Apresenta Poster Monografia ! Estudante Hatene Maka Manorin Susesu

SAPNewsTL, Dili – Estudante Finalista Geologia no Petroleu, Fakuldade Engenharia Siénsia no Teknolojia, Universidade Nasional Timor Lorosa’e hamutuk na’in 30 apresenta poster monografia molok tama ba ezame monografia hodi hasai grau lisensiatura.

Iha entrevista, Diretor Departamentu Geolojia no Petróleu Apolinário Alves haktuir molok estudante ida atu halo ezame monografia, normalmente sempre liu husi ezame proposta, hala’o peskija, prosesa dadus hafoin halo apresentasaun ba rezultadu peskija no ezame monografia.

“Prosesu final ne’ebe estudante sira halo ne’e bainhira atu hetan rezultadu ne’e tenke hatama uluk sira nia tópiku hodi hala’o ezame, bainhira ezaminador sira fo pasa hafoin sira tun ba halo peskiza, karik la pasa tenke hadia fila fali, hadia nia metodologia no teoria sira”.

“Rezultadu agora ne’e husi sira nia peskiza rasik ne’ebe durante sira hala’o fulan neen iha kampu, depois sira fila fali hodi halo aprezentasaun, no antes sira halo aprezentasaun ba ezame final tenke aprezenta uluk rezultadu ne’e ba públiku, liu-liu ba nia kolega sira hodi hatudu fila fali rezultadu ne’e”. Tenik Diretor Departamentu Geolojia no Petróleu Apolinário Alves ba SAPNews iha Kampus Hera, 04/07/2024

Diretor Departamentu Geolojia no Petróleu Apolinário Alves sublinha, apresentador sira sempre responsabiliza ba sira nia dadus ne’ebe kolleta iha terenu, wainhira halo apresentasaun sira tenki hatene saida mak sira hakerek no halo bazeia ba sira nia projetu final.

“Bainhira ema sira ne’ebe mai akompaña husu perguntas, sira bele responde no responsavel ba peskiza ne’e ka lae, hafoin ba hasoru ezaminador sira hodi halo ezame final, bainhira ezame mak sira lahatene no la responsavel ba sira nia peskiza, signifika katak sira lahatene no ema seluk mak halo”.Apolinário sublinha

Diretor ne’e informa durante tinan 12 departamentu geolojia no petróleu ne’e hari’i konsege produz ona graduadu hamutuk atus ida resin, agora sira barak hetan ona servisu iha instituisaun estadu no instituisaun sira seluk.

Estudante sira ne’ebe mai iha 2019 hamutuk 120, no 30 pessoa ne’e mak daudaun halo etapa dahuluk no kontinua ba etapa tuir mai, sira nia kolega ne’ebe seidauk ne’e tanba iha materia balun ne’ebe seidauk hotu no tenke halo hotu hafoin bele mai, iha estudante ida husi 2020 ne’ebe ohin aprezenta peskiza, sei remata nia estudu iha tinan ida ne’e no hetan valor ekselente tanba materia sira nia konsege halo hotu no hetan valor ne’ebe di’ak.

Lider Departamentu ne’e husu ba estudante sira atu responsabiliza ba sira nia rezultadu peskija ne’ebe halo iha terenu hodi aplika iha loron aban bainrua, wainhira remata ona estudu iha mundu akadémiku.

“Ha’u husu ba estudante sira tenke responsabiliza ba sira nia peskiza tanba rezultadu husi ida ne’e hanesan bukae ida bainhira foti departamentu ida tenke hili material espesifiku ida no bainhira sai ba liur bele aplika liliu iha area Geolojia nian no aplika ho diak ida ne’e mak ami nia esperansa, maibe iha liur mak sira lahatene ida ne’e ami nia tristeza”. Nia husu

Departamentu Geoloia no petroleum komesa iha 2012 estudante hamutuk 35 ne’ebe maka gradua hotu ona, mai fali 2014 estudante hamutuk 60 no sira mos graduadu hotu ona, iha 2015 no 2016 mos graduadu hotu ona ho total estudante hamutuk 50 resin, iha kontijente 2019 total estudante ne’ebe atu graduadu iha tinan ida ne’e hamutuk 30, no iha 2020 foin ida.

Apolinário husu bainhira hili departamentu ida tenke hatene no koñese didiak area ida ne’ebe estuda.

“Nune’e bainhira sai ba liur mak lahatene no la koñese imi nia area ida ne’e ami sente triste, maibe bainhira imi ba liur mak hatene ida ne’e mak ami nia susesu, maibe ida ne’e depende fila fali ba sira karik hakarak aprende tenke badinas lee no buka informasaun hodi hasa’e sira nia kapasidade.”Aplonáriu dehan

Iha fatin hanesan, estudante finalista Ponsiano de Jesus hataten, peskija ne’ebe estuda sira hala’o ne’e prosesu normal iha kada universidade molok gradua iha institusaun ida.

“Prosesu peskiza ne’e prosesu normal ne’ebe kada universidade hala’o antes estudante ida remata, tenke hili tópiku ida ne’ebé hetan aseitasaun husi orientador no sei iha faze selesaun husi teze ikus, hafoin tun ba terenu hodi hala’o peskiza no tuir ezame monografia”. Hateten Estudante Finalista Ponsiano da Costa de Jesus

Ponsiano salienta peskija ne’ebe nia halo durante fulan tolu inklui ho prosesamentu data no halo analizasaun ba rezultadu peskija.

“Peskiza ne’e ha’u hala’o durante fulan tolu (3) maibe tuir faze akizasaun data loron tolu (3) deit ne’ebé maka ami ba tuir instrumentu ne’ebé suporta husi Universidade hodi foti data prossesing no analysis, maibe kona-ba peskiza presiza halo movimentu hodi foti dadus nune’e ha’u halo peskiza kuaze Fulan tolu”.

“Ha’u hakarak ajuda komunidade sira hodi asesu ba bee ho kualidade ne’ebé di’ak, tanba Iha komunidade barak ne’ebé hela besik mota, no sira uza deit bee ne’ebe kontaminadu”. Nia deklara

Estudante finalista ne’e mos husu ba estudante sira atu hatene hatudu pasiénsia no hakaas an hodi hetan susesu tanba la fasil atu konkista objetivu ida sein halo sakrifisiu no dedikasaun aas.

“Ha’u husu atu kolega estudante sira hatene halo esforsu no pasiénsia, nune’e bele sai ema ne’ebe susesu iha futuru tanba susesu ne’e sempre mai husi paixaun no sakrifisiu boot”. Nia hakotu

Enkuantu, partisipa iha prosesu apresentasaun poster monografia (rezultadu peskija) ne’e maka Advisor JICA iha Timor Leste, kompanha sira, instituisaun governu sira no estudante UNTL liliu fakuldade engenharia siénsia no teknolojia.

Jornalista : Conzita Mota & Marciana Fernandes