Asegura Paz & Estabilidade ! KSDS Toka Kontrolu Arma & Munisoens
Imajem : Konsellu Superior Defeza no Seguransa realiza sorumutu hodi toka kona-ba utilizasaun armamentu no munisoens iha Palasiu Presidensial Dili, 07/04/2025. Foto : M-GPM
SAPNewsTL, Díli : Presidente Repúblika (PR) hala’o enkontru ho Konsellu Superior Defesa no Seguransa (KSDS) ho objetivu hodi hametin seguransa iha rai laran liu hosi instituisaun Seguransa hanesan Falintil Forsa Defeza Timor-Leste (F-FDTL), Polísia Nasional Timor-Leste (PNTL) no Polísia Sientífiku Investigasaun Kriminál (PSIK).
Hafoin remata sorumutu ho Presidente Repúblika Konsellu Superior Defesa no Seguransa, João Aparicio Guterres hateten Presidente Repúblika konvoka membru KSDS hodi haree kontrolu armamentu no munisoens hodi garante paz, seguransa no estabilidade iha Timor-Leste.
“Prezidente Repúblika konvoka membru sira husi Consellu Superior Defeza no Seguransa atu haree hamutuk knaar esensial husi instituisaun Seguransa Estadu nian hanesan F-FDTL, PNTL ho PSIK nian kona ba kontrulu Armamentu imunisaun hodi hametin di’ak liu tan kapasidade hodi garante paz, Seguransa no estabilidade iha rai laran”. Dehan Porta voz Konsellu Superior Defesa no Seguransa João Aparicio Guterres ba Jornalista sira iha Palasiu Presidensial Nicolau Lobato Bairo – Pite Segunda-feira, (07/04/2025).
João Aparicio akresenta, sira mos diskute kona-ba kontrolu rigorozu uzu arma no ordenasaun nível aas, no realsa treinamentu oinsa kapasita instituisaun seguransa hanesan F-FDTL, PNTL no PSIK.
“Ami mos ko’alia kona-ba kontrolu ida rigorozu tebes kona-ba uzu de armas no ordenasaun mais altu nivel depois iha parte seluk realsa mos treinamentu kapasitasaun ba instituisaun tolu ne’e nian”. Nia sublinha.
Imajem : Porta voz Konsellu Superior Defesa no Seguransa João Aparicio Guterres ba Jornalista sira iha Palasiu Presidensial Nicolau Lobato Bairo – Pite Segunda-feira, (07/04/2025).
João Aparicio hatutan “Aspetu Seguransa sira ne’ebe importante maka garante seguransa rai laran, integridade operasoens militar sira, komprimentu normas legais rai laran no internasionais kona ba seguransa no direitu umanu membru hotu-hotu “. Tenik nia.
Aleinde ida ne’e, Nia informa lei la autoriza atu ko’alia sai resultadu enkontru Konselhu Superior Defeza no Seguransa maibe importante mak garante Seguransa iha rai laran.
Nia mos akresenta katak Konselhu Superior Defeza no Seguransa refere partisipa husi Membros sira hotu husi KSDS
“Membros sira hotu wainhira presidente da Republica konvoka marka prezensa hodi debate kestoens ne’ebe importante no pertinentes liliu ba seguransa estabilidade rai laran atu mantein nafatin paz, seguransa no estabilidade ba populasaun iha rai-laran “.Nia hatutan
Entertantu, enkontru ne’e hetan partisipasaun hosi Primeiru Ministru (PM) Kayrala Xanana Gusmão, Ministru Justisa (MJ) Sergio Hornai, Ministru Interior (MI) Francisco Da Costa Guterres, membru KSDS sira.
Jornalista : Vinsensius Saldanha Morais De Araujo