Governu Solidariza Ba Vitima Asidente Karreta Truck Iha Baucau

Imagem : Karreta Truck ne’ebe baku fila iha Baucau Villa, 16/12/2025.

SAPNewsTL, Baucau : Karreta Truck ho Xapa Matríkula A 56-916 hetan asidente no baku fila iha area Postu Administrativu Baucau Villa munisipiu Baucau.

Akontesimentu ne’e rezulta ema na’in 7 kanek todan no feto Ida nia ain tohar, ema na’in 3 mate no seluk sofre kanek kman, nune’e transporta ona vitima sira ba Ospital Horex Baucau hodi halo tratamentu emergénsia.

Tuir publikasaun hosi ID Facebook “Isco Flenio da Luz” fo sai katak karreta truck ne’e hosi postu Ossu, munisipiu Viqueque hodi ba munisipiu Dili maka hetan asidente iha area Caisodo, Baucau Villa.

“Karreta truck baku fila iha Waisae, Baucau dala, tuir informasaun truck ne’e husi diresaun Ossu Nahareka atu ba Dili”. Hakerek ID Facebook “Isco Flenio da Luz”, 16/12/2025.

Nia hatutan, “Família balun ne’ebe hela iha Baucau karik bele ba haree iha HOREX Baucau”.

Asidente ne’e akontese tanba kauza hosi lakon kontrolu no travaun la funsiona hodi rezulta karreta baku fila, halo ema na’in 3 lakon vida no na’in 7 kanek todan, enkuantu na’in sia seluk sofre kanek kman.

Ligadu ho akontesimentu ne’e, Vise Primeiru Ministru, Ministru Koordenador Asuntu Sosial Mariano Assanami Sabino hato’o sentidu kondolensia ba familia vitima na’in tolu ne’ebe lakon vida, solidariza na’in hitu ne’ebe kanek todan no na’in 9 seluk ne’ebe hetan kanek kmaan, nia parte husu ba Ministeriu Saude hodi halo tratamentu ne’ebe dignu hodi salva sira ne’ebe kanek no husu kondutor sira atu halai ho kuidadu no bele prevene asidente.

“Sentidu kondolensia ba sira ne’ebe mate iha insidente Baucau Vila, husu Ministeriu Saude hodi halo tratamentu ba sira ne’ebe kanek no salva sira-nia vida, husu ba Ministeriu Transporte no Telekomunikasaun hodi fo atensaun ba kondutor ne’ebe konduz transporte publiku sira hodi labele lanu no halai ho kuidadu, nune’e ema labele mate tanba asidente”.

Maluk lee na’in sira, ita iha tempu adventu, dalan ba selebra loron boot natal no tinan foun, motorista sira presiza halai ho kuidadu, viajem ho atensaun no kontrola velosidade tanba asidente ema hotu la espera. Maromak akompanha ita-hotu.