Bispu Na’in 2 Assina Plaka Visita Papa, “Ut Fides Vestra, Vestra Cultura Sit”

Imajem : Dom Virgílio Cardeal do Carmo da Silva assina Plaka Vizita Papa Francisco Iha Tasi-Tolu, 10/09/2025.

SAP News TL, Díli : Valoriza valores evangellu ne’ebe maktoban Sua Santidade Papa Francisco husik hela iha rai Timor, Dom Virgílio Cardeal do Carmo da Silva SDB, hamutuk ho Dom Leandro Maria Alves akompaña husi Ministru Administrasaun Estatál Tómas Cabral asina plaka istoriku ne’ebe hakerek “Benzida por Sua Santidade Papa Francisco na sua visita apostólica a Timor-Leste entre dias 9–11 de Setembru de 2024.”

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 — 𝐒𝐀𝐏𝐍𝐞𝐰𝐬𝐓𝐋

Iha homilia Sua Eminência Dom Virgílio hateten, Papa Francisco nia domin ho nia atensaun ba povu Timor povu ida ne’ebe simples fiar nain no hatene haksolok.

“Benzida por Sua Santidade Papa Francisco na sua visita apostólica a Timor-Leste entre 9–11 de Setembru de 2024.” “Ut fides vestra, vestra cultura sit.” (Que a vossa fé seja vossa cultura – Atu imi nia fiar sai imi nia kultura – May your faith be your culture”, Esplanada Tasi-Tolu Quarta-Feira, (10/09/2025)

Plaka ida ne’e mak sei rekorda gerasaun sira mai kona-ba momentu istóriku ne’ebé Papa Francisco fo dominu, inspirasaun no atensaun ba povu Timor.

“Sarani doben sira espiritu liturjia asaun de grasa ida ne’e bolu ita atu haksolok, tanba Maromak hadomi tau matan ba ema kiik kiak no haraik an sira”.

Dom Virgílio dehan, haksolok ida ne’ebe mai husi fuan timoroan hatudu ona, mak halo Papa nia fuan monu ba Timor, halo nia hato’o deklarasaun domin ida ne’ebe sinseru kona-ba Timor katak, “ha’u nia laran monu tiha ona ba Timor-Loros’e” Cardeal subliña.

Entretantu, Selebrasaun misa no asina plaka istoriku ne’e marka momentu importante ida ba timoroan sira, hodi hanoin hikas ba fiar katólika timoroan sira, hodi tau matan ba mensajen Papa Francisco atu fiar katólika sei loke dalan ba kultura Timor nian iha futuru.

Arcebispu Metropolitana Dili Dom Virgílio Cardeal do Carmo da Silva SDB sublinha, selebrasaun santa misa asaun de grasa transforma timoroan atu hatene haksolok tanba Maromak hadomi tau matan ba ema kiik kiak no haraik an sira.

Iha homilia Sua Eminência Dom Virgílio hateten, Papa Francisco nia domin ho nia atensaun ba povu Timor povu ida ne’ebe simples fiar nain no hatene haksolok”. Dehan Dom Virgílio

Cardeal Dom Virgílio fundamenta, mensajen maktoban Santu Padre Papa Fransisco, hameno hela iha nia diskursu sira, iha nia homilia ne’ebe nia fahe ona iha nia jestu sira ne’ebe hatudu ona halo timoroan senti duni haksolok.

Arcebispu hatutan, Papa nia laran monu ba Timor, tanba nia hare rasik ho matan fiar ida ne’ebe orijinál ksolok ida ne’ebe autentika akoilamentu ida ne’ebe extraordináriu no domin ida ne’ebe puro timoroan sira fó ba santu padre.

“Ita lembra mensajen ne’ebe Papa Francisco hato’o, rai ida ne’e iha komfin do mundu iha preferia territorial ida ne’e, Papa aprende katak ksolok loloos mai husi ema kiak simples no haraik an sira” Tenik nia.

Padre selebrante ne’e akresenta, timoroan hotu-hotu hateke ba kotuk hodi hanoin hikas diskursu Papa nian ne’ebe hato’o iha Se Katedral katak.

“Ha’u mai husi mundu nia rohan nasaun Argentina maibé imi iha liu mundu nia rohan no ha’u hakarak dehan katak rai ida ne’e, tanba iha liu mundu nia rohan nia sai nu’udar sentru evangellu nian” Nia hakotu.

Lider uma kreda katolika Timor-Leste, Arcebispu Metropolita Díli, Dom Virgílio Cardeal do Carmo da Silva, konsidera selebrasaun misa intensaun ba prezensa maktoban Sua Santidade Papa Francisco hanesan momentu istóriku ba kreda Timor

“Ohin ita nobung halibur iha Tasi-Tolu dala ida tan, ita rekoiñese katak iha fatin ida ne’e sai eventu istoriku bo’ot rua (2) ne’ebe la’os detik hatudu ema Timor nia fiar, maibé koloka rai Timor iha mapa mundu” Dehan Dom Virgílio

Cardeal hatutan, Eventu istoriku ba dahuluk mak vizita maktoban Sua Santidade Papa João Paulo II iha tinan 1989, hatudu ba mundu katak povu Timor povu fiar nain povu unidu ne’ebe hatene luta hamutuk, ba nia autodeterminasaun.

“Eventu istoriku ba daruak nian, mak maktoban Papa Francisco nia vizita mai rai Timor iha loron 9-11 fulan setembru 2024, hatudu nia domin simplisidade ba sarani Timor liu husi nia enkontru no mensajen sira”.

Dom Virgílio subliña, iha tinan 1989 Papa João Paulo II dehan, Imi mak masin rain nian no roman mundu nian, liu tiha tinan lubuk ida husi Papa João Paulo nia vizita ikus mai ita simu grasa ukun rasik an ne’ebe halo ita moris iha roman liberdade nia laran.

“Timor dala ida tan hatudu ba mundu katak ita nia rai kiik ida ne’e iha liu rohan mundu nian iha roman fiar katólika nian ne’ebe nabilan dadaun iha kontinente Asiaticu nia laran” Tenik Cardeal Dom Virgílio.

Arcebispu hatutan, prezensa maktoban Sua Santidade Papa Francisco, iha tinan kotuk fortifika povu Timor nia fiar no hametin kultura hodi valoriza valores evangellu nu’udar ema fiar nain.

“Papa Francisco haree hetan roman ida ne’e iha timoroan sira nia fuan, iha labarik sira iha ferik no katuas sira, roman evangellu ida ne’e sei fó roman ba ita nia kultura no ita nia toman sira hodi nune’e valor sira evangellu nian bele moris no hola isin iha ita timoroan nia fuan hodi traforma ita iha fiar ida de’it “

Lider uma kreda katolika Timor-Leste ne’e salienta, vizita maktoban Papa Fransisco haburas timoroan nia fiar ba Maromak hametin domin entre timoroan sira, tanba hetan grasa, Nai Maromak nian liu husi vizita maktoban Papa Fransisco iha Timor-Leste.

“Ohin ita hamutuk nu’udar pursaun kiik ida husi povu Maromak nian iha rai Timor, hamutuk nu’udar kreda ida hodi hasa’e ba Maromak Santa Missa Asaun de Grasa ida hodi selebra primeiru aniversáriu visita Papa Fransisco nian, vizita ne’ebe hatudu duni katak Maromak hanoin no haraik bensaun mai ita liu husi prezensa paterna Papa Francisco”.

Cardeal fundamenta, maske nia la hamutuk ona ho sarani sira maibé, nia mai hodi hametin ema nia fiar ba Maromak habo’ot esperansa ba loron aban no haburas ita nia karidade ba malumalu.

Entretantu iha selebrasaun misa agradesimentu ne’e prezide husi Arcebispu Bispu Metropolitana Díli, Dom Virgílio Cardeal do Carmo da Silva SDB, partisipa husi Bispu Dioseze Baucau Dom Leandro Maria Alves, membru governu sira, militar, no sarani sira