Bobonaro : Toba Deit Iha Rai, PR Horta Apoia Kulsaun & Sumasu Ba Dormitóriu FUE
Imajem : Orfanatu Femenina Uma Esperança. Foto : Media GPR
SAPNewsTL, Dili : Prezidénsia Repúblika liu husi unidade Sosiedade Sivíl no Assuntu Sosiál, apoia kulsaun, sumasu no “Fronhas” ba Dormitóriu Feminina Uma Esperansa (FUE), iha Aldeia Oplegul, Suku Holsa, Postu Administrativu Maliana.
Assesor Prezidénsia Repúblika, Quintiliano Moniz hateten apoiu ne’e laos primeira vez, tanba antes ne’e Prezidénsia Repúblika mos halo ona konstrusaun uma ho sala han fatin no entrega mákina postura (Suku-Hena) ba Orfanatu sira.
“Apoiu ne’e mai husi Prezidente Ramos-Horta nia konxiensia rasik, laos deit apoia ba uma mahon Esperansa ne’e maibe ba mos orfanatu sira iha munispiu seluk, Prezidente Repúblika tau prioridade liu ba labarik sira ka familia ne’ebé kbiit natoon (Vulneravel). Ba tinan ida ne’e prezidente tau prioridade ida mos uma esperansa ida iha Munisipiu Baucau tanba labarik lubuk ida mak toba deit iha rai ne’e atu kompleta deit servisu sosial Governu nian,”hateten Assesor Prezidénsia Repúblika, Quintiliano Moniz iha Maliana.
Apoiu ne’e mai husi orientasaun direta Prezidente Repúblika, Jose Ramos-Horta, hafoin vizita ba orfanatu ne’e iha Semana anterior, wainhira madre SSpS sira hato’o situasaun labarik sira ne’ebé toba seidauk ho kulsaun no sumasu ne’ebé adekuadu.
Responsável Orfanatu Uma Esperansa husi madre relijioza Kongregasaun “Servas do Espírito Santo” (SSPS). Me. Aurelia Rosa da Costa hato’o agradesimentu ba Prezidénsia Repúblika tanba bele fo apoiu ba orfanatu sira.
“Ami hato’o profundu agradesimentu ba Prezidente Ramos-Horta ne’ebé ho Laran luak, fo ona resposta ba ami-nia pedidu ne’ebé ami hatama, ohin Ekipa bele tun direta hodi lori materiál no ekipamentu ne’ebé ami husu”.
Iha serimónia simbólika entrega sasan, Sekretáriu Autoridade Munisípiu Bobonaro ba Asuntu Administrasaun no Finansas, Domingos da Costa, hato’o mos agradesimentu ba Prezidénsia Repúblika. Nia husu atu apoiu mos ba orfanatu sira seluk iha postu administrativu sira iha Bobonaro.
Sasan ne’ebé madre sira simu mak kulsaun, sumasu hamutuk 40, no kolsa kama nian. Madre sira mos hato’o pedidu ba apoiu komputador no sasan mobiliariu hanesan Meja no kadeira, hodi loke kursu edukativu kona-ba informátika,komputadór.
Oras ne’e Orfanatu Uma Esperansa simu labarik nain-20, maioria mai husi família kbiit natoon no enfrenta problema sosial hanesan inan-aman divorsiu, trauma no inan-aman destiñu.
