Abu-Abu Husu Estadu Tau Matan Ba Faluk & Oan Kiak Sira Nia Moris
Imagem : Entrevista Veteranu Moises Afonso alias Abu-abu iha Kuartel Jeral Fatuhada, 20/08/2024. Foto : Dircia Belo
SAPNewsTL, Díli – Relasiona ho Komemorasaun loron FALINTIL ba dala ha’at nulu resin sia (49), Veteranu Moises Afonso ho (Kodigu Abu-Abu), husu atu tau matan nafatin ba feto faluk no oan k’iak sira hodi lori sira ba futuru ida ne’ebe di’ak liu.
Veteranu Moises Afonso “Abu-Abu” hateten FALINTIL iha momentu ne’eba halo sakrifisiu bo’ot, maibe iha ne’eba sira la hatene atu mate ka atu moris, tanba iha momentu ne’e kompannheiru barak mak mate ba rai ida ne’e molok hetan liberdade.
“FALINTIL iha momentu ne’eba halo sakrifisiu bo’ot, maibe iha ne’eba ami la hatene atu mate no atu moris, iha momentu ne’eba ami nia kompanheiu barak mak mate, lori sira nia isin no ran fakar ba rai ida ne’e molok hetan liberdade no nasaun, ami orgullu mós mezmu ke ami nia kompanheiru sira barak mak mate hotu maibe ami sei moris hodi selebra nafatin loron FALINTIL”. Dehan Veteranu Moises Afonso ba Jornalista SAPNews iha Kuartel Jeral Fatuhada, Tersa, 20/08/2024
Moises husu ba Xefe Estadu forsa defeza nasional atu tau matan ba feto faluk no oan kiak sira hodi lori sira ba futuru ida ne’ebe diak liu.
“Ami FALINTIL ne’ebe sei moris atu rekomenda ba Xefe Estadu F-FDTL atu tau matan nafatin ba sira ne’ebe oan kiak ho feto faluk sira ne’ebe mak momentu ne’eba fakar ran tanba rai Timor no kontinua tau matan nafatin hodi lori sira ba oin atu nune’e bele estuda sai matenek aban bairua hodi ukun nasaun ida ne’e”. Moises Afonso husu.
Veteranu ne’e mós husu ba instituisaun F-FDTL atu bele hadiak di’ak liután prestasaun servisu, nune’e bele asegura defeza no seguransa inklui integridade territorial.
“Ba servisu militar ninian iha ami nia sasukat kategoria diak maibe hakarak halo di’ak liu tan atu nune’e Timor bele sai nasaun ida ne’ebe seguru no estabilidade, forte iha defeza no seguransa hodi asegura integridade nasional”.
Funu na’in ne’e husu ba foinsa’e milenial atu labele kria probemama maibe buka estuda makaas no prepara an sai matenek hodi ukun rai no povu Timor-Leste iha futuru.
“Ha’u apela ba joven feto no mane katak labele buka problema deit, ita boot sira jerasaun foun estuda no sai matenek hodi ukun rai timor ho di’ak, ami nunka hirus malu no odiu malu ka hatudu matan fuan ba malu no ami haan etu bikan ida ka ai-farina pedasuk ida mos ami haan hamutuk no bolu malu nu’udar kamaradazen, tanba ne’e husu ba joven sira atu banati tuir ida ne’e.” Nia husu.
Falintil-Forças da Defesa de Timor-Leste ka FALINTIL-FDTL (F-FDTL) mak Forsas Armadas Timor-Leste nian ne’ebé moris husi FALINTIL (Forças Armadas de Libertação Nacional Timor-Leste) hamriik iha 20 Agostu 1975, enkuantu, F-FDTL hamriik iha UNTAET nia tempu iha loron 1 Fevereiru 2001.
Ohin povu Timor-Leste hamutuk komemora loron FALINTIL ba dala XLXIX iha Kuartel Geral Fatuhada Dili, 20 Agustu 2024.
Reportajen : Antonina Lopes Da Silva