Alkatiri : Hakarak Ka Lakohi, Rai Ne’e Sei Entrega Ba FRETILIN Hodi Ukun
Imajem : Sekretariu Jeral Partidu FRETILIN Marí Bin Amude Alkatiri iha Sede CCF Comoro Dili, 07 Novembru 2024.
SAPNewsTL, Dili : Sekretáriu Jeral Partidu Frente Revolusionáriu Timor-Leste Independente (FRETILIN) Marí Bin Amude Alkatiri hateten hakarak ka lakohi rai ukun ne’e sei monu ba FRETILIN nia liman iha loron aban bainrua.
Durante komunikadu imprensa ne’ebé hala’o iha Sede Comité Sentral FRETILIN (CCF), Fundador RDTL Marí Bin Amude Alkatiri deklara aban bainrua rai Timor-Leste sei entrega ba Partidu FRETILIN hodi ukun.
“Hakarak ka lakohi, ema gosta ka la gosta FRETILIN, rai ne’e aban bainrua iha rekursu ka laiha rekursu, rai ne’e sei entrega ba FRETILIN mak atu ukun tanba sira seluk ne’e hatama ba bolsu nakonu ona sei ba fatin seluk”. Tenik Sekretariu Jeral Partidu FRETILIN Marí Bin Amude Alkatiri iha Sede CCF Comoro Dili, 07 Novembru 2024.
Marí Alkatiri mós kestiona kona-ba rekonsiliasaun ne’ebé Timor-Leste halo ho Indonésia liliu Timoroan sira ne’ebé atu fila mai maske sei ukun ho diskriminasaun, ukun ho odiu no vingansa.
“Ita mehi atu rai ne’e sai jardim boot ida ba povu tomak, maibe Ita ukun ho ódiu, vingansa no diskriminasaun, depois ita hakarak halo fali rekonsiliasaun ho Timoroan sira iha Indonésia, ita ho ita rasik la hateke ba malu, ita ba bosok fali ema seluk atu halo saida”. Hateten Marí
Alkatiri dehan FRETILIN iha plataforma interjerasional ne’ebé existe hodi provoka mudansa maske nune’e maibé FRETILIN kontinua metin no ida deit.
“Iha FRETILIN nia leet tenki iha plataforma ida interjerasional hodi bele provoka mudansa, ne’e ema hotu hatene, orientasaun ke ha’u fo, maibé FRETILIN ida deit, kadeira ida ha’u tur ne’e ha’u tur tanba ha’u tenki tur lai”. SekJer FRETILIN sublinha
Alkatiri mós husu atu bele iha intendimentu ba malu, rona malu, haraik an ba malu, para ona ho ódiu no vingansa, para ona ho diskriminasaun tanba dalan ba tama ona presipísiu fiskal, se husik mak rai ne’e sei monu ba rai kuak.
“Ami jerasaun tuan sira sei iha funsaun, funsaun ne’e atu diak liu ita tenki haraik an uituan, rona ema seluk, para ona ódiu, vingansa no diskriminasaun, nune’e ita nia funsaun ne’e bele iha majistratira de influénsia, OJE 2025, ita tenki iha intendimentu diak ida hodi halo ida diak liu”.Alkatiri husu
Sekretariu Jeral Partidu FRETILIN konsidera nonu governu la funsiona, la rezolve problema saúde, edukasaun, agrikultura no setor produtivu, Nia husu atu governu hatudu saida mak halo ona durante tinan 2024.
“Ha’u fo parabens ba Partidu CNRT & PD tanba rekunhese sira nia inkapasidade, governu la funsiona, la rezolve problema saúde, edukasaun, agrikultura no la dezenvolve setor produtivu, enkuantu ita nia konsumu boot liu hosi ita nia produsaun, ita haree OJE 2025, despeza boot liu ba transferénsia públika no bens de servisu”.
“Transferénsia fundu minarai ba ema lubun oan ida nia bolsu ne’e mak realidade, lubun oan riku ne’e riku boot liu”. Tenik Sekretariu Jeral Partidu FRETILIN Marí Bin Amude Alkatiri iha Sede CCF Comoro Dili, 07 Novembru 2024
Marí Alkatiri husu bainhira mak apresenta karta demisaun no halo resignasaun tanba governu la funsiona ona.
“Kuandu sente laiha kapasidade ona tenki husu demisaun, bainhira los ? Ha’u husu dehan bainhira los atu apresenta resignasaun, tanba governu la funsiona, se governu la funsiona nia xefe ida deit”. Alkatiri husu
Enkuantu, Governu Dasia hamutuk ho Parlamentu Nasionál aprova ona Orsamentu Jeral Estadu (OJE) 2025 ho montante billiaun 2, no 617 Milhões iha faze jeneralidade, OJE ne’e sei halo investimentu iha infraestrutura estratéjikus, reforsu iha ekonomia no melhoria bem-estar sidadaun sira-nian.
Jornalista : Marciana da Conceição