Avaliasaun Entre Federasaun 10 ! CDTL Rekolla Rezultadu Jogu Asian Games
SAPNewsTL, Dili: Konfederasaun Desportu Timor-Leste (sigla portuges CDTL) halo avaliasaun ho federasaun desportiva 10 lori atleta kompete Asian Games 2023 iha Hangzhou, China hodi rekolla rezultadu jogu nian para sai evidensia aprezenta ba governu hodi halo preparasaun diak liu tan iha futuru.
“Ohin ami husi CDTL halo avaliasaun ba federasaun 10 lori atleta kompete Asian Games 2023 hodi rekolla rezultadu saida mak atleta sira hetan iha Asian Games 2023 iha Hangzhou China, nune’e kada reprezentante husi modalidade 10 aprezenta ona rezultadu”,
“Nune’e CDTL rekolla hotu sai hanesan evidensia ba fali preparasaun jogu tuir mai nian halo diak liu tan hanesan Sea Games 2025 iha Tailandia no CDTL hetan dadus ida ne’e para lori mos ba aprezenta governu liu husi MJDAC para tetu ba futuru saida mak diak liu”, dehan prezidente CDTL Macario F. Sanches ba jornalista sira iha edifisiu CDTL Caicoli, Dili segunda (16/10/2023).
Nia akresenta, federasaun sira tenki halo kampionatu nasional diak liu, preparasaun diak liu ka prepara fasilidade diak liu para futuru atleta sira bele rezultadu pozitivu ba nasaun Timor-Leste
Prezidente hatutan, Asian Games ne’e diferente ho Sea Games atleta husi nasaun 45 mak partisipa nune’e atleta Timor-Leste sira la hetan medalla laos preparasaun mak ladiak no atleta la kualidade maibe kompetisaun entre atleta sira mak sae makaas tebes tanba atleta sira kompete ho nasaun dezenvolvidu hanesan China, Japaun, Korea no sira seluk tan maibe atleta sira hetan rekor diak liu fali partisipa iha Sea Games 2023 iha Cambodia.
Macario informa tan, preparasaun labele sura nia durasaun tanba bainhira prosesu kualidade mezmu tempu limitadu atleta sira hatudu kualidade nune’e ba Timor-Leste menus iha fasilidade tan ne’e federasaun sira tenki utliliza sira nia tempu ho fasilidade minimu hatudu prestasaun kompete ho nasaun seluk tanba orsamentu mai husi governu mak nune’e ona ho ida ne’e governu ho CDTL diskute ona oinsa halo preparasaun diak liu ba Sea Games 2025 iha Tailandia.
Entretantu, rezultadu ba atleta Timor-Leste sira partisipa Asian Games 2023 mak atleta husi modalidade ualu kompete ho esforsu makaas maibe lakon iha jogu labele hetan medalla no atleta husi modalidade boxe ho tiru mak labele kompete tanba to’o China tarde la tuir technical meeting.
Federasaun sanulu lori atleta kompete Asian Games 2023 mak federasaun boxe, tiru, taekwondo, karate-do, tennis kampu, badminton, natasaun, atletizmu, voleibol no halterifilizmu.
Reportajen: Augusto dos Santos