Oan Lanu Todan ! Lilin Nia Lakan Halakon Mateus Ho Idade 85 Nia Vida Iha Soibada

Imajem : Ahi-han Mateus da Costa ho idade 85 inklui uma ida iha Soibada, 02/11/2025

SAP News TL, Díli : Akontesimentu insendiu iha Suku Fatumaquerek, Postu Administrativu Soibada Munisipiu Manatuto, rezulta ahi han motuk avo Mateus da Costa ho idade 85 ne’ebe ho kondisaun moras toba hela iha uma laran.

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋

Tuir Xefi Suku Fatumaquerek, Fransicco Andre do Espirito Santo hateten, inséndiu ne’e akontese iha tuku sanulu resin rua ho balun, horikalan dia um (1) tanba kauza husi lilin ne’ebe sunu hela iha matebian nia kuartu, nune’e lilin refere naben hodi hamosu ahi han ropa sira ne’ebe tau besik iha vitima nia sorin, hafoin ahi kontinua han vitima ne’ebe toba hela.

“Informasaun ne’ebe ami husu ba familia vitima katak, iha kalan familia ne’ebe hela iha uma ida ne’e, vitima nia oan mane rasik mak ba sosa lilin sunu iha matebian nia kuartu, bainhira sunu hotu lilin, vitima nia oan mane komesa hemu tua to’o lanu todan, entaun vitima nia oan toba dukur tiha, hafoin akontese ahi han uma,” Dehan Xefi Suku Fatumaquerek ba jornalista SAPNews, iha fatin akontesimentu, Domingu, (02/11/2025)

Nia salienta, bainhira vitima haree ahi-han ropa sira, vitima hakilar maka’as hodi husu ajuda, maibé vitima nia oan toba dukur la rona vitima nia lian.

“Lilin ne’ebe sunu iha vitima nia kuartu, lilin hahu naben entaun ahi komesa han ona ropa sira ne’ebe tau besik iha lilin ne’ebe sunu, nune’e matebian haree hela ahi han ropa sira ne’e, maibé nia bok an ladiak tanba vitima moras estruk kleur ona, toba deit iha fatin”.

Xefi Suku fundamenta, volume ahi komesa aumenta maka’as, ahi komesa han kulsaun ne’ebe matebian toba ba, entaun vitima hakilar maka’as hodi husu ajuda maibé laiha ema ida hatan, tanba insendiu akontese iha kalan bo’ot.

“Bainhira matebian haree volume ahi aumenta, nia hakilar nafatin dehan ahi han uma, ahi han ona hau, maibé vitima nia oan la rona vitima nia lian, tanba nia ho kondisaun lanu todan no toba dukur, entaun vitima nia feto foun ne’ebe toba iha iha uma vizinhu rona katuas hakilar, feto foun foti fatuk hodi tuda kalen, mak vitima nia oan hakfodak hodi halai sai husi uma laran” Tenik nia.

Lideransa foinsa’e ne’e hatutan, bainhira matebian nia feto foun tuda uma, vitima nia oan mane hakfodak husi toba fatin, halai sai ba liur, maibé nia haree ahi han aumenta maka’as liu ona, nia buka solusaun atu hamate ahi, maibé nia mesak labele halo intervensaun tanba volume ahi aumenta maka’as.

Vitima nia oan mane haree ahi han maka’as ona iha vitima nia kuartu vitima nia oan buka meus hodi halai sai salva nia an, tanba ahi han maka’as liu ona, entaun nia la konsege salva nia aman ho sasan uma laran.

Autoridade lokal ne’e realsa, bainhira ahi han aumenta maka’as vizinhu sira halai besik ba fatin akontesimentu hodi tenta atu hamate ahi maibé sira laiha forsa tanba ahi han maka’as liu ona.

Enkuantu Xefi Suku informa katak, antes ne’e vitima nia fen kaben iha problema internal ho nia laen, nune’e vitima nia fen deside toba iha uma vizinhu,

Nia dehan hafoin akontesimentu, autoridade lokal hamutuk ho PNTL eskuadra Soibada to’o kedas iha fatin akontesimentu, maibé la konsege salva vitima ho sasan uma laran

“Ha’u hanesan autoridade lokal informa kedas ba parte Autoridade Protesaun Sivil APC hodi husu apoiu, nune’e parte APC to’o kedas iha fatin akontesimentu hodi fo apoiu ba familia inklui vitima hetan apoiu husi Ministeriu Solidariedade Sosial, fasilita ambulasia hodi tula matebian husi fatin akontesimentu ba iha nia knua moris fatin, atu halo prosesu funebre” Dehan Francisco

Iha fatin hanesan familia vitima, Gil Gonzaga hateten, hanesan beioan senti triste tebe-tebes tanba insidente ne’e rezulta avo mateus lakon vida, inklui sasan uma laran la konsege salva.

“Ami ami hanesan beioan triste tebes tanba iha loron finadu ami hasoru difikuldade bo’ot, hafalun ami-nia familia ho tristeza, tanba horikalan akontese ahi han uma, ahi han ho avo ne’ebe toba hela iha uma laran, situasaun ida ne’e halo ami senti triste tebe-tebes”.Nia Hakotu.