Soares – SAPNews

Sekretario de Estado da Formação Professional e Emprego Rogério Araujo Mendonça hateten IX governu liu husi kria tan istoria liu-liu iha programa mobilidade laboral ne’ebe SEFOPE ho governu Nova-Zelândia asina ona.

“Ohin, ita asina ona MoU no ami ohin halo diskusaun tekniku katak loron 8 setembru hahu ona loke rekrutamentu ba joven sira ne’ebe mak atu ba servisu iha Nova-Zelândia”.Dehan SEFOPE Rogério Araujo Mendonça, ba jornalista hafoin Asinatura MoU iha sala enkontru VIP SEFOPE, Caicoli, Sesta feira 21/08/2025.

Nia informa kooperasaun servisu ba nasaun Nova-Zelândia iha area rua mak hortikultura no vitikultura, enkuantu kriteira mak trabalhador sira tenke hatene lian inglês.

“Kompanha barak maibe iha fulan setembru ba rekrutamentu mak ami bele hateten kompanha hira mak sei halo rekrutamentu. Ba Kriteria la diferente ho trabalhador Australia nia maibe kriteira ida ne’ebe mak importante liu tenke hatene lingua Englis”. Nia salienta

Sekretariu Estadu ne’e deklara primeira faze ba rekrutamentu sei estabelese vaga online tanba tempu ne’ebe mak limitadu.

Iha fatin hanesan, Embaixadora Nova-Zelândia iha Timor-Leste Helen Janne Tunnaha haktuir rezultadu positivu tebes ba relasaun entre Timor-Leste no Nova Zelandia. Asinatura akordu entre ajénsia ne’e hanesan pasu tuir mai ba programa foun mobilidade laboral.

“Ami-nia Governu konkorda ona iha tinan kotuk atu inklui Timor-Leste, iha ami-nia programa mobilidade laboral, ami halo ida-ne’e hodi hatán ba pedidu husi Governu Timor-Leste”.

Nia dehan, programa mobilidade laboral ne’e sei apoiu nasaun rua tanba bele apoiu empresáriu sira iha Nova Zelandia no mos bele suporta rendimentu povu Timor-Leste.

“Ida ne’e sei ajuda empregadór Nova Zelandia sira atu hetan traballador di’ak sira no sei tulun atu suporta rendimentu, no desenvolvimentu abilidade serbisu nian no parte Ida husi ita-nia kompromisu jerál ba dezenvolvimentu nasaun ba foin-sa’e sira”.

Embaixadora ne’e reafirma, “mobilidade laboral hanesan pasu foun ida iha apoiu ida-ne’e. Bainhira estabelese tiha ona rejime ne’e, ami hakarak asegura katak ami suporta dezenvolvimentu imi-nia traballador sira-nian”.

Iha asinatura Memorandu de Entendimentu ne’e partisipa husi Ministru Negosiu Estranjeiru Bendito dos Santos Freitas, Sekretario de Estado da Formação Professional e Emprego Rogério Araujo Mendonça, Embaixadora Nova-Zelândia iha Timor-Leste Helen Janne Tunnah, Embaixadora Timor-Leste iha Nova-Zelândia Idelta Maria Rodriguês no funsionario SEFOPE.

Tuir informasaun ne’ebe SAPNewsTL asesu hosi website https://www.immigration.govt.nz/ katak hahú iha loron 28 fulan Abril 2025, Timor-Leste elizivel iha eskema RSE hodi rekruta sidadaun timoroan ba servisu iha Nova Zelândia.

“Timor-Leste sei aumenta ba Eskema RSE iha 28 Abril 2025, Timor-Leste sei aumenta ba Rejime Empregadór Rekoñesidu, eskema Empregadór Sazonál Rekoñesidu (RSE) ajuda empregadór sira iha indústria ortikultura no vitikultura nian atu rekruta traballadór sazonál sira hosi rai-li’ur, liuliu hosi nasaun sira Pasífiku nian, bainhira laiha traballadór adekuadu hosi Nova Zelándia”. Sita https://www.immigration.govt.nz/ iha Nova Zelândia, 22/04/2025.

Website ne’e sita katak hahú hosi loron 28 fulan-abríl tinan 2025, Timor-Leste sei aumenta ba lista nasaun sira ne’ebé elizivel hodi bele partisipa iha eskema RSE.

“Empregadór sira sei elejivel atu rekruta sidadaun Timor-Leste nian hodi serbisu iha Nova Zelándia iha indústria hirak ne’e”

“Aplikante sira husi Timor-Leste sei iha rekerimentu saúde ne’ebé hanesan ho aplikante RSE sira seluk hotu. Maibé, tanba la tama iha lista nasaun sira ho insidénsia tuberkuloze ki’ik, aplikante sira sei presiza fornese sertifikadu raiu-X toraks nian ho sira nia aplikasaun”.

Lembra fali katak SEFOPE Rogério Araujo Mandonça informa Governu Nova Zealandia sei rekruta trabalhador Timoroan hamutuk 27.000 hodi ba servisu iha Nova Zelandia tanba konsidera komportamentu diak.

Rogério akresenta, kuota ne’ebe Governu Nova Zealandia indika mai Timor-Leste ho total númeru 27 mill valida ba nasaun Asia pasific maibé prioridade númeru kuantidade bo’ot liu mak Timor-Leste, entaun iha 2025 Nova Zelandia sei hasa’e tan númeru.

Antes ne’e, Embaixadora Timor-Leste nian ba Nova Zelandia, Idelta Rodrigues konfirma Governu Nova Zelandia iha vontade atu implementa Programa Mobilidade Laboral hodi bele lori traballador timoroan ba serbisu iha Nova Zelandia, nune’e traballador sira sei simu salariu kada oras $24.97 ekivale ba dolar Amérikanu liu rihun $10-resin.