Graduada Joana : “Aprende Laiha Limite & La Haree Idade, Susesu Presiza Sakrifísiu”

SAPNewsTL, Díli : Graduada Master of Business Administration, Joana Miranda Pereira konsidera, aprende mak sai save ba dezenvolvimentu kapital umanu tanba ne’e aprende laiha limite, la haree ba idade no susesu ne’e presiza sakrifísiu.

Hafoin partisipa Serimonia Graduasaun Lisensiatura ba dala XXI ho Mestradu ba dala VIII no komemorasaun Solene Dies Natalies DIT ba XXIII ho tema Dezelvolve Kualidade Ensinu Superior liu husi Trasformasaun Dijital ho Internasionalizasaun baze ba fiar, etika, moral no kultura,” Graduada Joana Miranda Pereira, hato’o nia laran ksolok tanba bele akaba ona nia estudu iha Dili Institutu of Technology (DIT) ho nivel edukasaun Master of Business Administration.

“Ha’u sente kontente tebes tanba hanesan feto profisional ida, la fasil atu bele konklui ha’u nia estudu ida ne’e, maibé realidade hanesan liafuan ne’ebe mak fó husi Banquin Mon hateten katak feto labele hela iha kotuk, edukasaun ne’e sai save ba feto sira atu bele hakat ba oin”.Dehan Graduada Master of Business Administration Joana Miranda Pereira ba SAPNews hafoin gradua iha Salaun Mahoka, Hudi laran, Sabadu (10/05/2025)

Feto potensial ne’e dehan, aprende laiha limitasaun no la hare ba idade, maibé aprende mai husi votande kada pessoa ninia interesse hodi buka hatene kona-ba siensia no hadia kapasidade umanu.

“Ha’u hanoin katak aprende ne’e ba ema hotu-hotu, presija atualiza nia aan rasik, aprende ne’e sai save ba dezenvolvementu kapital umanu hodi alkansa dezenvolvimentu ba ita nia rai, oinsa ita atu kontribui ba nasaun bainhira ita rasik lakoi atualiza ita nia aan. Tanba ne’e nu’udar feto profisional ida ha’u sente katak atu aprende ho estuda ne’e kualker tempu no la iha limitasaun ne’e mak hau hili DIT kontinua ha’u nia estudu”.

Graduada Joana akresenta, durante prosesu aprendizajen teoria husi matenek nain sira, motiva tebe-tebes nia hodi luta hasoru dezafiu oioin iha prosesu estudu nia laran, to’o hetan nivel eduasaun ho titulu foun Master of Business Administration.

“Liafuan husi Cofi Anan mak motiva tebes ha’u, katak tenke iha igualdade géneru iha nivel hotu-hotu ida ne’e sempre fo motivasaun mai ha’u. Entaun ha’u mós hanoin katak ha’u iha oan feto nain rua (2), se ha’u la hahu iha ha’u nia uma laran, ha’u labele fo ezemplu ba ha’u nia oan sira no ema seluk.”

Graduada ne’e hatutan, edukasaun mak pilar importante ba mundansa iha setor hotu-hotu, tanba ne’e maske hasoru obstakulu oioin durante prosesu estudu, maibé nia la lakon vontade hodi aprende, halo jestaun ba tempu to’o alkansa objetivu ne’ebe nia hakarak.

“Durante prosesu estudu iha DIT ha’u hasoru difikuldade oioin hanesan jere tempu mais difisil tanba nu’udar ema profisional, ha’u labele husik servisu tanba ne’e mak ha’u tenke foti disizaun katak sakrifika buat balun atu hetan susesu” Nia subliña.

Nia fundamenta, bainhira hala’o estudu nia parte rekoiñese katak, mudansa ne’e tenki liu husi prosessu, nune’e nia rasik foti risku hodi aguenta iha prosesu ne’ebe todan ho hakarak rasik atu hetan meta ne’ebe nia mehi.

“Dala barak mós ha’u sakrifika ha’u nia oan sira, dala ruma ha’u to’o uma oan sira dukur ona maibé buat hirak ne’e hotu ha’u sente kontente tebes tanba sakrifisiu sira hotu ne’ebe mak ha’u halo durante ne’e, ohin ha’u hetan nia resultadu no ha’u fiar katak bele mós hamorin iha sosiedade nia leet”.

Profissional Telkomcel ne’e dehan, maske finaliza ona nia estudu ho grau Master of Business Administration, maibé nia parte enkoraja nafatin feto maluk sira atu kontinua inklina an iha prosessu aprendijazen no buka aprende husi ema seluk, nune’e bele alkansa objetivu ba susesu.

“Maske ohin ha’u konklui ona estudu maibé ida ne’e laos sigifika katak hotu ona, ha’u tenke sente hambrok nafatin ba edukasaun atu bele aprede husi ema seluk liu-liu iha sosiedade nia leet, ha’u sempre enkoraja mós ema seluk tanba Timor-Leste presija ita hotu nia kontribuisaun”

Nia haktuir, hanesan feto potensial ida, bainhira tur iha Universidade Dili Institutu of Technology, kestaun fundamental ne’ebe nia hasoru mak jestaun ba tempu, maibé nia parte aprende ístoria husi feto lutador sira hodi motiva nia iha prosesu estudu nia laran.

“Obstaklu mak hanesan kestaun de tempu tanba dala ruma trabalhu eskola no nu’udar profisional bainhira viajen servisu ninian ita tenke husik ita nia eskola, buat importante ne’ebe motiva tebes ha’u husi istoria mak ha’u aprende husi ita nia feto maluk sira ne’ebe mak uluk iha situasaun difisil la konsege hanoin ba to’o eskola, maibé sira luta atu liberta nasaun ida ne’e no haree mós ba realidade ita nia veteranus sira tinan 24 iha ai laran sira, fila mai kontente nafatin no kontrubui ba ita nia dezenvolvementu”.

Joana Miranda mós hato’o agradesimentu ba DIT no professores sira ne’ebe oferese tempu hodi fahe esperensia ba estudante sira durante prosesu aprendizajen

“Uluk nanain ha’u agradese ba Aman Maromak tanba liu husi espiritu santu ha’u eskola iha DIT no orientasaun professor sira iha DIT, ohin loron ha’u remata ha’u nia estudu, nune’e ha’u la haluha hato’o agradese ba dosente sira no husu atu sira nia orinetasaun labele iha ne’e deit maibé kontinua nafatin orienta estudante sira seluk hodi nune’e bele kontibui ba dezenvolvimentu rekursu humanu”.

Hafoin simu titulu foun husi DIT, feto potensial ne’e mós hamutuk ho graduadu Yogi Rizkian Bahar, hanesan eis Chief Ezekutive Officer (CEO) Telkomcel, selebra sira ksolok hamutuk ho ema ho difisiente sira, iha organizasaun AHISAUN, liu husi hatudu sira nia domin no solidariedade hodi apoiu ai-han

bazika ba ema ho difisiente sira ne’ebe hela iha residénsia organizasaun AHISAUN fatuhada Dili.

“Ba maluk sira, imi labele haree ba kuantidade sasan maibé imi haree ba ami nia domin ba imi, liu husi ami nia prejensa iha imi nia fatin, ita hatene katak sasan ne’e oitoan de’it, maibé ami nia domin ba imi bo’ot liu buat ne’ebe ami fó ba imi”.

Iha fatin hanesan, Eis Chief Ezekutive Officer CEO Telkomcel Yogi Rizkian Bahar, hato’o nia sentimentu solidariedade no ksolok ba ema ho defisiente katak, nia parte kontenti tebe-tebes bele hasoru malu ho maluk defisiente iha ambitu graduasaun ho grau Master of Business Administration iha Dili Institutu of Technology.

“Ba maluk sira ha’u hakarak hato’o ami nia ksolok ba imi hotu-hotu ho apoiu ida ne’e simples tebe-tebes, maibé ami hatudu ami nia domin ba imi, tanba ne’e ha’u mós agradese ba maluk sira ne’ebe dehan katak sei reja mai ami, ita hotu reja ba malu hodi ajuda malu liuhusi orasaun”.

Entretantu, hafoin gradua graduada Master of Business Administration Joana Miranda Pereira, lembra hikas Papa Fransisco nia mensajen katak esperansa la bosok, nune’e nia parte hato’o mensajen ba foinsa’e no feto maluk sira katak, labele lakon vontade hodi aprende, tanba susesu mai husi esforsu ne’ebe nakonu ho dezafiu.

Reportajen : Ekipa Kobertura